Psalms 103

Cǒmaradû̌ ata̤mo̤ǐ

Khwǐdǎ̤wi̤ ata̤sò̌po̤ htû̌sò̌ǐ.

1He htû̌sò̌ǐ Cǒmara tûjûpwa̤.

He htû̌sò̌ǐ ami̤ cahtǐ htǒo ta hesò̌phlǒsamabò.

2He htû̌sò̌ǐ Cǒmara tûjûpwa̤ ta hesò̌phlǒsamabò.

Lǒ̤꤮ bò ta̤wǒ htě a ma̤hto bǎ he toǒnu, he shope̤nǎpè̤pe tò̤.

3A bòlû̌kèbò heta̤sǔta̤plě lǒ̤꤮ bò.

A ma̤hǎmǎkèbò heta̤shǐta̤sha pṳ̂̌꤮ tacǎ.

4A htè̌ge he dě ta̤si akla.

Ata̤mo̤ǐ htě ahǎbòjò tò̤ ta ata̤gwèbǎǐ glûbǐ hehǐkǒ lò̤ta khû̌glûnu hǒ.

5A bè̌mo̤ hesò̌phlǒ ta ta̤wî̤ta̤wǒ.

He phû̌sǎ khû̌ǎshû̌sho sǒsǒgesǒta le̤dû̌cǎsò.

6Cǒmara tûjûpwa̤ cèròcǒ cèròtè̤, cèròto cèròbǎ lǒ̤꤮ bò kòyò htě kò ma̤jîma̤jû yǎnu toǒ.

7Ata̤yè̤lò̤nǎ sîtoǒ, a dǔlṳ sî̌ya ta Mǒ̤jè.

Ata̤phî̌ta̤ma̤ sîtoǒ, a dǔlṳ sî̌ya ta Israelkhlilèphû̌.

8Cǒmara tûjûpwa̤ mî̌ a gwèbǎǐ kò, a ma̤bwǐma̤sîrî kò.

A sò̌phlǒhtû, a lǒbe ta ta̤mo̤ǐ htě ahǎbòjò tò̤. ^a

9A bè̌ sayè̤ kò ta̤sǔ tò̤, a sò̌phlǒdû̌ sayè̤ nǒ kò tò̤.

10Pwǐ pata̤sǔta̤plě ǒ dě pa gwata khòbǎnu, a nokhòbǎ pa tò̤.

Pwǐ pa ma̤sǔ ta̤nu, pa to khòbǎ pwǎ̤tadě a ma̤ geshǔ pa ta ali̤ tò̤.

11Pwǐ mǒkhû̌ ǒhtò̌yî̤khlo ta hǎkhû̌nu, Cǒmara ata̤mo̤ǐ htě ahǎbòjòtò̤ htǒo, adû̌ahtûkhlo mè̤mè̤̌ ta kòyò ǐsha bè̌dubè̌na̤ nû̌ûnu toǒ aya.

12Cǒmara wîtepheyî̤kèbò pata̤sǔ toǒ lò̤kèta lṳmṳhtò̌ ta lṳmṳlò̤ ǒtepheyî̤ kè̌khînû̌ûnu.

13Pwǐ꤮ pha gwèbǎǐ aphû̌ toǒnu, Cǒmara tûjûpwa̤ gwèbǎǐ pwa̤ htě a ǐsha bè̌dubè̌na̤ nû̌ûnu toǒ.

14Pana̤klûhtǒo kò bǒ yǎ hî̌tènu, a sî̌yabò.

Pa mî̌ lo̤hǎ pwǎnu a shope̤nǎ tò̤.

15Kòyòhǎkhû̌phû̌ amṳni̤mṳsa htǒonu, a phǒ sǒsǒpwǎta mi̤mṳ.

Pa sǒsǒpwǎta ta̤pho htě a phohtò̌ dě ya̤dakhû̌nu toǒ pwǎ.

16Bǎ gili̤sǎ hèhtû̌bǎ asî akhanu, apho toǒ nûhǎmǎkèbò, a gûla̤ ǒkèpe tò̤.

17Pwa̤ htě a ǐsha bè̌dubè̌na̤ Cǒmara tûjûpwa̤ toǒ aya lè̌dě, ata̤mo̤ǐ htě ahǎbòjò tò̤nu a ǒměǒgle tûjûpwa̤ talakhǎ.

Ata̤cǒta̤tè̤ toǒnu a ǒměǒgle sělě to̤htû̌ aphû̌ali̤ alṳ̂ala̤ sîtoǒ tuhtu hto tuhtu.

18Htohǒtò̤ a ǒměǒglepo̤ bǎ pwa̤ htě acǒtè̤ ta Cǒmara ata̤wṳ̂dònu toǒ ta pwa̤ htě a gana̤de jûle̤phî̌yo̤ nû̌ûta̤sû̌ta̤tòwònu toǒ aya.

19Cǒmara tûjûpwa̤ bè̌ǒǐ agògohtahtò̌yî̤ dě mǒkhû̌.

A htû Khwǐ bǎnu dě a pǒǐbò ta̤ pṳ̂̌꤮ tacǎ.

20Kǒ mǒkhû̌tanaphû̌ htě ashû̌asho, a gana̤de nû̌ûta̤sû̌ta̤tòwò, a jûle̤phî̌yo̤ nû̌ûyo̤ toǒ꤮, htû̌sò̌ǐ lǒkho Cǒmara tûjûpwa̤.

21Lǒ̤꤮ bò mǒkhû̌tanaphû̌ akliprṳ̂hodû̌ htě a ma̤ to Cǒmara asò̌phlǒ lǒ̤bò toǒ꤮, htû̌sò̌ǐ lǒkhomò̌ Cǒmara tûjûpwa̤.

22Lǒ̤꤮ bò a bǒlò̤ nû̌û toǒ ta lǒ̤꤮ bò a pǒǐ gûla̤ pṳ̂̌꤮ tò̤glò toǒ꤮, htû̌sò̌ǐ lǒkhomò̌ Cǒmara tûjûpwa̤.

He htû̌sò̌ǐ Cǒmara tûjûpwa̤ ta hesò̌phlǒsamabò.