Mat 11:1-19 | KxfSCKRC | STEP | Bǎ Běcǎ Ye̤shǔ sû̌ǐ yṳ̂klè̌nè̌klòhto akhophijaû̌ shǐsò̌gini̤htǒo akhanu, a hǎhtò̌cû̌kè bǎnu dě a hǎhtò̌cû̌ wî̤ htě a ǒ Galilî̌aga toǒ ma̤pûhǐ a cû̌ sû̌ǐtòwòǐ dǒhtû̌ǐ bǎ kò ǒbǎnu toǒ.

Matthew 11:1-19

Pwa̤ploshi Jowǎ̤ni̤ akhophijaû̌ toǒ

(Lǔka 7:18-35)

1 Bǎ Běcǎ Ye̤shǔ sû̌ǐ yṳ̂klè̌nè̌klòhto akhophijaû̌ shǐsò̌gini̤htǒo akhanu, a hǎhtò̌cû̌kè bǎnu dě a hǎhtò̌cû̌ wî̤ htě a ǒ Galilî̌aga toǒ ma̤pûhǐ a cû̌ sû̌ǐtòwòǐ dǒhtû̌ǐ bǎ kò ǒbǎnu toǒ.

2 Bǎ Jowǎ̤ni̤ ǒ bǎ kò la̤dǒlò̤te̤ yǎ apo̤kû akhanu, a gana̤de ta Běcǎ ma̤ta̤cǒklî̌kî̌ya toǒ dě a nocû̌gwè akhophijaû̌ toǒ ta Běcǎ Ye̤shǔ dě asî gwè nû̌û, 3 “Na mî̌ Mè̤shǐa htě pwa̤po̤ toǒ pwe̤ǐnǎ ta a hè pěnu tapwa̤ hǒ ya? Mè̤tò̤mî̌ pa tobǎ ǒpo̤kè̌shuǐpe ahǔwa̤tapwa̤ hè pěnu ya?”

4 Běcǎ Ye̤shǔ hî̌shǔ yǎ, “Ge pwe̤ǐsǒ Jowǎ̤ni̤ ta ta̤lǒ̤꤮ bò htě sî kè̌shǐ gana̤de htǒotoǒnu nî̌꤮. 5 Kòyò mi̤sǎkhǐ toǒ kè̌shǐjò hǒ, kòyò khò̌lopo̤dě toǒ cû̌jò hǒ, kòyò ta̤shakroǎ phělo̤ toǒ hǎmǎgebò hǒ, kòyò nò̌kukoo toǒ gana̤debò hǒ, ^a kòyòsi toǒ htûpwa̤gesǒ hǒ, kòyò hǒwi̤shèwèphû̌ toǒ gana̤debǎ ta̤sò̌le̤sò̌lò̤ awi̤akè̌ hǒ. ^b 6 Hekhû̌hekhî, kòyò sò̌phlǒpî̌ tò̤, a yṳǎ sayè̤ toǒnu a glè nî̤bǎ mè̤mè̤̌ ta̤howi̤ hǒ.”

7 Bǎ Jowǎ̤ni̤ akhophijaû̌ toǒ hǎhtò̌gehtonu, Běcǎ Ye̤shǔ sahtò̌ hî̌bǎ kòyò saprṳ̂nu toǒ ta Jowǎ̤ni̤ awi̤akè̌. Dě a hî̌ asî, “Sî hǎhtò̌cû̌ lǒkho lo̤měshǒkla numî̌, sî cû̌kè̌ kwè̌꤮ ûpè? Mî̌ sî cû̌kè̌ lǒkho gili̤sǎ guyṳ gopo̤phomṳnu toǒ ya? 8 Hǐnu mè̤tò̤ dèhî̌dě, mî̌ sî hǎhtò̌cû̌kè̌ kwè̌꤮ titè? Mî̌ sî hǎhtò̌cû̌kè̌ lǒkho pwǎ kòyò htě a kûsǒ bǎ sî hǐdohǐyò̤ rakhaplò̌kîtrî̌ tapwa̤pwa̤nu pwǎ ya? Kòyò htě a kûsǒ hǐnu toǒ mî̌ a ǒpwǎ dě Khwǐho toǒ akû pwǎ. 9 Hî̌bǎkè̌ he, sî hǎhtò̌cû̌kè̌ kwè̌꤮ mî̌titè? Sî hǎhtò̌cû̌kè̌ pwa̤po̤ tapwa̤pwa̤ ya? Sî dè cû̌kè̌ pwa̤po̤ tapwa̤pwa̤ hî̌numî̌ a mè̤hǒ. He hî̌ sî, kòyò htě adû̌khlo ta pwa̤po̤nu, sî kè̌shǐ yǎ hǒ. 10 Jowǎ̤ni̤ mî̌ kòyò tapwa̤ dě Cǒmara hî̌nǎ nû̌awi̤akè̌ ta,

