Psa 143 | KxfSCKRC | STEP | Khwǐdǎ̤wi̤ ata̤sò̌po̤ htû̌sò̌ǐ. Kǒ Cǒmara tûjûpwa̤, gana̤de kû̌ heta̤kwisaba, heta̤kwigwèbǎǐhtò̌ na ta̤ma̤jè htǒo. Nacǒtè̤ ta nayo̤, na ǒ ta ta̤cǒta̤tè̤ akhû̌akhî, kǒshǔ mò̌ he.

Psalms 143

1 Kǒ Cǒmara tûjûpwa̤, gana̤de kû̌ heta̤kwisaba, heta̤kwigwèbǎǐhtò̌ na ta̤ma̤jè htǒo.

Nacǒtè̤ ta nayo̤, na ǒ ta ta̤cǒta̤tè̤ akhû̌akhî, kǒshǔ mò̌ he.

2 No to̤ pûma̤ napwa̤ma̤ta̤phû̌ mî̌ he htǒo dě ta̤cèrògûla̤ ma̤.

Dě nalo̤mo̤nu, kòyòcǒkòyòtè̤ ǒ dǐpwǎ̤꤮ tò̤. ^a

3 Pwa̤sò̌khě he toǒ lṳ̂pṳ̂ he dě a shò̌lòkhǔpo̤ he. ^b

A noǒhtûpwa̤ he dě ta̤khǐta̤lo̤kla sǒsǒta kòyò htě a sihto yî̤nu toǒ. ^c

4 He sò̌phlǒpî̌ jî mè̤mè̤̌.

Asò̌gònò̤ ǐsha mè̤mè̤̌ he dě he gònò̤gèglè. ^d

5 He gènè̤htò̌nṳ mṳni̤mṳsa htě atûlû̌htonu toǒ.

He gènè̤ǐ lǒ̤꤮ bò ta̤ htě na ma̤htonu toǒ. ^e

He gènè̤ te̤mǎ lǒ̤꤮ bò ta̤ htě na ma̤ yǎta nacǔdenu toǒ.

6 He yṳ̂htò̌ hecǔde dě he kwisaba. ^f

He kè̌shuǐ na lò̤kèta hǎkhû̌khwedè̌htè̌ kè̌shuǐ khwè̌junu. ^g

7 Kǒ Cǒmara tûjûpwa̤, he sò̌phlǒpî̌ mè̤mè̤̌ akhû̌akhî, kǒshǔ mò̌ he.

Kè̌khǒkè pûma̤ he ma̤. Dèmè̤tò̤ hî̌mî̌, he sǒsǒkè pwǎ ta kòyò htě a lòte̤ dě lṳnǎkhwǎdokûnu tapwa̤. ^h

8 He nǎla̤ǐ dě naǒ akhû̌akhî, pṳ̂̌wo̤wo̤꤮ ǐ gènè̤htò̌ he ta nata̤mo̤ǐ htě ahǎbòjò tò̤nu. ⁱ

He ǐlò̤ hena̤ dě nacǔdekû hǒ akhû̌akhî, he tobǎ ma̤ hî̌tènu yṳ̂klè̌nè̌klò he.

9 Kǒ Cǒmara tûjûpwa̤, ma̤lû̌htò̌ge he dě pwa̤sò̌khě he toǒ acǔdekû. ^j

He khlè̌hè ǒtûdû dě naǒ.

10 Na mî̌ hecǒmaradû̌ akhû̌akhî, pwǐ na sò̌yṳ noma̤ henu sû̌ǐtòwòǐ he. ^k

Nayola htě a ma̤bwǐma̤sîrî kònu a sûcû̌ tû̌ta he dě klè̌cǒklè̌tè̤ nî̌. ^l

11 Kǒ Cǒmara tûjûpwa̤, dě ta̤bè̌dubè̌na̤ nami̤sîrîdû̌sîrîhtû ayanu, ǐ ǒhtûpwa̤po̤ he. ^m

Nacǒnatè̤ akhû̌akhî, ma̤lû̌htò̌ he ta ta̤pò̤ta̤sha.

12 Pwǐ na ǒ ta ta̤mo̤ǐ htě ahǎbòjò tò̤nu ma̤sima̤hǎmǎkèbò pwa̤sò̌khě henu.

He mî̌ napwa̤ma̤ta̤phû̌ akhû̌akhî, ma̤pî̌ma̤lṳ̂kèbò bǎ he kòyò lǒ̤꤮ bò htě a ma̤jîma̤jû henu toǒ. ⁿ