Matthew 18

Mî̌ûpè tapwa̤ dû̌gutṳ̌pè?

(Mǎ̤riko 9:33-37; Lǔka 9:46-48)

1Bǎnuakha, Běcǎ Ye̤shǔ akhophijaû̌ toǒ hè nû̌ûǒ dě hè gwè nû̌û, “Dě mǒkhû̌ shila̤gakû numî̌, ûpè htûdû̌gutṳ̌pě pè?” ^a

2Běcǎ Ye̤shǔ kaǎ phijaû̌ tapwa̤ dě a nohè ihtǒ ǒ nû̌û asîkla. 3Dě a hî̌ asî, “He hî̌ mè̤mè̤̌ sî꤮, sî dè htû̌lè̌tèplè̌ sî sò̌phlǒ tò̤, sî dè htûhtò̌ lò̤ta phijaû̌phû̌ htǒotoǒ tò̤ hî̌mò̌nu, sî nṳjò mǒkhû̌ shila̤gakû dǐkhò̌꤮ tò̤. ^b 4Ma̤hǐnudě, kòyò htě a shò̌lò̤ asò̌phlǒ pwǐ phijaû̌phû̌ htǒotapwa̤nu, mǒkhû̌ shila̤gakû numî̌ ahtûdû̌khlo ta kò hǒ.

5“Kòyò tapwa̤pwa̤ a kè̌ hemi̤sǎ dě a dè kaǎshǔ phijaû̌phû̌ lò̤ta htǒotapwa̤nu a kaǎshǔ he hǒ.”

(Mǎ̤riko 9:42-48; Lǔka 17:1-2)

6“Kòyò tapwa̤pwa̤ dè noma̤sǔ phijaû̌pî̌tî̌gutṳ̌ htě a yṳǎ he htǒotoǒ akla tapwa̤pwa̤ hî̌nu, co lo̤dû̌ a gobolo̤nu dě wîlò̤te̤kè yǎ shidû̌shite̤we̤kû numî̌ awǒkhlope nû̌ûya.

7“Ta̤ htě a hè lǒǎplò̤ǎ kòyò dě a noma̤sǔ kònu a ǒ toǒ. Hǐnu akhû̌akhî, Cǒmara cèròjî cèròjû kòyòhǎkhû̌phû̌ toǒ pě. Ta̤ htǒotoǒnu, a bǎ hè mè̤mè̤̌ pě. Pwǎ̤tadě Cǒmara cèròjî cèròjû kòyò htě a ma̤ htûhtò̌ ta̤ htǒotoǒ pě. 8Na cǔde bǎbǎ, na khò̌lopo̤ bǎbǎ, a dè noma̤ na ta̤sǔ hî̌dě pe̤tṳ yǎdě wîkè anu. Na cǔdetṳ na khò̌lopo̤tṳ dě na geginṳbò̌ mǒkhû̌nu awǒkhlope ta na cǔde khò̌lopo̤ ǒpṳ̂̌ dě Cǒmara wîlò̤te̤kè na mî̌kla tûjûpwa̤ talakhǎnu taphǎ akû pěnu. ^c 9Nami̤sǎ dè noma̤ na ta̤sǔ hî̌dě cîwîhtò̌kè yǎdě wîkè anu. Nami̤sǎ ǒpwǎ tokhopa dě na geginṳbò̌ mǒkhû̌nu awǒkhlope ta nami̤sǎ ǒpṳ̂̌bò ginǐ̤kho dě Cǒmara wîlò̤te̤kè na ngariǒkû pěnu.” ^d

Ta̤dǒnè khěkhǒ sophû̌ hǎmǎ tado awi̤akè̌

(Lǔka 15:3-7)

10“Ma̤pûhǐ sî gènè̤pî̌tî̌ pû phijaû̌pî̌tî̌gutṳ̌ dě kòkla htǒotoǒ tò̤nu, ǒsè̌rè̌ lǒkho sîna̤. Ma̤tè̤hî̌dě he hî̌ sî, asî mǒkhû̌tanaphû̌ htě a ǒpo̤kè̌ǐ nû̌û toǒnu a ǒphǔ ta pha Cǒmara dě mǒkhû̌nu pṳ̂̌꤮ taplǎ. ^e 11Ma̤tè̤hî̌dě, kòyòphû̌khû mî̌ hehtǒo, he hèlò̤ kaǎge kòyò htě a hǎmǎ toǒ pwǎ.

