Phili 3 | KxfSCKRC | STEP | He pṳwè̤ sî, gutṳ̌lò̤nu, he sò̌yṳ hî̌ sî, sî htûhtò̌ kû̌ta Běcǎ Khrî̌stu tacǎnǔ꤮ pa htǒonu, sò̌le̤sò̌lò̤ lǒkhopû nî̌꤮. He khwè̌cû̌ bǎ gesǒ sî lî̤ htě asǒsǒta awǐkha toǒnu pwǎ pwǎ̤ta a dǐdònǒ he dǐcǎ꤮ tò̤. He khwè̌ htǒotoǒ numî̌ ma̤pûhǐ a ma̤kwaǐ bǎ sîyapwǎ.

Philippians 3

Ta̤cǒta̤tè̤ mè̤mè̤̌

1 He pṳwè̤ sî, gutṳ̌lò̤nu, he sò̌yṳ hî̌ sî, sî htûhtò̌ kû̌ta Běcǎ Khrî̌stu tacǎnǔ꤮ pa htǒonu, sò̌le̤sò̌lò̤ lǒkhopû nî̌꤮. He khwè̌cû̌ bǎ gesǒ sî lî̤ htě asǒsǒta awǐkha toǒnu pwǎ pwǎ̤ta a dǐdònǒ he dǐcǎ꤮ tò̤. He khwè̌ htǒotoǒ numî̌ ma̤pûhǐ a ma̤kwaǐ bǎ sîyapwǎ.

2 Ǒsè̌rè̌ lǒkho sîna̤ ta kòyò ma̤ ta̤phû̌mò̤shî̌hto htě asǒsǒta Chyǐnu toǒ nî̌꤮. Kòyònu toǒ mî̌ sî bǎ dǔtṳphě a noshobò kò hǐnu. 3 Pa mî̌ Cǒmara akòyò mè̤mè̤̌ toǒ, asînu toǒ mî̌ a mè̤mè̤̌ mè̤tò̤, ma̤tè̤hî̌dě Cǒmara a sǎcahtǐ akhû̌akhî, pa subusabahtò̌ Cǒmara dě pa hî̌bǎhtû̌sò̌ǐ ta̤htě Ye̤shǔkhrî̌stu ma̤hto bǎ pa htǒotoǒ hǒ. Ma̤pûhǐ pa nî̤bǎ ta̤ma̤lû̌htò̌ge ayanu, pa to nǎla̤ǐ ta̤htě pa ma̤ htǒotoǒ tò̤. 4 Pwǐ kò yṳǎ lǒkho kòna̤nu, he la̤yṳǎlò̤tû̌ hena̤ aǒ kò̌kò̌.

Kòyò toǒǒ dè gènè̤lè̌ ta ta̤wi̤ta̤kè̌ htě a yṳǎlò̤tû̌ ana̤nu a ǒ toǒ a dè gènè̤ hǐnuhî̌dě ta̤wi̤ta̤kè̌ htě he la̤yṳǎlò̤tû̌ hena̤nu, aǒ dû̌khlope ta hǐnu kò̌kò̌. 5 Bǎ he ǒphijaû̌lò̤ behtò̌ ni̤lǐ̤sǒ akhanu, kò dǔtṳ hephě. He htû Israelphû̌ dě he ǒphijaû̌lò̤ khanupe. ^a Hekhlihelè gilò̤ ta Bejame tṳmṳtacǎ, he mî̌ Ebrephû̌ na̤cè̌ tapwa̤. He mî̌ Pharisè̌phû̌ dě a gana̤de gûma̤kû̌ Yṳ̌daphû̌ a ta̤sû̌ta̤tòwò tapwa̤. ^b 6 Ma̤tè̤hî̌dě he sò̌phlosho bè̌dû̌bè̌htû mè̤mè̤̌ Cǒmara ata̤ma̤ akhû̌akhî, he ma̤jîma̤jû kòyò htě a yṳǎ Khrî̌stu toǒ. Dè hî̌lè̌ ta jûle̤phî̌yo̤ ta̤sû̌ta̤tòwò a ta̤mǎlò̤ toǒ dě htûhtò̌bò̌pwǎ kòyòcǒkòyòtè̤ dèhî̌dě, he htûhto kòyò tapwa̤ dě kò kè̌lǎ bè̌ he ta̤sǔnu, a ǒ dǐpwǎ̤ tò̤. ^c

