Matthew 14

Pwa̤ploshi Jowǎ̤ni̤ sihî̌tè awi̤akè̌

(Mǎ̤riko 6:14-29; Lǔka 9:7-9)

1Bǎnuakha Herǒ htě apǒshipǒga bǎnu tapwa̤ gana̤de Běcǎ Ye̤shǔ awi̤akè̌. 2Dě a hî̌ apwa̤ma̤ta̤ toǒ, “A mî̌ pwa̤ploshi Jowǎ̤ni̤ pwǎ, a sihtûpwa̤gesǒ hǒ, dě a ma̤jò ta̤cǒklî̌kî̌yanu toǒ.”

3– 4Khwǐherǒ cû̌phî̌ gesǒtû̌ akhi Mo̤herǒdè. A mî̌ apṳ Phǐlǐpo ama hǐnu akhû̌akhî, Jowǎ̤ni̤ hî̌htohî̌sǒ nû̌û, “Na cû̌phî̌ gesǒ nakhi hǐnu mî̌ ato ta ta̤sû̌ta̤tòwò tò̤.” ^a A hî̌ nû̌û hǐnudě a nocû̌pṳ̂ coklomě akliphû̌ toǒ ta Jowǎ̤ni̤ dě a nodǒlò̤te̤ nû̌û apo̤kû. ^b 5Khwǐherǒ sò̌yṳ ma̤sikè Jowǎ̤ni̤ hǐnudě Yṳ̌daphû̌ toǒ yṳǎ ta Jowǎ̤ni̤ mî̌ pwa̤po̤ tapwa̤ akhû̌akhî, a ǐsha asîla̤ dě a ma̤sibǔ nû̌û tò̤.

6Pò̤̌ta bǎ Khwǐherǒ ata̤ǒlò̤ amṳni̤ hèto̤hǒ akhanu, Mo̤herǒdè aphû̌mamǔ kalî̌ dě Khwǐherǒ alo̤mo̤ ta shǐtè̤mè̤ toǒ alo̤mo̤ dě Khwǐherǒ sò̌phlǒmo̤ jòjî̌꤮ tò̤ akhû̌akhî, 7A olò̤ ta a sò̌yṳ kwi titètè̌꤮ nu, a glè ǐ nû̌û a hî̌ nû̌û hǐnu. 8Dě bǎkwi mî̌titènu amo̤ hî̌ nû̌û dě a cû̌ hî̌ Khwǐherǒ, “Pe̤tṳ bǎ he pwa̤ploshi Jowǎ̤ni̤ agobo dě dò̌nṳ bǎ he ta ahǐkǒ htǒonu dîbataadû̌kû dě hèǐ he bǎo,” a hî̌ hǐnu. 9Khwǐnu a sò̌phlǒmo̤ tò̤ pò̤̌ta a olò̤mèlò̤hto ashǐtè̤mè̤ toǒ alo̤mo̤ akhû̌akhî, a hî̌lò̤ akliphû̌ toǒ ta a glè cû̌ma̤pwǐ phijaû̌mamǔ htǒotapwa̤ kwi nû̌ûnu. 10Asî cû̌ bǎ kò la̤dǒ kòyò apo̤kû dě a cû̌pe̤tṳge Jowǎ̤ni̤ agobo. 11Asî dò̌nṳ Jowǎ̤ni̤ a hǐkǒhtǒo dîbataadû̌akû dě a hèǐ nû̌ûta phijaû̌mamǔnu tapwa̤ dě phijaû̌mamǔhtǒo joge nû̌û amo̤ ǒ. 12Jowǎ̤ni̤ akhophijaû̌ toǒ hèphî̌ge nû̌û na̤klû ǒkèhtǒo dě ge lǔkè nû̌û. Htodě asî cû̌ pwe̤ǐ Běcǎ Ye̤shǔ.

