Psalms 140
Ta̤kwisaba ta la̤ma̤kwaǐ aya
Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.
1Kǒ Cǒmara tûjûpwa̤, ma̤lû̌htò̌ge he dě kòyòphû̌mò̤ toǒ acǔdekû. Ma̤kwaǐ he dě pwa̤ma̤jîma̤jû kòyò toǒ acǔdekû. a 2Asî gènè̤ma̤ còcè̌꤮ ta̤phû̌mò̤shî̌hto. Pṳ̂̌ni̤ni̤ a ma̤htûhtò̌ còcè̌ ta̤shěta̤pe̤. 3Asîplî̤nu asǒsǒ ta wṳ̂sa. Asî ta̤hî̌bǎ toǒnu awè̤ lò̤kèta wṳ̂sa pè̌ kòyò dě awè̤htò̌. b 4Kǒ Cǒmara tûjûpwa̤, kòyòphû̌mò̤, pwa̤ma̤jîma̤jû kòyò toǒ shokhû̌ye̤yo̤ ma̤pò̤ma̤sha he akhû̌akhî, ma̤kwaǐ he. 5Kòyò phî̌dû̌phî̌htû ana̤ toǒ dò̌nǎhǔ he ta sumṳ. Asî dò̌nǎbò htò̌glo dě he la̤cû̌ klè̌nu tobo akû. Asî dò̌nǎ cû̌꤮ sumṳ dě klè̌lo̤. c 6He hî̌ Cǒmara tûjûpwa̤ ta, “Na mî̌ hecǒmara.” Kǒ Cǒmara tûjûpwa̤, gana̤de kû̌ he kwihtò̌ nata̤ma̤jè. 7Kǒ Cǒmara tûjûpwa̤, he Běcǎ ta̤adû̌, na mî̌ pwa̤ma̤lû̌htò̌ge he ta apo̤phǎshû̌sho. Na ma̤kwaǐ he dě ta̤shěta̤pe̤ akû. 8Kǒ Cǒmara tûjûpwa̤, plû ma̤pû kòyòphû̌mò̤nu toǒ pwǐ a sò̌yṳma̤nu ma̤. No dû̌htò̌htûhtò̌ pûma̤ asî ata̤tîwî̌nu toǒ ma̤, pěmî̌ asî phî̌dû̌phî̌htû ana̤ pě. 9No ma̤pè̤kè pûma̤ pwa̤sò̌khě he toǒ ma̤. Asî hî̌ sò̌gònò̤ ǐsha he toǒnu nokhòbǎ gesǒ tû̌ asî. 10No lò̤te̤ tû̌ mî̌klû̌ gèrosho dě asîlo̤. Kò glè wîlò̤nṳkè asî dě mî̌kû mè̤tò̤mî̌ dě hǎkûyo̤nu nî̌. No ihtǒbò̌pe pûma̤ asî ma̤. 11Bǎ hǎkhû̌bǎo, noǎbǎǒbǎ pûma̤ kòyò htě a hî̌jîhî̌jû kònu toǒ ma̤. No ma̤pî̌kè mò̌ pwa̤ma̤jîma̤jû kònu toǒ ta ta̤pî̌ta̤lṳ̂dû̌nu. 12He sî̌ya ta Cǒmara tûjûpwa̤ ma̤jè kòyò htě kò ma̤jîma̤jû asînu toǒ. A ma̤toma̤bǎ bǎ kòyò htě a shodo pwa̤ma̤jè toǒ. 13Kòyòcǒkòyòtè̤ toǒ glè htû̌sò̌ǐ mè̤mè̤̌ nami̤. Asî ǒhtûpwa̤ tû̌ta dě nalo̤mo̤.
Copyright information for
KxfSCKRC