12“Sî gènè̤ kè̌kè̌, kòyò tapwa̤ dè sophû̌ ǒ ado ta̤ya̤, dě a dè cû̌ hǎmǎkè tado dèhî̌dě a glè bè̌kè ado lǐ̤sǒtishi ta lǐ̤sǒ tado htǒonu ashǎǎkhû̌ dě a hǎhtò̌cû̌ kè̌lǎ lòtṳ̌pwǎ a cû̌ hǎmǎkè htǒotadonupwǎ mè̤tò̤ ya? 13He hî̌ mè̤mè̤̌ sî, a dè kè̌shǐgesǒ a hǎmǎ htǒotado hî̌dě, a glè sò̌le̤sò̌lò̤khlope ta a ǒkè lǐ̤sǒtishi ta lǐ̤sǒ tado htě a cû̌pa̤ kû̌kò tò̤ htǒotoǒ. 14Sǒsǒtahǐnuhǒ, dě phijaû̌pî̌tî̌gutṳ̌ dě kòkla htǒotoǒnu, a yola glè sikèpwǎ tapwa̤ pwǎnu, sîpha dě mǒkhû̌htǒo tapwa̤ jû dî̌kî̌꤮ tò̤.”

Pṳwè̤ htě a ma̤sǔ ta̤

(Lǔka 17:3)

15“Na pṳwè̤ pwa̤yṳǎphû̌ tapwa̤pwa̤ dè ma̤sǔ na bò̌khòtè꤮ bǎbǎ, cû̌kè̌shǐ hî̌bǎ tû̌ yǎta a dě pwe̤ǐlṳ yǎta ta̤htě a ma̤sǔ nanu toǒ. A dè sò̌phlǒto kû̌ta na a dè olò̤ a ta̤ma̤sǔ dèhî̌dě na nî̤bǎ gesǒ na pṳwè̤htǒo tapwa̤ hǒ. ^f 16Pwǎ̤tadě a dè gana̤de nayo̤ tò̤ hî̌dě, na yṳ̂lṳ yǎta ata̤sǔ ǒ htǒonu, ma̤pûhǐ a guměguglo ayanudě, pwa̤lò̤ bǎ na sasî̌nu, a tobǎ ǒ sò̌gini̤, sò̌su bǎnu. Hǐnudě kaǎhènṳ kû̌kò tapwa̤, tò̤mî̌ sò̌gini̤nu. ^g 17A dè gana̤dekû̌ asîyo̤ tò̤ dèhî̌dě pwe̤ǐlṳ yǎta pwa̤yṳǎta̤ aprṳ̂ahophû̌nu toǒ, dě pwa̤yṳǎta̤ aprṳ̂ahophû̌ hî̌ nû̌û dě a dè gana̤de tò̤tò̤ dèhî̌dě hî̌bǎhî̌sho yǎ pwǐ sî bè̌ kòyò htě a yṳǎna̤ǎ kû̌kò tò̤ tapwa̤nu, tò̤mî̌ta hî̌bǎhî̌sho yǎ pwǐ pwa̤kwi ta̤kûta̤cî̌ tapwa̤nu.

18“He hî̌ mè̤mè̤̌ sî, hǎkhû̌bǎo sî coklomě hî̌tètè̌꤮ bǎbǎ, dě mǒkhû̌nu, Cǒmara coklomě tû̌ hǐnu pě. Dě hǎkhû̌bǎonu sî bòphlǔkè hî̌tètè̌꤮ bǎbǎ, Cǒmara bòphlǔkè tû̌ dě mǒkhû̌ pě. ^h

19“He hî̌po̤ bǎ sî, hǎkhû̌bǎonu, kòyò sò̌gini̤ dè sò̌phlǒ sǒsǒnû̌û hî̌dě a kwisaba ta̤hî̌tètè̌꤮ bǎbǎnu hepha dě mǒkhû̌ htǒotapwa̤ ǐbò asî kwinu toǒ pě. 20Mî̌ma̤tè̤hî̌dě, kòyò sò̌gini̤pwǎ bǎbǎ, sò̌supwǎ bǎbǎ, asî dè ǒhtuǒplǒ nû̌û ta hemi̤akû dèhî̌dě he ǒhtuǒplǒ kû̌ta asî pě.”

