Psalms 101
Khwǐdû̌ ata̤olò̤
Khwǐdǎ̤wi̤ ata̤sò̌po̤ htû̌sò̌ǐ
1Kǒ Cǒmara tûjûpwa̤, he glè sò̌po̤htò̌ nata̤mo̤ǐ htě ahǎbòjò tò̤ ta nata̤ma̤toma̤bǎ. He glè sò̌po̤ htû̌sò̌ǐ na. 2Ma̤pûhǐ he lû̌kè ta bè̌ heta̤sǔ ayanu, he glè sè̌rè̌ǐ heta̤ǒhtûpwa̤. Na hèkû̌ he htû̌꤮ bò̌hòtè pě? He glè ǒhtûpwa̤ lû̌kè ta bè̌ ta̤sǔ dě hehǐkû. 3La̤lòhǎlòho kò ayanu, he gènè̤to̤pe nòtò̤. He sò̌khě kòyò htě a cǒtè̤kû̌nǒ ayo̤ tò̤. Hesò̌phlǒ glè̌ sǒsǒkû̌ta asînu aǒ dǐcǎ꤮ tò̤. 4He glè ǒtepheyî̤kè ta kòyò htě asò̌phlǒkě. He glè ma̤htu kû̌ ta̤ ta kòyò sò̌phlǒphû̌mò̤shî̌hto tò̤. 5He glè ma̤pî̌kè kòyò htě a dǒhǔdǒsè̌ ahǐphòkòshî̌ ayo̤. Kòyò htě a bè̌dû̌ ana̤, a bè̌htò̌yî̤ asò̌phlǒ toǒnu, he sò̌phlǒhtû nǒ asî tò̤. 6He kè̌lǎ kòyò htě he yṳǎ yǎ dě gakûhtǒo pě. He noǒhtukû̌ asî ta he pě. Kòyò htě a ǒhtûpwa̤ lû̌kè ta bè̌ ta̤sǔ toǒnu, he noma̤ asî ta heta̤ma̤ pě. 7Kòyò htě a hî̌bǎ tikhlǐkhû̌ tikhlǐkò ayo̤ toǒnu, a bǎ nṳǒkû̌ hehohtakû tò̤. Kòyò htě a hî̌bǎ lòhǎlòho ta̤ toǒnu, bǎ nṳǒ dě helo̤mo̤ dǐpwǎ̤꤮ tò̤. 8Pṳ̂̌wo̤wo̤꤮ he ma̤pî̌kèbò kòyòphû̌mò̤nu toǒ bǎ gakû htǒonu pě. He wṳ̂htò̌kèbò kòyò htě a ma̤ ta̤phû̌mò̤shî̌htonu toǒ dě Cǒmara tûjûpwa̤ awî̤khlo pě.
Copyright information for
KxfSCKRC