Philippians 2

1Sî ta̤ǒhtûpwa̤ dě Khrî̌stu akû htǒonumî̌, a nî̤khû̌nî̤ǎ sî ya? Ata̤mo̤ǐ htǒonumî̌ a ma̤mo̤ sî sò̌phlǒ ya? Sî bǒsû̌khǎkho lǒkho ta Běcǎ sǎcahtǐ ya? Khrî̌stu htǒotapwa̤ numî̌ a ma̤wǒ sî, a gwèbǎǐ sî ya? 2Htodě, ǒ lǒkho ta ta̤gènè̤ tacǎ꤮ pa, ta̤mo̤ǐ nû̌û tacǎ꤮ pa, sò̌phlǒ tamapa ta ta̤yè̤lò̤nǎ tacǎ꤮ pa nî̌꤮. Sî dè ma̤mò̌hǐnumî̌ sî ma̤lǒma̤be bǎ he ta̤sò̌le̤sò̌lò̤ hǒ. 3Bǎ sî ma̤ta̤ akhanu, kè̌dû̌tû̌ pûma̤ sî tapwa̤ aya ma̤ nî̌꤮, phî̌dû̌phî̌htû pûma̤ sîna̤ ma̤, mî̌ta shò̌lò̤ lǒkho sî sò̌phlǒ dě tapwa̤ ta tapwa̤ ala̤ nî̌꤮, dě gènè̤dû̌khlo kòhǔwa̤ ta sîna̤ nî̌꤮. 4Kè̌lǎ tû̌pwǎ pûma̤ sî ta̤lo̤bǎ toǒ ayanu ma̤ nî̌꤮, gènè̤ to̤ bǎ kò tapwa̤ ta tapwa̤ aya nî̌꤮.

5Sî to bè̌ sǒsǒ lǒkho sî sò̌phlǒ pwǐ Khrî̌stunu.

6Khrî̌stu ǒ ta Cǒmara ala̤klo sǒsǒta Cǒmaranu hǒ pwǎ̤ta a gènè̤ bè̌gunò̤ ana̤ ta Cǒmara tò̤. 7Mî̌tanu, a wîkè a ta̤po̤ta̤phǎ ta Cǒmara agûla̤ toǒ, a wîkè ta̤pṳ̂̌tacǎ, dě a hèlò̤ sûlûana̤ sǒsǒta jû tapwa̤. Htohǒtò̤ a hèlò̤ sûlûana̤ pwǐ kòyòhǎkhû̌phû̌ tapwa̤nu. 8Dě a hè dǔlṳ ana̤ pwǐ kòyòhǎkhû̌phû̌nu, htodě, a bè̌phǔlò̤ ana̤ dě kòla̤. A gana̤de Cǒmara ayo̤, a sikè dě a bè̌ ta̤ dǐcǎ꤮ tò̤. To̤htû̌ a tobǎ si nò̌dòhtǔlo̤nu a jûle̤phî̌yo̤ pwǎ. 9Hǐnudě Cǒmara bè̌dû̌bè̌htû nû̌û a bè̌htò̌yî̤khlo nû̌û ta kò agûla̤ dě a ǐ nû̌û mi̤ htě adû̌khlo ta kòmi̤ pṳ̂̌꤮ tapwa̤nu. 10– 11Bǎ kò kaǎhtò̌ Ye̤shǔ ami̤ pěnu ta̤bǒlò̤ lǒ̤꤮ bò htě a ǒ dě mǒkhû̌ toǒnu bǎbǎ, dě hǎkhû̌ toǒnu bǎbǎ, dě lṳnǎkhwǎ ado toǒnu bǎbǎ, ma̤pûhǐ kòyò pṳ̂̌꤮ tapwa̤ hè gene̤lò̤ bè̌dubè̌na̤bò lǒkho dě Ye̤shǔ alo̤mo̤ pě. Htohǒtò̤ ma̤pûhǐ kòyò pṳ̂̌꤮ tapwa̤ olò̤bò lǒkho ta Ye̤shǔkhrî̌stu mî̌ Běcǎ tapwa̤ pě ta ma̤pûhǐ asî ma̤sîrîdû̌sîrîhtû lǒkho pha Cǒmara ta asî ata̤olò̤ hǐnu pě ayanudě, Cǒmara bè̌dû̌bè̌htû tû̌ Ye̤shǔ hǐnu hǒ. ^a