Ta̤dǒnè khěkhǒ jûphû̌ htě a gwèbǎǐjò kû̌kò tò̤ tapwa̤ awi̤akè̌

21Htodě Petru hè Běcǎ Ye̤shǔ a ǒ dě a gwè nû̌û, “Běcǎ, he pṳwè̤ tapwa̤ dè ma̤sǔ he hî̌dě he tobǎ bòlû̌ yǎ ta̤sǔ peplǎ tè? Mî̌ he bǎ bòlû̌be yǎ susǒtaplǎ ya?” ⁱ

22Dě Běcǎ Ye̤shǔ hî̌shǔ yǎ, “He hî̌ na ta bǎ bòlû̌pwǎ susǒtaplǎ mè̤tò̤, na bǎ bòlû̌be a susǒtishinu aplǎ susǒtaplǎ. ^j

23“Hǐnu akhû̌akhî, mǒkhû̌ shila̤gakûnu asǒsǒta Khwǐ tapwa̤ htě a sò̌yṳ ma̤lîkèbò a khwè̌mǎnǎ ajûphû̌ toǒ mi̤shû̌ ǒ nû̌ûnu toǒ. 24Dě bǎ a tèhtò̌ ma̤lî ajûphû̌ ami̤shû̌ toǒ akhanu, a nokaǎhè wǐgutṳ̌ ajûphû̌ htě ashû̌ǒ dû̌tûlû̌shû̌ nû̌û htǒonu tapwa̤. 25Dě ajûphû̌ htǒotapwa̤ plěbò̌ nû̌û tò̤ akhû̌akhî, aběcǎ hî̌lò̤ ta̤hî̌bǎ ta a bǎge shaǎlò̤kè ana̤ ta aphû̌ama ta a ta̤kî̌ta̤kû̌ lǒ̤꤮ bò dě a bǎ hè plělîkè ami̤shû̌.

26“Dě a gene̤lò̤ Khwǐ lo̤mo̤ dě a kwigwèbǎǐ nû̌û, ‘Khòsò̌do ǐkû̌nǎ pû he nî̌꤮. He plělîbòtû̌ na pě.’ 27Dě běcǎ htǒotapwa̤ gwèbǎǐ nû̌û dě a bè̌hto bǎkè nû̌ûshû̌ dě a plûgekè nû̌û.

28“Pò̤̌ta, jûphû̌ htǒotapwa̤nu, bǎ a hǎhtò̌ge akha a kè̌shǐ ta akho jûphû̌ sǒsǒta a dě ashû̌ǒ nû̌û wûtè̤jè htǒotapwa̤. Dě a pṳ̂měǐ nû̌û a cî nû̌û gobo dě a hî̌ nû̌û, ‘Na lo̤bǎǐ hewûnu ǐmò̌ he.’

29“Dě jûphû̌ htǒotapwa̤nu a gene̤lò̤ dě a kwigwèbǎǐ nû̌û, ‘Khòsò̌do ǐkû̌nǎ pû he nî̌꤮, he plělîbòtû̌ na pě,’ a hî̌ nû̌û hǐnu.

30“Pwǎ̤ta a gana̤de nû̌û ta̤kwigwèbǎ tò̤. A plělîbò̌ nû̌û hǒtò̤ dě a nodǒlò̤te̤kè kò apo̤kû. 31Dě jûphû̌ ahǔwa̤ toǒ kè̌shǐ a ma̤ kò hǐnudě asî sò̌phlǒmo̤pe dî̌kî̌꤮ tò̤. A ma̤kwè̌꤮ hî̌tènu asî cû̌pwe̤ǐbò nû̌ûta Khwǐnu tapwa̤.

32“Htǒotaplǎdě Khwǐnu tapwa̤ kaǎhè yǎ dě a hî̌ nû̌û, ‘Jû shodo sò̌phlǒ, na kwigwèbǎǐ he dě he bè̌htokèbò nami̤nashû̌ toǒ, 33Na to gwèbǎǐdǒ nakho jûphû̌ htě asǒsǒta na htǒonu pwǐ he gwèbǎǐ nanu, mè̤tò̤ ya?’ 34Khwǐ htǒotapwa̤ sò̌phlǒdû̌ mè̤mè̤̌ nû̌û dě bǎ a plělî nû̌û hǒtò̤ htǒonu a ǐlò̤kè nû̌û dě pwa̤ma̤jîma̤jû nû̌û htǒotoǒ a cǔdekû.”

35Dě Běcǎ Ye̤shǔ hî̌ gutṳ̌lò̤kè ta, “Sî dè bòlû̌ lǒ̤sû̌lǒ̤sò̌ mè̤mè̤̌ sî pṳwè̤ pwa̤yṳǎphû̌ tapwa̤ ta tapwa̤ ata̤sǔ tò̤ hî̌numî̌, pha Cǒmara dě mǒkhû̌ tapwa̤ ma̤ sǒsǒ sî hǐnu pě.”