Matthew 9

Běcǎ Ye̤shǔ ma̤bǎ kòmakhû sitokho tapwa̤

(Mǎ̤riko 2:1-12; Lǔka 5:17-27)

1Běcǎ Ye̤shǔ nṳ sǒkhlikû cû̌kǎbò̌ shikoǒdû̌ dě a ge ado Kaperanò htě aǒ ǐ do khònò̤nu. 2Kòyò toǒ ò̌hènṳ kòyò sitokho tapwa̤ bǎ Běcǎ Ye̤shǔ a ǒ dě a hǎmoǒ pwǎ la̤mi̤khû̌. Bǎ Běcǎ Ye̤shǔ kè̌shǐ asî ta̤yṳta̤nǎ akhanu, a hî̌ kòyò sitokhonu tapwa̤, “He phû̌khû bè̌shû̌bè̌sho na sò̌phlǒ nî̌꤮. He bòlû̌kè na ta̤sǔ hǒ.”

3Bǎnuakha pwa̤sû̌ǐ ta̤sû̌ta̤tòwò asara toǒ gènè̤ lǒkho dě a sò̌phlǒkû, “Kòyò htǒotapwa̤ hî̌bǎsǔ Cǒmara hǒ.”

4Běcǎ Ye̤shǔ sî̌ya bò̌phlǒbò asî ta̤gènè̤ toǒ dě a hî̌ asî, “Mî̌ma̤tè̤dě sî cû̌ gènè̤ phû̌mò̤shî̌hto tǒ̤ ta̤hǐnu toǒ dě sî sò̌phlǒkû ma̤tè? 5‘He bòlû̌kè na ta̤sǔ hǒ’ hî̌mî̌ ayûkhlo ya? Mè̤tò̤dě ‘Ihtǒ dě cû̌mò̌’ hî̌mî̌ ayûkhlo ya? 6Pò̤̌ta kòyòphû̌khû mî̌ hehtǒo, ma̤pûhǐ sî sî̌ya lǒkho ta hǎkhû̌ bǎonu, he ǒ ta ta̤shû̌ta̤sho dě he bòlû̌bò̌ kò ta̤sǔta̤plě toǒnudě, he glè dǔlṳ bǎ sî,” A hî̌hto hǐnudě, a hî̌ kòmakhû sitokho htǒotapwa̤, “Ihtǒ tûlûnṳ na khlǒla̤mi̤ dě gemò̌ na hǐnu.” 7Kòyònu tapwa̤ ihtǒge dě ahǐ. 8Cǒmara ǐlò̤bǎ kòyò a ta̤shû̌ta̤sho hǐnu akhû̌akhî, bǎ kòyò saprṳ̂ kè̌shǐ ta̤ma̤ana̤ hǐnu akha, asî ǐsha bè̌dubè̌na̤ lǒkho Cǒmara dě htû̌sò̌ǐ lǒkho Cǒmara.

Běcǎ Ye̤shǔ kaǎ Matěo

(Mǎ̤riko 2:13-17; Lǔka 5:27-32)

9Bǎ Běcǎ Ye̤shǔ hǎhtò̌cû̌kè bǎnuakha, a kè̌shǐ kòyò tapwa̤ ami̤ mî̌ Matěo hǎnòò̌ ma̤ ta̤ma̤ bǎ la̤kwi ta̤kûta̤cî̌ Khwǐ hǐkû. Běcǎ Ye̤shǔ hî̌ nû̌û, “Cû̌꤮ gûkû̌ hekò dě htûkû̌ he khophijaû̌.” Dě Matěo ihtǒ gûcû̌kû̌ nû̌ûkò.