Běcǎ Ye̤shǔ bǔǎ kòyò yè̤̌rî̌

(Mǎ̤riko 6:30-44; Lǔka 9:10-17; Jowǎ̤ni̤ 6:1-14)

13Bǎ Běcǎ Ye̤shǔ gana̤de ta kò ma̤sihto Jowǎ̤ni̤ akhanu, a ta akhophijaû̌ toǒ cû̌ dò̌nṳ sǒkhli dě hǎhtò̌cû̌kè lǒkho tû̌ gûla̤sî̌tukǔ htě kò ǒ dǐpwǎ̤꤮ tò̤ tò̤glò. Dě bǎ kòyò saprṳ̂ gana̤de akhanu, a ǒ lǒkho bǎ wî̤kûnu toǒ dě a hǎhtò̌ cû̌kû̌ lǒkho ta khò̌lopo̤ khosûkhû̌ tokho. 14Bǎ Běcǎ Ye̤shǔ ǒ sǒkhlikû hǎhtò̌ akhanu, a kè̌shǐ kòyò prṳ̂hodû̌ cû̌ ǒpo̤nǎwǐbò lo̤mo̤. Bǎ a kè̌shǐ asî akha a gwèbǎǐ asî dě a ma̤bǎbò kòyòsha bǎ asîklanu toǒ.

15Bǎ lṳmṳhǎ lṳmṳ glèphǔlòte̤ akhanu, akhophijaû̌ toǒ hè nû̌ûǒ dě a hèhî̌ nû̌û, “Gûla̤ bǎotò̤glò mî̌ do ǒphǔ dǐdǒ꤮ tò̤, htohǒtò̤ lṳmṳkhǐpo̤lo̤ hǒ akhû̌akhî, ma̤pûhǐ asî cû̌ pwî̤ǎpwî̤o tû̌ lǒkho a la̤ǎla̤o dě doshǒnu toǒ akû dě nogemò̌ kòyò htǒotoǒ.”

16Běcǎ Ye̤shǔ hî̌shǔ asî, “Lo̤bǎnoge asî tò̤. Kè̌ ǐǎǐo asî tacǎcǎnu.”

17Dě asî hî̌shǔ nû̌û, “Pata ǒ pwǎpǒ̤ mû̌ yè̤̌ma ta tò̤phû̌ ginǐ̤plṳ̂ pwǎ.”

18Dě a hî̌ asî, “Phî̌hè yǎ he ǒ bǎo.” 19Dě a nohǎnòò̌lò̤ kòyònu toǒ mi̤khû̌. A phî̌ mû̌ yè̤̌ma ta tò̤phû̌ ginǐ̤plṳ̂htǒo dě a kè̌htò̌ mǒla̤ a hî̌bwǐhî̌sîrîhtò̌ Cǒmara htodě a bî̌phò̌ mû̌. Htodě a ǐlò̤ akhophijaû̌ toǒ aǒ. Dě akhophijaû̌ toǒ yṳ̂ǎlò̤ tṳtṳ nû̌ûta kòyò saprṳ̂ toǒ aǒ. 20Asî ǎ pǒǎpǒo ǎkǒobebò pṳ̂̌꤮ tapwa̤. Akhophijaû̌ toǒ phî̌htuplǒge a ǒkè toǒnu a ǒbepe ta phǒbě shǐginǐ̤ phǒbě. 21Dǒcòcè̌pwǎ makhûwè̤pwa̤ htě a ǎshǎ htǒotoǒnu a phǔ꤮ ǒtû̌ yè̤̌rî̌. Mamǔ ta phijaû̌ toǒnu dǒto̤ yǎ tò̤.