7 Taplǎkha, ta̤ htě he bè̌ yǎta ale̤dû̌pwî̤htû mè̤mè̤̌ ta heya toǒnu, khònò̤dě he yṳǎ Khrî̌stu akhû̌akhî, ta̤ lǒ̤꤮ bò htǒotoǒnu he bè̌kè yǎ pwǐ ta̤ǒlû̌ǒkhlo ta heyanu pwǎ. 8 Tǒ̤nuhtohǒtò̤, khònò̤htǒo sǔ he sî̌yahè he Běcǎ Ye̤shǔkhrî̌stu htǒonu a le̤dû̌pwî̤htûkhlope ta ta̤ lǒ̤꤮ bò akhû̌akhî, ta̤ lǒ̤꤮ bò htǒotoǒnu, he bè̌kè yǎ pwǐ ta̤ǒlû̌ǒkhlo toǒnu pwǎ. Khrî̌stu aya akhû̌akhî, he wîkèbò pṳ̂̌꤮ tacǎ hǒ. Ma̤pûhǐ he nî̤bǎ Khrî̌stu dě he htûhtò̌ pû ta Khrî̌stu tacǎnǔ꤮ pa ayanu, ta̤ lǒ̤꤮ bò htǒotoǒnu, he gènè̤kè yǎ pwǐ ta̤wè̤ta̤sǒ toǒnu pwǎ. 9 He ta̤cǒta̤tè̤ htǒonu, he nǎla̤ǐpe ta he gana̤de gûma̤kû̌ ta̤sû̌ta̤tòwò akhû̌ htǒonu mè̤petò̤hǒ. Mî̌tanu, he yṳǎ Khrî̌stu akhû̌akhî, he nî̤bǎ ta̤cǒta̤tè̤. Ta̤cǒta̤tè̤ htě Cǒmara ǐ htǒonumî̌ a nǎla̤ǐpwǎ dě ta̤yṳta̤nǎ alo̤. 10 Ta̤ htě he sò̌yṳ sî̌yabò toǒ numî̌ pwǎpǒ̤ Khrî̌stu ta ata̤si htûpwa̤gesǒ a ta̤po̤ta̤phǎ htǒonu pwǎ. Dě he sò̌yṳ khòjîkhòjû kû̌dǒta a, dě he sò̌yṳ htûhtò̌ sǒsǒkû̌ta a khòsi ana̤ htǒonu pwǎ. 11 He sò̌yṳ htûhtò̌ sǒsǒkû̌ hǐnu, ma̤tè̤hî̌dě ma̤pûhǐ Cǒmara ma̤htûpwa̤gesǒ he ta ta̤si sǒsǒta htǒonu pě.

12 Ta̤htǒotoǒnu he nî̤bǎhtohǒ he hî̌nǒ hǐnutò̤, htodě he ta̤ǒhtûpwa̤ htǒonu, a lǒbebòhǒ he hî̌nǒ hǐnu tò̤tò̤. Pwǎ̤ta ma̤pûhǐ he sî̌ya Khrî̌stu dě he htûhtò̌ sělě sǒsǒkû̌ta anu, he jipwi̤ mè̤mè̤̌. Khrî̌stu wû̌lǎ he ta ta̤wi̤ta̤kè̌ htǒotoǒ akhû̌akhîhǒ. 13 Pṳwè̤ sî꤮, htǒotoǒ numî̌, he nî̤bǎhtohǒ he gènè̤ to̤nǒ hǐnu hǒtò̤. Pwǎ̤tadě he ma̤pwǎ tacǎpa. He ma̤ htǒotukǔ numî̌ he shope̤kè ta̤ htě a htonu toǒ, dě htû̌꤮ he hèto̤ dě kò bè̌ǒ ta̤ma̤pè̤htǔnu tacǎ a ǒ ayanu, he jipwi̤ mè̤mè̤̌. 14 Dě Ye̤shǔkhrî̌stu ma̤hto bǎ heya akhû̌akhî, Cǒmara kaǎnṳ he mǒkhû̌ dě he jipwi̤ sělě to̤htû̌ he nî̤bǎ ta̤ma̤khû̌kǎ dě mǒkhû̌ htǒonu pě. He lò̤ta kòyò ta̤khlè̌ tapwa̤ dě a glè nî̤bǎ kû̌kò ta̤ma̤khû̌kǎ ta a khlè̌ sělě to̤htû̌ agutṳnu tapwa̤ hǒ.

