Psa 45 | KxfSCKRC | STEP | Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Ebrephû̌yo̤nu, a kaǎ ta̤sò̌po̤ htǒoto̤to̤ ta Misakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ dě Kǒri akhlialè toǒ sò̌po̤ nû̌û. Dě tobǎ sò̌po̤ sǒsǒta ta̤sò̌po̤ htě ami̤ ta ta̤phota̤gînu to̤to̤. Htǒomî̌ ta̤khòmò̤ ata̤sò̌po̤. Hesò̌phlǒ htǒo a lǒbe ta yo̤ awî̤awǒ. He sò̌po̤ bǎ ta̤sò̌po̤ htǒo to̤to̤ dě khwǐ aya. He glè noǎ heyo̤ htě anî̤ sǒsǒta pwa̤khwè̌lî̤ dě asî̌jò tapwa̤ noǎ alî̤bo.

Psalms 45

1 Hesò̌phlǒ htǒo a lǒbe ta yo̤ awî̤awǒ.

He sò̌po̤ bǎ ta̤sò̌po̤ htǒo to̤to̤ dě khwǐ aya.

He glè noǎ heyo̤ htě anî̤ sǒsǒta pwa̤khwè̌lî̤ dě asî̌jò tapwa̤ noǎ alî̤bo.

2 Dě kòyòhǎkhû̌phû̌ aphû̌makhû aklanu na phasarakhlo kò, na mî̌ pwa̤ htě a hî̌bǎmo̤ hî̌bǎnî̤ mè̤mè̤̌ tapwa̤.

Hǐnuakhû̌akhî, Cǒmaradû̌ howi̤ na tûjûpwa̤.

3 Kǒ kliphû̌ htě ashû̌shosî̌jò, wò̤htò̌ mò̌ na nò̌she dě na shè̌kòlo̤.

Dǔlṳhtò̌ mò̌ nata̤sîrîdû̌sîrîhtû, nata̤sîrîpo̤phǎ.

4 Dò̌nṳ mò̌ natîsî̌, ma̤pè̤kè mò̌ pwa̤sò̌khě nanu.

Ma̤kwaǐdǐdò bǎ mò̌ ta ta̤cǒta̤tè̤, ta̤shò̌lò̤sò̌, ta̤cèròtobǎ agûla̤nu tokho.

Nacǔdemû dě asîrîshû̌sho a dǔlṳhtò̌ nata̤ma̤ dě asò̌gònò̤.

5 Napla̤ shěhtònṳbò dě pwa̤sò̌khě Khwǐ asò̌phlǒkû.

Khlilèphû̌ toǒ lò̤jûkèbò dě nalo̤mo̤.

6 Kǒ Cǒmara nashinaga ǒyî̤tû̌ta tûjûpwa̤ talakhǎ.

Na pǒǐ tû̌ta nakòyò ta ta̤cǒta̤tè̤. ^a

7 Na mo̤ǐ ta̤ htě atoabǎ, na khû̌khwè ta̤ htě asǔ.

Hǐnuakhû̌akhî, Cǒmara htě amî̌ na Cǒmaradû̌ wû̌lǎ na, a nodû̌khlohtûkhlo na ta nasû̌nakho dě a ǐ na ta̤mo̤sû̌mo̤sò̌. ^b

8 Lǒ̤꤮ bò nahǐdopo̤to̤ toǒnu, a nṳmû̌ lò̤kèta ta̤nṳmû̌ htě kò kaǎ yǎta mǔra, alǔsa ta sǒnṳmû̌.

Khwǐho htǒotoǒ kò tîwî̌wî̤ yǎta kòshòsèmè̤, ta̤ǔta̤po̤ po̤htò̌ dě Khwǐho toǒ akû dě a ma̤ sò̌le̤sò̌lò̤ na.

9 Mamǔ htě na bè̌dû̌ǐyǎ dě aǒ nahokû akla toǒǒnu, Khwǐ toǒ aphû̌mamǔ ǒpa dǒ.

Nakhòmò̤ mamǔ ihtǒǒ dě nacǔdemû, a tîwî̌htò̌ ana̤ ta Ò̌phǐrǎga htacè̌.

10 Kǒ khòmò̤mamǔ, gana̤de, dò̌nò̌ku, gènè̤te̤mǎ, shope̤nǎǐkè mò̌ nakhlilèphû̌ ta naphakhlilènu.

11 Nata̤wî̤ta̤wǒ htǒo ahtěnṳcǐnṳ Khwǐsò̌phlǒ.

A mî̌ naběcǎ akhû̌akhî, bè̌dubè̌na̤ mò̌ yǎ.

12 Turǔwî̤phû̌mǔ phî̌hènṳ sûpě tacǎ.

Kòyòdû̌yò̤htò̌sa sò̌yṳ nokè̌dû̌ǐ ana̤ ta na pě.

13 Khòmò̤mamǔ ǒ dě Khwǐhokû, amo̤wî̤sara mè̤mè̤̌.

Ahǐdo htǒonu abǒ còcè̌꤮ nû̌û ta lǔhta.

14 Kǒ Khwǐdû̌, khòmò̤mamǔ kûsǒhtò̌ hǐdo asa awî̤awǒ, kò sûnṳ nû̌û dě naǒ.

Mamǔ htě a htûpwa̤tûsû̌ toǒ gûhè kû̌ nû̌û nǒkò, kò kaǎnṳdǒ asî dě na ǒǒ.

15 Kò sûhènṳ asî ta ta̤mo̤sû̌mo̤sò̌, ta̤sò̌le̤sò̌lò̤, asî hènṳ lǒkho dě Khwǐhokû.

16 Naphû̌khûsî toǒ glè htò̌htûbò hǐkǒlǒkòdû̌ dě naphiphu sîtoǒ agûla̤.

Na glè nohtò̌htû asî ta pwa̤pǒ hǎkhû̌ sawî̤la̤.

17 He glè nogènè̤htò̌bǎto̤ kòyò toǒ ta na ma̤htobò ta̤ htě adû̌ayǒnu toǒ pṳ̂̌꤮ tuhtu. ^c

Hǐnuakhû̌akhî, kòyò glè htû̌sò̌ǐ na tûjûpwa̤ talakhǎ.