‘Kè̌kè̌ a mî̌ pwa̤sû bǎ he ta̤wi̤ta̤kè̌ tapwa̤hǒ, ma̤pûhǐ a ma̤lînǎwǐ bǎ naklè̌ la̤hè ayanudě, he nohèwǐ yǎ dě nalo̤mo̤ hǒ.’” ^c

11 Ye̤shǔ hî̌po̤, “He hî̌ mè̤mè̤̌ sî, kòyò lǒ̤꤮ bò htě a ǒphû̌jalò̤ toǒ aklanu, adû̌khlo ta pwa̤ploshi Jowǎ̤ni̤nu a ǒ dǐpwǎ̤꤮ tò̤. Pò̤̌ta kòyò htě a pî̌tî̌gutṳ̌ dě mǒkhû̌ shila̤gakû tapwa̤nu, adû̌khlope ta Jowǎ̤ni̤. 12 Sahtò̌ bǎ pwa̤ploshi Jowǎ̤ni̤ ahtukha tǒ̤khònò̤nu, kòyò toǒ nṳ shějîshějû mǒkhû̌ shila̤gakû. Kòyòkhukòyòhî toǒ jipwi̤ nṳphî̌sigwi gutṳ mǒkhû̌ shila̤gakû. ^d 13 To̤htû̌ Jowǎ̤ni̤ htukhanu, lǒ̤꤮ bò pwa̤po̤ alî̤ toǒ ta lǒ̤꤮ bò Mǒ̤jè a ta̤sû̌ta̤tòwò toǒnu a pwe̤ǐnǎbò Cǒmara ashiga awi̤akè̌htǒo ta a glè htûhtò̌ pěnu hǒ. 14 Èlî̌a hè gesǒ pě, pwa̤po̤ toǒ hî̌ hǐnu. A sò̌yṳ hî̌ ûpènu he pwe̤ǐlṳ bǎ sî. Sî dè yṳǎ heyo̤ hî̌nu sî sî̌yaphlo pwǎ. Pwa̤po̤ hî̌ ta Èlî̌a hè gesǒ pě, a hî̌ numî̌, a hî̌ Jowǎ̤ni̤ htǒonuhǒ. ^e 15 Kòyò htě a ǒ ta anò̌ku toǒnu, nogana̤de lǒkho asî.

16 “He bǎ dǒtû kè̌mò̌mṳ bǎ sî kòyò htǒotuhtu ta mî̌titè? Asî mî̌ asǒsǒ ta phijaû̌phû̌ htě a cû̌ hǎnòò̌htu nû̌û klǎkûnu toǒ dě a yi̤kǒyi̤hta cû̌ kè̌khînû̌û tapwa̤ ta tapwa̤ dě a hî̌ lǒkho,

17 ‘Pa ǔ bǎ sî tî̌lû̌ dě sî kalî̌ tò̤tò̤, pa hǎwo bǎ sî lṳ dě, sî hǎ tò̤tò̤,’ a yi̤kǒ kè̌khînû̌û hǐnu.

18 Ma̤tè̤hî̌dě Jowǎ̤ni̤ hè dǔǎshǎ, hè dǔoshisî̌yo̤ toǒ dě ‘Khînǎkhîno ma̤bǎ nû̌û hǒ,’ kò hî̌bò nû̌ûwi̤akè̌ hǐnu. 19 Kòyòphû̌khû mî̌ hehtǒo hèǎhèo lè̌dě ‘Kè̌mò̌ kòyò htǒotapwa̤lè, a ǎshû̌osho, a cû̌ bǒsû̌khǎkho tû̌aya ta pwa̤kwi ta̤kûta̤cî̌ ta ta̤ma̤sǔphû̌nu toǒlè,’ asî hî̌ lǒkho hǐnu. Pwǎ̤ta bǎ kò ma̤wǒ ta̤ pwǐ Cǒmara a ta̤sî̌ta̤jò htǒo dě aphoasǎ hǎhtò̌lṳ akhapěnu, kòyò ahǔwa̤ toǒ kè̌shǐ sî̌yahè ta Cǒmara a ta̤sî̌ta̤jò htǒonumî̌ a topwǎ, hǐnu pě.”