Psalms 104

Htû̌sò̌ǐ Cǒmara pwa̤bǒlò̤ta̤

1He htû̌sò̌ǐ Cǒmara tûjûpwa̤ ta hesò̌phlǒsamabò.

Kǒ Cǒmara tûjûpwa̤, hecǒmaradû̌, na mî̌ adû̌ayǒ mè̤mè̤̌.

Na kûsǒhtò̌nṳ ta̤sîrîdû̌sîrîhtû ta ta̤lîta̤rakha.

2Na kûsǒhtò̌ǐ ta̤lî pwǐ kò kûsǒhtò̌ hǐdo.

Na cǐtadǎ mǒla̤ pwǐ kò cǐtadǎ hǔgò.

3Na ma̤htò̌ nahǐ dě poǒlṳkhû̌.

Na noǎǐ poǒlṳ pwǐ natîsî̌lo̤.

Na dò̌cû̌ǐ gili̤ aděge.

4Na nohtûhtò̌ gili̤ pwǐ natanaphû̌nu.

Na nohtûhtò̌ mî̌gèrosho pwǐ napwa̤ma̤ta̤phû̌nu. ^a

5Na ma̤htò̌ hǎkhû̌ akòshî̌kòtṳ dě a guyṳjòpe tò̤ hǒ.

6Na hǔbǐ hǎkhû̌ ta shidû̌shite̤we̤ pwǐ kò hǔbǐ nû̌ûta hǐdopo̤to̤.

Shi toǒ dû̌htò̌ to̤ dě kholo akhi.

7Na sǎhtǎ dě shidû̌cû̌ tephekèbò hǒ.

A gana̤de na tî̌lî̌ dě a tṳplutî̤wî̤ hǎhtò̌khlè̌cû̌ phwèkèbò hǒ.

8Na nohtûhtò̌plǔhtò̌bò kholo, na nolòte̤nṳyo̤ lo̤to̤kû.

A htûhtò̌bò pwǐ na sò̌yṳ nohtûhtò̌ asî dě agûla̤ ta agûla̤nu.

9Ma̤pûhǐ shidû̌bǐjò hǎkhû̌ tò̤nu, na ma̤dǐdònǎkè bǎ asîgaku.

10Na nodû̌lò̤bò shiklophû̌ dě lo̤to̤nṳyo̤ akû.

Shidû̌cû̌ lǒkho bǎ shǒdeshǒplǎ.

11Shilo̤ htǒotoǒ ǐpa̤ lǒ̤꤮ bò ta̤phû̌ta̤li̤ shila̤o.

Mòû̌lǎmi̤ sîtoǒ okǒobebò shi.

12Htû̌phû̌ yṳphû̌ dě mǒla̤ ma̤ apli̤ bǎ shiklohtu.

A po̤htò̌ dě sǒdû̌khi.

13Na ǒ dě nahǐmǒkhû̌, na nojulò̤ khwè̌ dě kholo toǒ akhû̌.

Hǎkhû̌nu a lǒbebò ta na ta̤howi̤hî̌wǒ.

14Na nodǒhtò̌ mi̤mṳ ta ta̤phû̌ta̤li̤ aya.

Na nophǎhtò̌ sǒdosǒlǎ ta kòyòhǎkhû̌phû̌ la̤ǎ aya.

Asî shǒ sǎhtò̌phohtò̌ ǐjòpo̤ sǒsǎwû̌pho bǎ hǎkhû̌.

15Asî nî̤bǎsobîshisî̌yo̤ dě a ma̤mo̤ kòyòhǎkhû̌phû̌ sò̌phlǒ, htǒshi dě a ma̤ya̤ asî, ta shǎǎshǎo dě a ǐ asî ta̤khû̌ta̤ǎ.

16Cǒmara tûjûpwa̤ shǒǐ sǒmṳdû̌sǒmṳtònò dě Lebanokhololo̤, a nî̤bǎ lǒbe khwè̌shi.

17Htû̌phû̌ toǒ ma̤ apli̤ dě sǒmṳnu toǒ alo̤.

Htû̌shiphabûdû̌ toǒ ma̤ ala̤ǒ gûla̤ dě sǒmṳdû̌sǒmṳtònò akla.

18Kholodû̌kholohtû mî̌ pè̤mi̤ la̤ǒtûdû.

Lo̤dû̌lo̤htû mî̌ phwǐ la̤ǒhǔ akû.

