Matthew 4:1-11
Khînǎmo̤pha hǐkǒdû̌ htû̌sǒbǎ phû̌mò̤ Běcǎ Ye̤shǔ
(Mǎ̤riko 1:12-13; Lǔka 4:1-13)
1Ma̤pûhǐ khînǎmo̤pha hǐkǒdû̌ htû̌sǒbǎ phû̌mò̤ Ye̤shǔ dě Běcǎ sǎcahtǐ sûcû̌ nû̌û dě lo̤měshǒkla. a 2Ye̤shǔ dǔǎshǎ ani̤li̤shi asali̤shi htodě a lòdǒ sǎǎsò̌o mè̤mè̤̌. 3Bǎnuakha khînǎmo̤pha hǐkǒdû̌ hè aǒ dě a hî̌ nû̌û, “Na mî̌ Cǒmara aphû̌khû tapwa̤ hî̌dě, hî̌lò̤ lo̤ htǒotama dě nohtûhtò̌ yǎta mû̌nu.” 4Pwǎ̤ta Ye̤shǔ hî̌ yǎ, “Lî̤cahtǐ hî̌pwǐhè̌o, ‘Kòyòhǎkhû̌phû̌ htûpwa̤ pwǎpǒ̤ ta shǎǎshǎonu mè̤tò̤. Ma̤pûhǐ kòyòhǎkhû̌phû̌ htûpwa̤ ayanu, Cǒmara ta̤hî̌bǎ lǒ̤꤮ bònu toǒ mî̌ a lo̤bǎdû̌ gutṳ̌.’” b 5Htodě khînǎmo̤pha hǐkǒdû̌ kaǎcû̌ Ye̤shǔ Yerǔshèlè wî̤cahtǐ dě a noihtǒ ǒ nû̌û bǎ ta̤lṳhtò̌ho hǐgukhû̌ htò̌yî̤gutṳ̌ to̤to̤. 6Dě a hî̌ nû̌û, “Na mî̌ Cǒmara aphû̌khû tapwa̤ dèhî̌dě, pe̤lò̤te̤ mò̌! Ma̤tè̤hî̌dě, lî̤cahtǐkû hî̌, ‘Cǒmara nokè̌ǐkhwè̌ǐ ma̤kwaǐ na ta a mǒkhû̌tanaphû̌ toǒ pě. Ma̤pûhǐ na khò̌lopo̤ bǎsha pû ta lo̤ tò̤nu, asî phǒhtò̌shǔtû̌ na pě.’” c 7Ye̤shǔ hî̌shǔ yǎ, “Lî̤cahtǐkû hî̌po̤ ta, ‘Na bǎ htû̌sǒbǎ phû̌mò̤ na Běcǎ Cǒmara tò̤.’” d 8Khînǎmo̤pha hǐkǒdû̌ kaǎcû̌ gesǒ nû̌û kholohtò̌yî̤ gutṳ̌ tama alo̤ dě a dǔlṳ nû̌û ta shiga pṳ̂̌tebě dě hǎkhû̌bǎo ta a ta̤sîrîdû̌sîrîhtû ta a ta̤dû̌yò̤htò̌sa toǒ. 9Khînǎmo̤pha hǐkǒdû̌ hî̌ Ye̤shǔ, “Na dè gene̤lò̤saba he dèhî̌dě, lǒ̤꤮ bò htǒotoǒnu he ǐbò yǎta na pě.” 10Htodě Ye̤shǔ hî̌ yǎ, “Khînǎmo̤pha hǐkǒdû̌꤮! Cû̌ tepheyî̤kè. Lî̤cahtǐkû hî̌, ‘Sabahtò̌ pwǎpǒ̤ na Běcǎ Cǒmara dě ma̤pwǎpǒ̤ ata̤ma̤ pwǎ nî̌,’” e A hî̌ hǐnu. 11Htodě khînǎmo̤pha hǐkǒdû̌ hǎhtò̌cû̌htokè nû̌gûla̤ dě, mǒkhû̌tanaphû̌ toǒ hèkè̌ǐkhwè̌ǐ ma̤jè nû̌û.
Copyright information for
KxfSCKRC