Psalms 65
Ta̤htû̌sò̌htò̌ ta ta̤hî̌bwǐhî̌sîrî
Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.
1Kǒ Cǒmaradû̌, pa ǒsî̌tukǔ, htû̌sò̌ǐ na dě Sǐokholokhû̌. Pa glè ma̤lǒma̤bebò pata̤olò̤nu toǒ. 2Na mî̌ pwa̤ htě a gana̤de kò ta̤kwisabahtò̌. Kòyò pṳ̂̌꤮ tapwa̤ glè hèbò dě naǒ. 3Pata̤sǔta̤plě pè̤ǎbò pa. Pwǎ̤tadě na bòlû̌kè bǎ pata̤sû̌ta̤plě. 4Kòyò htě na wû̌lǎ asî, na noǒ asî dě nagûla̤cahtǐkû toǒnu, a nî̤bǎ ta̤howi̤. Pa sò̌phlǒmo̤bò tû̌ta ta̤wǒ ǒ dě nahǐ htě nata̤lṳhtò̌ho cahtǐ htǒonutama akû. 5Kǒ Cǒmaradû̌, pwa̤ma̤lû̌htò̌ge pa, na gana̤de pata̤kwisaba. Na ma̤lû̌htò̌ge pa ta ta̤te̤pe̤ sû̌pi̤sò̌pi̤. Kòyò ǒ dě hǎkhû̌ gûla̤ pṳ̂̌꤮ tò̤glò toǒ bǎbǎ, a ǒ to̤ dě shidû̌shite̤we̤ htě a yo̤gutṳ̌ toǒnu bǎbǎ, a kè̌shu nǎla̤ǐ lǒkho tû̌꤮ na. 6Na bǒlò̤ kholo toǒ ta nata̤sîrîpo̤phǎ. Na dǔlṳhtò̌ nata̤sîrîshû̌sho. 7Na ma̤sî̌tukǔkèbò shidû̌shite̤we̤ pi̤ti̤pṳ̂tṳ̂. Na ma̤ǒkǔkèbò shipěpǒdû̌ po̤kookasha. Na ma̤sǔtukǔkèbò khlilèphû̌ ta̤ma̤ pi̤ti̤pṳ̂tṳ̂. 8Kòyò htě a ǒ dě hǎkhû̌běkhû̌ pṳ̂̌꤮ tapwa̤ ǐshabò na ma̤ ta̤cǒklî̌kî̌ya. Kòyò ǒ dě mṳhtò̌ tokho toǒ bǎbǎ, dě mṳlò̤ tokho toǒ bǎbǎ, a sò̌le̤ sò̌po̤htû̌sò̌ǐ na. 9Nakè̌ǐkhwè̌ǐ hǎkhû̌, na nojulò̤ khwè̌. Na ma̤wî̤ma̤wǒ plṳ̂꤮ mè̤mè̤̌ hǎkhû̌. Cǒmaradû̌ ashilo̤dû̌ toǒ lǒbe ta shi. Na ǐ kòyò bǔhudî. Htǒomî̌ ta̤ htě na ma̤wî̤ma̤wǒ bǎ hǎkhû̌ ta kòyòhǎkhû̌phû̌ aya. 10Na nojulò̤ lǒbe khwè̌ dě la̤htě pwǎla̤ aya. Na nojucǒ kèpè̌ hǎkhlǒ. Na nojubǔjabò hǎbû. Na howi̤homò̤bòtû̌ hǎkhû̌, na nosǎhtò̌phohtò̌bòtû̌ sǒsǎwû̌pho. 11Na howi̤ pa akhû̌akhî, pasǒsǎwû̌pho nî̤wǒ. Na cû̌ bǎtètè̌꤮ bǎbǎ, ta̤ pṳ̂̌꤮ tacǎ ǒlǒǒbe lòte̤bǎlòte̤pò̤. 12Mi̤ dě lo̤mî̌shǒklakhû̌ sugijiwî̤. Na nosò̌le̤sò̌lò̤ kholo lò̤kèta kòyòhǎkhû̌phû̌ sò̌le̤sò̌lò̤. 13Sophû̌ ta pè̤ toǒ ǒbecû̌bò dě mi̤sukhû̌. Bǔmṳ toǒ ǒbebò dě galo̤to̤kû. Ta̤pṳ̂̌꤮ tacǎ sò̌le̤sò̌lò̤ kaǎgu sò̌po̤htû̌sò̌ǐ.
Copyright information for
KxfSCKRC