Běcǎ Ye̤shǔ cû̌ dě shikhû̌

(Mǎ̤riko 6:45-52; Jowǎ̤ni̤ 6:15-21)

22Asî htǔplǒ htohto ta Ye̤shǔ nocû̌nṳ htò̌dò̌bò akhophijaû̌ toǒ sǒkhli dě a nohǎhtò̌cû̌ wǐkè asî shikoǒbò̌kho. Dě bǎ akhophijaû̌ htò̌dò̌ sǒkhli akhanu, a dě a plûgebòkè kòyò saprṳ̂nu toǒ. 23A plûgehto kòyò saprṳ̂ dě, a cû̌htò̌ kwisaba tû̌ kholokhû̌ tapwǎ̤꤮ pa. Bǎ lṳmṳkhǐpo̤lo̤ akhanu, a ǒ tû̌ bǎnu tapwǎ̤ pa. 24Pwǎ̤ta bǎ sǒkhlinu tabǎ hǎhtò̌cû̌yî̤kè ta shikoǒkû akhanu, gili̤sǎ hèhtû̌bǎ asî dě shipěpǒ hèpla̤ gleglòbò asî sǒkhli.

25Bǎ shî û̌sayè̤ lṳmṳ glè̌ lîbû akhanu, Běcǎ Ye̤shǔ cû̌ shikhû̌ dě a hè asî ǒ. 26Bǎ akhophijaû̌ toǒ kè̌shǐ nû̌û cû̌ shikhû̌ akhanu, asî ǐsha gònò̤gèglè dě a yi̤kǒ lǒkho, “Kǒ꤮ kòyola.”

27Pò̤̌ta taplǎpa, Běcǎ Ye̤shǔ hî̌ asî, “Bè̌khubè̌hî lǒkho sî sò̌phlǒ. Ǐsha lǒkho pûma̤, htǒomî̌ he pwǎ.”

28Dě Petru hî̌, “Běcǎ, na dè mè̤mè̤̌ hî̌dě hî̌ he dě he hèkû̌ shikhû̌ dě na ǒ.”

29Dě a hî̌ nû̌û, “Hèmò̌.”

Dě Petru hǎte̤ sǒkhlikû dě a hèto Ye̤shǔ a ǒ bǎ shikhû̌. 30Pò̤̌ta bǎ a kè̌shǐ gili̤sǎ shipěpǒ akhanu, a ǐsha ta a lòcǔ, dě a yi̤kǒ, “Běcǎ, ma̤jèpû he nî̌꤮.”

31Běcǎ Ye̤shǔ yṳ̂hè acǔde taplǎpa a cǐhtò̌ nû̌û dě a hî̌ nû̌û, “Na ta̤yṳpî̌tî̌꤮ le, na sò̌phlǒ wò̌wè̌ ma̤tè?”

32Bǎ asî htò̌nṳ dě sǒkhlikû akhanu, gili̤sǎǒkǔ hè. 33Bǎnuakha kòyò ǒ sǒkhlikûnu toǒ sabahtò̌ Běcǎ Ye̤shǔ dě a hî̌, “Na mî̌ Cǒmara aphû̌khû tapwa̤ mè̤mè̤̌ hǒ.”

Běcǎ ma̤bǎ ta̤shǐta̤sha dě Gena̤sarè̌ga

(Mǎ̤riko 6:53-56)

34Asî cû̌kǎbò̌hto shikoǒdû̌htǒo dě a cû̌to̤ lǒkho Gena̤sarè̌ga. 35Dophû̌shǒphû̌ bǎnu toǒ to̤mǎǐ Ye̤shǔ dě asî cû̌pwe̤ǐbò kòyò lǒ̤bò htě a ǒ lǒkho gakû bǎnu toǒ dě kò kaǎhèbò kòyòshǐ kòyòsha toǒ Ye̤shǔ ǒ. 36Asî kwigwèbǎǐ Běcǎ ta notè̌bǎpwǎ na hǐdopo̤to̤kòpwè̤ htǒonu ta pwa̤shǐpwa̤sha htǒotoǒnu tîkî̌phû̌pwǎ. Dě kòyò htě a tè̌bǎ nû̌û hǐdopo̤to̤kòpwè̤ toǒnu, a ta̤shǐta̤sha hǎmǎbòkè.