19Na bǒlò̤ la ta la̤ma̤dòǐ khwè̌jugagû akhîakha.

Lṳmṳnu a tobǎ lò̤ bò̌khòtènu, a sî̌ya tû̌.

20Na bǒlò̤ ta̤khǐ, a htûhtò̌ lṳmṳkhǐ.

Lǒ̤꤮ bò ta̤phû̌ta̤li̤ dě mi̤kla hǎhtò̌cû̌ǒlè bǎnukha.

21Sî̌ò̌ tolo la̤pṳ̂ǎ ashǎ, agoakrû̌ lǒkho.

A kè̌lǎ ashǎ la̤ǎ htě Cǒmaradû̌ ǐnu.

22Bǎ lṳmṳlîbû hèhǒ akhanu, asî gesǒ, a gehǎmoǒsǒ dě akû.

23Kòyòhǎkhû̌phû̌ hǎhtò̌cû̌ ma̤ta̤ma̤, a ǎwè̤ to̤htû̌ lṳmṳhǎlò̤.

24Kǒ Cǒmara tûjûpwa̤, na ma̤ta̤ toǒnu a ǒplṳ̂꤮ mè̤mè̤̌.

Na bǒlò̤ ta̤nu toǒ lǒ̤꤮ bò ta ta̤sî̌ta̤jò.

Hǎkhû̌htǒo aǒbebò ta nata̤bǒlò̤ta̤.

25Shidû̌shite̤we̤ htǒomî̌ adû̌alè̤.

Ta̤bǒlò̤ adû̌dû̌ apî̌tî̌tî̌ htě a yò̤cû̌ dě shikla toǒnu dǒbòpè̤pe tò̤, a ǒbò lǒkho bǎnu.

26Sǒkhlidû̌ toǒ cû̌gecû̌hè bǎnu.

Tò̤phû̌dû̌ Lawǐta htě na bǒlò̤ yǎ htǒonu a pe̤ lò̤we̤lò̤so mo̤ bǎnu. ^b

27Ma̤pûhǐ na ǐbò꤮ ta̤phû̌ta̤li̤nu toǒ ashǎǎshǎo akhîakha ta akhîakha ayanudě, asî kè̌shuǐ dě naǒ.

28Bǎ na ǐlò̤ asî shǎǎshǎo akhanu, asî nî̤bǎbò.

Bǎ na yṳ̂lò̤ asî shǎǎshǎo akhanu, asî sò̌phlǒmo̤bò.

29Bǎ na kè̌khǒkè akhanu, asî ǐsha sò̌gònò̤bò.

Bǎ na phî̌htò̌kè asîsò̌htûpwa̤ akhanu, asî sikè, a htûbò gesǒ lo̤hǎ.

30Bǎ na sûhè bǎ asî nata̤htûpwa̤ akhanu, na bǒsa tèplè̌khǒkè asî.

Na ma̤sawǒ gesǒ hǎkhû̌.

31Cǒmara tûjûpwa̤ asîrîdû̌sîrîhtû ǒlo̤lo̤ tû̌ta tûjûpwa̤ talakhǎ nî̌.

Cǒmara tûjûpwa̤ sò̌le̤sò̌lò̤ tû̌ta ata̤phî̌ta̤ma̤ htǒo nî̌.

32Na kè̌lò̤ hǎkhû̌ dě a guyṳ.

Na tè̌wa̤ pwǎ kholo dě mî̌khǔ toohtò̌.

33He glè sò̌po̤htò̌ Cǒmara tûjûpwa̤ to̤htû̌ he si.

Bǎ he ǒhtûpwa̤pe akhanu, he glè sò̌po̤ htû̌sò̌ǐ hecǒmaradû̌.

34Pwa̤ htě a ma̤mo̤ hesò̌phlǒ mî̌ aǒ pǒ̤꤮ na pwǎ.

Heta̤hî̌bǎ toǒ totû̌ta Cǒmara tûjûpwa̤ asò̌phlǒ nî̌.

35Ta̤ma̤sǔphû̌ pî̌kèbò tû̌ta dě hǎkhû̌ nî̌.

Kòyòphû̌mò̤ hǎmǎkèbò tû̌ta tûjûpwa̤ nî̌.

He htû̌sò̌ǐ Cǒmara tûjûpwa̤ ta hesò̌phlǒsamabò.

Htû̌sò̌ǐ Cǒmara tûjûpwa̤.