Dě hǎkhû̌ htǒonu sî lîhtò̌ pwǐ ta̤lî toǒnu pě

12Hǐnudě, khobǒsû̌bǒmo̤ sî꤮ bǎ he ǒkû̌ tû̌ta sî akhanu, sî gana̤de he yo̤, khònò̤htǒo he ǒyî̤ ta sî akhû̌akhî, sî tobǎ gana̤dekhlope heyo̤. Ma̤pûhǐ sî ma̤lǒma̤behtò̌ ta̤ma̤lû̌htò̌ge sî ayanu, jipwi̤ ma̤ lǒkho ta̤ dě ta̤bè̌dubè̌na̤ Cǒmara akû, dě ma̤ yǎta ta̤ǐsha gònò̤gèglè anu nî̌꤮. 13Ma̤tè̤hî̌dě, ma̤pûhǐ sî sò̌phlosho sò̌yṳ gana̤de gûma̤kû̌ pwǐ Cǒmara a ta̤sò̌yṳ htě awǒ toǒ ayanu, a ma̤ ta̤ dě sîkû pṳ̂̌꤮ taplǎ hǒ.

14– 15Ma̤pûhǐ sî htûhtò̌ kòyò mṳ̂plî dě kò hèbè̌ ta̤sǔ sîlo̤ ǒpe pû tò̤, htohǒtò̤ ma̤pûhǐ sî bǎ htûtû̌ Cǒmara a phû̌mǔphû̌khû htě ata̤sǔ ǒtò̤ toǒnu, dě bǎ sî ǒhtûpwa̤ kòyò phû̌mò̤ cǒtè̤tò̤ htǒotoǒ akla htǒoakha, ma̤pûhǐ sî lîrakhahtò̌ bǎ kò pwǐ shǎtoǒ dě hǎkhû̌tebě htǒoayanu, sî ma̤ta̤ hî̌tètè̌꤮ bǎbǎ, tṳ̂mṳ̂ta̤ma̤ lǒkho pûma̤ nî̌꤮. ^b 16Dǒhtû̌ǐ lǒkho kòyò ta̤htûpwa̤ awi̤akè̌ htǒonu nî̌꤮. Sî dè ma̤hǐnumî̌ bǎ Khrî̌stu hèlò̤ gesǒ amṳni̤ pě ti̤ni̤nu, he ta̤jipwi̤ lǒ̤꤮ bò toǒ ta he ta̤phî̌ta̤ma̤ htǒotoǒnu a htûhtò̌ nòdû̌pe tò̤, sîkhû̌sîkhî dě he phî̌htò̌yî̤ hena̤ pě. 17He dǒhtû̌ǐ ta̤sò̌le̤sò̌lò̤ awi̤akè̌ akhû̌akhî, kǎlè̌mî̌ he si pě ya. Bǎ sî yṳǎ ta̤sò̌le̤sò̌lò̤ awi̤akè̌ akhanu, sî ǐlò̤ sî ta̤htûpwa̤ dě Cǒmara a ǒ sǒsǒta pwa̤lṳhtò̌ta̤ lṳhtò̌ ta̤phû̌ta̤li̤ dě Cǒmara ǒnu hǒ. Kò dè ma̤si he hî̌dě, hesǐ glè sǐlò̤ sǒsǒta pwa̤lṳhtò̌ta̤ tapwa̤ lò̌lò̤ sî̌yo̤ dě hǎkhû̌ dě asǒsǒta kò lṳhtò̌ ta̤lṳta̤tò̌nu. A dè htûhtò̌ hǐnu hî̌dě he sò̌le̤sò̌lò̤, sò̌le̤ kû̌bò ta sî pṳ̂̌꤮ tapwa̤ pě. 18Sî bǎbǎ, sî to sò̌le̤sò̌lò̤, sò̌le̤ kû̌dǒ lǒkho ta hehe.