10Bǎ Běcǎ Ye̤shǔ ǎdî lṳmṳhǎ dě Matěo hǐ akhanu, pwa̤kwi ta̤kûta̤cî̌ toǒ ta ta̤ma̤sǔphû̌ toǒ hè ǎhtuohtuplṳ̂ kû̌bò Ye̤shǔ ta akhophijaû̌ toǒ. ^a 11Bǎ Pharisè̌phû̌ toǒ kè̌shǐ hǐnu akha, a gwè akhophijaû̌ toǒ, “Sî sara cû̌ ǎhtuohtu kû̌tǒ̤ ta pwa̤kwi ta̤kûta̤cî̌ ta ta̤ma̤sǔphû̌nu toǒ ma̤tè?”

12Běcǎ Ye̤shǔ gana̤dede ta a hî̌shǔ asî, “Kòyò htě a ǒmo̤ǒbǎ toǒnu, a lo̤bǎ ta ta̤khû̌saradû̌ tò̤. Kòyò htě ashǐasha toǒnu mî̌ a lo̤bǎ ta ta̤khû̌saradû̌. 13Pò̤̌ta kè̌lǎsî̌ya lǒkho Cǒmara sò̌yṳ hî̌ amûasǎ toǒ dě a hî̌, ‘He sò̌yṳ ta̤lṳta̤tò̌ tò̤, he sò̌yṳpwǎ ta̤gwèbǎǐ nû̌û tapwa̤ ta tapwa̤nu pwǎ.’ ^b Ma̤tè̤hî̌dě, he hè kaǎ kòyò htě acǒatè̤nu toǒ mè̤tò̤. He hè kaǎpwǎ kòyò htě ata̤sǔ ǒnu toǒ pwǎ.” ^c

Kògwè dǔǎshǎ awi̤akè̌

(Mǎ̤riko 2:18-22; Lǔka 5:33-39)

14Htodě pwa̤ploshi Jowǎ̤ni̤ akhophijaû̌ toǒ hè Běcǎ Ye̤shǔ a ǒ dě a hè gwè nû̌û, “Pa ta Pharisè̌phû̌ toǒnu, pa dǔǎshǎ, pwǎ̤ta nakhophijaû̌ toǒnu a dǔǎ kû̌kò shǎ tò̤ ma̤tè?”

15Běcǎ Ye̤shǔ hî̌shǔ asî ta yo̤sǎkhěkhǒ tûmû dě a hî̌, “Bǎ khòmò̤makhû ǒhtukû̌pe ta akho shǐpwa̤shǐmè̤ akhanu, a khoshǐpwa̤shǐmè̤ htǒotoǒ cû̌sǎpla̤jò hî̌tè? Pò̤̌ta htû̌꤮ khîkha hèto̤ ta kò kaǎcû̌ tephekè khòmò̤makhû pě akhanu, asî dǔǎdǔo lǒkho pě.

16“Kò shò̌phabǐ hǔgòpwî̌li̤ ta hǔgòpwî̌sa dě a sutǔ hǒtò̤ toǒnu a ǒ dǐpwǎ̤꤮ tò̤, ma̤tè̤hî̌dě dè shò̌phabǐ hî̌nu hǔgòpwî̌sahtǒo a cǐsutǔkè dě atǐ̤ htò̌lè̌lè̤po̤ hǔgòpwî̌li̤htǒo pě. 17Kòyò yṳnṳ sobîshisî̌yo̤sa dě shiophěko li̤kûnu a ǒ dǐpwǎ̤꤮ tò̤. Kò dè yṳnṳ hǐnu hî̌dě, shiophě po̤phò̌ dě sobîshisî̌yo̤ lò̤gukèbò pě. Htohǒtò̤ shiophěko htò̌phò̌kè pě. Hǐnudě kò yṳnṳ pwǎ sobîshisî̌yo̤ asa htǒonu dě shiosa akû pwǎ. Dè ma̤hǐnu hî̌dě sobîshisî̌yo̤ bǎbǎ, shiophě bǎbǎ, a pî̌pe tò̤.”