15 Bò꤮ pa htě a dû̌htò̌sî̌ya lǒkho sû̌sò̌ tokho htǒotoǒnu, pa to bè̌ sǒsǒ pa sò̌phlǒsǔshi pwǐ he hî̌bǎ sî htǒonu. Pwǎ̤ta sîkla toǒǒnu, a dè bè̌ kî̌yatû̌ a sò̌phlǒsǔshi dèhî̌dě, Cǒmara ǐ sî̌yaphlowǒtû̌ sî ta̤gènè̤ htě atonu toǒ pě. 16 Hî̌tètè̌ bǎbǎ, pa cû̌ plǒnû̌û dě alo̤mo̤ pwǐ pa sî̌yahtonu toǒ hò̌꤮.

17 He pṳwè̤ sî, kè̌mò̌mṳ lǒkho hehtǒo, gû kè̌nǎǐkû̌ kòyò htě a gû ǒhtûpwa̤ pwǐ pa ǒhtûpwa̤ lṳkè bǎ sî toǒnu. ^d 18 Dě awǐkhanu mî̌, he pwe̤ǐ sala̤ bǎ sî hǒ. Khònò̤htǒo he hî̌po̤ gesǒ bǎ sî ta mi̤sǎshi. Kòyò htě a bè̌ lǒkho a sò̌phlǒsǔshi ta a sò̌khěkhû̌khwè Khrî̌stu ata̤si amûasǎ dě nò̌dòhtǔlo̤ toǒnu a ǒplṳ̂. 19 Asî klè̌ htǒonu a gutṳkè bǎ ta̤pî̌ta̤lṳ̂ ngariǒkûnu pě. Asî Běcǎ mî̌ ana̤klû a ta̤sò̌le̤sò̌lò̤ htǒonu toǒ hǒ. Ta̤htě asî to sòwò̤ǐnu toǒ dě a phî̌htò̌yî̤ lǒkhope ana̤. Htohǒtò̤ asî gènè̤ còcè̌pwǎ ta̤ htě kòyòhǎkhû̌phû̌ gènè̤tû̌nu toǒ pwǎ. 20 Pwǎ̤ta pahtǒo toǒ numî̌ mǒkhû̌ a shiphû̌gaphû̌ dě pa sò̌phlosho ǒpo̤kè̌shuǐ pa Běcǎ Ye̤shǔkhrî̌stu htě a ma̤lû̌htò̌ge pahtǒo ǒ mǒkhû̌ hèlò̤ pě htǒonu tapwa̤ hǒ. 21 Ye̤shǔkhrî̌stu htû̌lè̌kè pana̤klû dě a khû̌ǎyû̌lò̤ a sijò htǒonu ta a ta̤po̤ta̤phǎ pě, dě a ma̤htûhtò̌ge pana̤klû htǒonu pwǐ ana̤klûtû̌ dě a ǒ ta a ta̤sîrîdû̌sîrîhtû htǒonu pě. A po̤phǎshû̌sho dě a ma̤jè nû̌û ta a pǒǐbò̌bò ta̤ lǒ̤꤮ bò htǒonu, a htû̌lè̌ tèplè̌kèbò pana̤klû htǒotoǒ pě.