Timò̤̌te ta Ěpaprò̌dǐtǔ

19Ma̤pûhǐ he sî̌ya sîwi̤sîkè̌ dě a ǐkhû̌ǐǎ ma̤mo̤htò̌po̤to̤ he sò̌phlǒ pě ayanu, a dè to Běcǎ Ye̤shǔ asò̌phlǒ hî̌dě he nohèphwè bǎ sî Timò̤̌te sî ǒ pě dě a ge pwe̤ǐlṳ he pě. 20Asò̌phlǒ ǒ mè̤mè̤̌ sî hǒ. Kòyò htě a ǒkû̌bò ta he bǎo toǒ dě asǒsǒ nû̌ûnu he kè̌shǐnǒ dǐpwǎ̤꤮ tò̤. 21Kòyò ahǔwa̤ lǒ̤꤮ bò toǒ numî̌ a kè̌lǎ ma̤ lǒkho pwǎpǒ̤ ta̤ htě a htûbwǐhtûsîrî asî ayanu toǒ pwǎ. A kè̌lǎ ma̤ bǎ lǒkho Ye̤shǔkhrî̌stu aya tò̤. 22Sî sî̌yatû̌ hǒ, Timò̤̌te mî̌ kòyò le̤dû̌pwî̤htû tapwa̤. A ma̤kû̌ ta̤ ta he dě ta̤sò̌le̤sò̌lò̤ awi̤akè̌ glè dû̌htò̌htûhtò̌ aya htǒonumî̌ asǒsǒta phû̌ ta phanu hǒ. 23Hǐnudě htû̌꤮ he sî̌ya ta ta̤htûhtò̌ ana̤ ta he bǎo hî̌tè pě akhanu, he kè̌shuǐ ta he nohèlò̤phwè Timò̤̌te dě sî ǒ pě. 24Ǒyî̤tò̤ pěnu, he yṳǎ ta Běcǎ ma̤jè he pě dě he sana̤, he hèto̤bò̌ dě sî ǒ pě.

25He to nogetîkhî bǎ sî Ěpaprò̌dǐtǔ dě sî ǒ he gènè̤ hǐnu. A mî̌ he pṳwè̤ tapwa̤, a mî̌ kòyò htě a ma̤htuhto ta̤ ta he dě a shě plǒhtukû̌hto ta̤ ta he. A mî̌ kòyò htě a sû bǎ sî lî̤nu tapwa̤ dě ma̤pûhǐ a ma̤jè he ta̤lo̤bǎ toǒnu dě sî nohè yǎ dě he ǒnu tapwa̤ hǒ. 26Mî̌ma̤tè̤dě sî gana̤de ta Ěpaprò̌dǐtǔ ǒmo̤ǒwǒ tò̤ akhû̌akhî, a nǎsǔ kè̌shǐ mè̤mè̤̌ sî pṳ̂̌꤮ tapwa̤ dě a gènè̤gugè mè̤mè̤̌ ta sîya. Hǐnudě he nogetîkhîsǒ yǎ dě sî ǒ. 27A shǐasha mè̤mè̤̌ nî꤮, a glè phǔsi tînî̌ hǒ. Pwǎ̤ta Cǒmara gwèbǎǐpe yǎ, dě a gwèbǎǐtû̌ nû̌û mè̤tò̤, a gwèbǎǐdǒpe he. Ma̤tè̤hî̌dě a dè simò̌nu, he nî̤bǎkhlopo̤ ta̤sǎpla̤ pě. 28Hǐnudě, htû̌꤮ sî kè̌shǐ yǎ pě dě, ma̤pûhǐ sî sò̌le̤sò̌lò̤ gesǒ pû, htohǒtò̤ ma̤pûhǐ he sò̌phlǒgugè yǎkhè̌ hèto̤pě ayanu, he tǐ̤ sò̌phlǒ shû̌khlopo̤ ta he nogetîkhî yǎ dě sî ǒ pě. 29Hǐnu akhû̌akhî, kaǎshǔwǒ lǒkho yǎ pwǐ pṳwè̤ htě a yṳǎ Běcǎ tapwa̤nu nî̌꤮. Kaǎshǔ yǎta ta̤sò̌le̤sò̌lò̤ dě bè̌dubè̌na̤ kòyò htě asǒsǒta anu toǒ nî̌꤮. 30Ma̤tè̤hî̌dě, sî ma̤jèbò̌ he tò̤ akhû̌akhî, ma̤pûhǐ a ma̤jè he, dě Khrî̌stu a ta̤phî̌ta̤ma̤ ayanu, a ǒphǔ ta ta̤si hǒ.