Phijaû̌mamǔ htě a si tapwa̤ ta kòyòmamǔ htě a tè̌bǎ Běcǎ Ye̤shǔ ahǐdopo̤to̤ tapwa̤

(Mǎ̤riko 5:21-43; Lǔka 8:40-56)

18Bǎ a hî̌bǎ kò hǐnu akhanu, ta̤sabahǐ hǐkǒdû̌ tapwa̤ hè gene̤lò̤ nû̌ûlo̤mo̤ dě a hî̌ nû̌û, “He phû̌mamǔ simǒ̤pepwǎ, pò̤̌ta gekû̌ he dě gedò̌htò̌ na cǔde dě alo̤ mî̌ a htûpwa̤ lòtṳ̌ pwǎ.” 19Běcǎ Ye̤shǔ ihtǒ dě gûgekû̌ nû̌û. Dě akhophijaû̌ gûgekû̌ yǎ.

20Bǎ asî ge klè̌lo̤ akhanu, mamǔ htě a khòbǎyî̤ ta̤shasǐlò̤ shǐginǐ̤něnu a ǒ tapwa̤, a gûgekû̌ Běcǎ nǒkò dě a hètè̌bǎ Ye̤shǔ hǐdopo̤to̤kòpwè̤. 21“He dè tè̌bǎ mò̌yǎ hǐdopo̤to̤nu mî̌ he ta̤shasǐlò̤ htǒo a hǎmǎ lòtṳ̌,” A hî̌hǔ tû̌ ana̤ dě a hè Ye̤shǔ nǒkò dě a hètè̌ nû̌û hǐdokòpwè̤.

22Běcǎ Ye̤shǔ htû̌tiwǐ kè̌tîkhî dě kè̌shǐ nû̌û akha a hî̌ nû̌û, “Phû̌mǔ, bè̌shû̌bè̌sho na sò̌phlǒ nî̌꤮, na ta̤yṳ htǒonu, a ma̤bǎkè na ta̤shahǒ.” Htǒotaplǎdě mamǔ htǒotapwa̤ a ta̤shanu, a bǎkè taplǎpa.

23Bǎ Běcǎ hènṳ dě Yṳ̌daphû̌ hǐkǒdû̌ htǒotapwa̤ ahǐkû akhanu, a kè̌shǐ pwa̤ǔ tî̌lû̌ toǒ ta kòyò hǎwo pi̤ti̤pṳ̂tṳ̂ tṳ̂prṳ̂taphǎ dě a hî̌ asî, 24“Cû̌tephebò lǒkho. Phijaû̌mamǔphû̌ htǒotapwa̤ mî̌ a si mè̤tò̤, a hǎmoǒ shope̤ pwǎ.” A hî̌ dě kò ya̤ǐbò nû̌û. 25Bǎ kò nohǎhtò̌htobò kòyò saprṳ̂nu toǒ akhlo khanu, Ye̤shǔ nṳ hǐdǒkû bǎ phijaû̌mamǔphû̌ htǒotapwa̤ la̤hǎmoǒ gûla̤nu dě a pṳ̂ nû̌ûcǔgo akha phijaû̌mamǔphû̌ htǒotapwa̤ htûpwa̤gesǒ. 26Ta̤wi̤ta̤kè̌ htǒo a lṳpîshîcû̌bò pṳ̂̌shipṳ̂̌ga.

Běcǎ ma̤lîgesǒ kòyò mi̤sǎkhǐ sò̌gini̤ htodě a ma̤wǒ gesǒ kòyòpè̌ tapwa̤

27Bǎ Běcǎ Ye̤shǔ hǎhtò̌cû̌kè bǎnu tò̤glò akha, kòyò mi̤sǎkhǐ sò̌gini̤ yi̤kǒ cû̌kû̌ nû̌ûkò, “Kǒ Dǎ̤wi̤ aphû̌khû, gwèbǎǐ ma̤jè pû pa nî̌꤮.”

28Bǎ Běcǎ cû̌nṳ hǐ tamakû akhanu, kòyò htǒosò̌gini̤ gûnṳkû̌ nû̌û dě Běcǎ Ye̤shǔ gwè asî, “He ma̤lîjò sî mi̤sǎnu sî yṳǎ ya?”

Asî hî̌shǔ, “O, Běcǎ pa yṳǎ.”

29Dě Běcǎ tè̌hè asî mi̤sǎphlǒ dě a hî̌, “Sî yṳǎ akhû̌akhî, he ma̤bǎ bǎ sî.” 30Dě asî mi̤sǎ lîgebò sǒ. Běcǎ Ye̤shǔ mǎnǎte̤mǎ asî, “Pwe̤ǐlṳ pûma̤ kò dǐpwǎ̤꤮ ma̤ nî̌꤮.” 31Pwǎ̤tadě asî hǎhtò̌cû̌ cû̌shido pwe̤ǐ pîshîbò ta̤wi̤ta̤kè̌ htǒo bǎnu taga akû gûla̤ pṳ̂̌꤮ tò̤glò.

32Bǎ kòyò mi̤sǎkhǐ htǒosò̌gini̤ hǎhtò̌cû̌htonu, kò kaǎhènṳ kòmakhû htě khînǎ ma̤sha nû̌û dě a pè̌nu tapwa̤ Běcǎ Ye̤shǔ ǒ. 33Bǎ Běcǎ Ye̤shǔ wṳ̂hǎhtò̌htokè khînǎ akhanu, kòyòpè̌ htǒotapwa̤ hî̌bǎjò gesǒ. Dě kòyò saprṳ̂ toǒ sû̌pi̤sò̌pi̤ mè̤mè̤̌. “Kò ma̤jò ta̤ hǐnu dě Israelphû̌ aklanu kè̌shǐnǒ dǐkhò̌꤮ hǒtò̤,” A hî̌ lǒkho hǐnu.

34Pwǎ̤ta, Pharisè̌phû̌ toǒ hî̌, “A wṳ̂hǎhtò̌jòkè khînǎkhîno toǒ pwǐhè̌o numî̌ mî̌pwǎ khînǎ hǐkǒdû̌nu toǒ ǐ nû̌û sîrîpo̤phǎ khû̌khî nupwǎ.” ^d

Ye̤shǔ gwèbǎǐ kòyò saprṳ̂

35Běcǎ Ye̤shǔ cû̌shidobò wî̤ pṳ̂̌꤮ tî̤wî̤ do pṳ̂̌꤮ tado dě cû̌ sû̌ǐtòwòǐ bǎ kò Yṳ̌daphû̌ ta̤sabahǐ toǒ akû, cû̌nṳ dǒhtû̌ǐ bǎ kò ta Cǒmara ashiaga a ta̤sò̌le̤sò̌lò̤ awi̤akè̌, dě ma̤bǎbò bǎ kò ta̤shǐta̤sha pṳ̂̌tacǎ. ^e 36Bǎ a kè̌shǐ kòyò saprṳ̂ htě a bǎpò̤bǎsha dě a la̤nǎla̤ǐ kònu a ǒ kû̌kò dǐpwǎ̤꤮ tò̤ dě alò̤ta sophû̌ tṳmṳ htě pwa̤gèǐ asî ǒtò̤ htǒotoǒ akhanu, a gwèbǎǐ mè̤mè̤̌ asî. ^f 37Bǎnuakha, a hî̌ akhophijaû̌ toǒ, “La̤kǎbǔ agûla̤ ǒplṳ̂, pwǎ̤tadě pwa̤kǎbǔ ǒpî̌tî̌ mè̤mè̤̌. ^g 38Dě kwisaba lǒkho hǔklaběcǎ ta a glè nohè pwa̤kǎbǔ toǒ dě ahǔklakhû̌ htǒonu nî̌꤮.”