Psalms 107

Ta̤htû̌sò̌ǐalî̤ yè̤̌bǎ tabǎ

(Ta̤htû̌sò̌ǐ 107-150)

Cǒmara tûjûpwa̤ ata̤mo̤ǐ htě ahǎbòjò tò̤

1Nohî̌bò kò ta, Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ lǒkho yǎ.

Ata̤mo̤ǐ htě ahǎbòjò tò̤nu, a ǒměǒgle tûjûpwa̤. ^a

2Kòyò htě Cǒmara tûjûpwa̤ ma̤lû̌htò̌ge nû̌ûnu toǒ, kòyò htě a htè̌genṳ nû̌û dě pwa̤sò̌khě asî toǒ cǔdekûnu toǒ bǎbǎ, 3Kòyò htě a kaǎgeplǒbò dě shihǔwa̤gakhlo dě mṳhtò̌ tokho, mṳlò̤ tokho, cǔmû ta cǔcî̌ tokhonu toǒ bǎbǎ, hî̌bwǐhî̌sîrîhtò̌ lǒkho nû̌û.

4Kòyò toǒǒ lète̤we̤bò nòdû̌ khîkha bǎ lo̤mî̌shǒklakhû̌.

Asî kè̌shǐ klè̌ la̤cû̌ dě asî la̤ǒǐ wî̤nu tî̤wî̤ tò̤.

5Asî sǎǎsò̌o mè̤mè̤̌ shǎǎshǎo, a glè̌ phǔsibò.

6Asî ǒ dě ta̤pò̤ta̤sha akû dě a kwigwèbǎǐ Cǒmara tûjûpwa̤.

A ma̤lû̌htò̌ge asî dě ta̤khòbǎyò̤bǎ akû.

7Ma̤pûhǐ asî cû̌to̤ dě asî la̤ǒ wî̤nu tî̤wî̤ ayanu, a sûcû̌ asî ta klè̌toklè̌bǎnu tobo.

8Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

9A ǐokǒobe kòyò htě a hǒwi̤sò̌o shinu.

A ǐǎkǒobe kòyò htě a hǒwi̤sǎǎ shǎǎshǎonu.

10Kòyò toǒǒ ǒ lǒkho bǎ gûla̤ htě akhǐsuwu mè̤mè̤̌ akû.

Asî lòte̤bò dě apo̤kû, kò coklomě asî ta sǒpli̤ te̤htò̌.

11Asî ma̤tukutakǎshǔ Cǒmaradû̌ hî̌lò̤ yo̤, a jûle̤phî̌yo̤ kû̌ Cǒmara htě adû̌ahtûkhlo kò htǒotapwa̤ ata̤sû̌ǐtòwòǐ tò̤ akhû̌akhî, asî khòbǎ lǒkho hǐnu.

12Ma̤pûhǐ asî yò̤ lǒkho asò̌phlǒnu, Cǒmara nophî̌noma̤ asî ta̤ma̤ ta ajîajûnu.

Asî shěto̤bǎbò ta ta̤pò̤ta̤sha dě pwa̤ ma̤jè asî ǒ dǐpwǎ̤꤮ tò̤.

13Ashuphǔshèwè mè̤mè̤̌ asî dě kwigwèbǎǐhtò̌ Cǒmara tûjûpwa̤.

A ma̤lû̌htò̌ge asî dě ta̤khòbǎyò̤bǎ akû.

14A kaǎhǎhtò̌ asî dě gûla̤ akhǐsuwu mè̤mè̤̌nu tò̤glò akû.

A ma̤tṳkèbò bǎ asî sǒpli̤ te̤htò̌.

15Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

16A ma̤pò̌bò apo̤kû takhadû̌ toǒ htě kò ma̤ yǎta tîlîbò.

A ma̤gabò te̤htò̌bo htě kò wo̤dǐdònu.

17Kòyònòdû̌ hǐkǒshò̌, ma̤toma̤bǎ ta̤ tò̤.

Asî ma̤sǔma̤plě hǐnuakhû̌akhî, ashǐashabò.

18Asî wi̤jabò shǎǎshǎo pṳ̂̌꤮ tacǎ.

Asî glè̌ phǔsi tînî̌ bò.

19Asî ǒ dě ta̤pò̤ta̤sha akû dě a kwigwèbǎǐ Cǒmara tûjûpwa̤.

A ma̤lû̌htò̌ge asî dě ta̤sò̌phlǒgusò̌phlǒgè akû.

20A hî̌lò̤ ayo̤ dě a ma̤hǎmǎ bǎ asî ta̤sha.

A ma̤lû̌htò̌ge asî dě ta̤si akla.

21Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

22Nolṳhtò̌ asî ta̤hî̌bwǐsîrî ata̤lṳta̤tò̌nu.

Nosò̌le̤sò̌lò̤ sò̌po̤ hî̌lṳ asî ta ta̤ htě a ma̤hto bǎ asînu.

23Kòyò toǒǒ cû̌ge ta sǒkhlidû̌ dě shidû̌shite̤we̤kû, asî ma̤guma̤khè̌ ta̤ bǎnu.

24Asî kè̌shǐ Cǒmara tûjûpwa̤ ata̤phî̌ta̤ma̤.

Asî kè̌shǐ ata̤ma̤ cǒklî̌kî̌ya dě shidû̌shite̤we̤yo̤ akû.

25A hî̌lò̤pwǎ ayo̤ dě gili̤sǎplǎwi̤, shi pěpǒdû̌ hè.

26Asîsǒkhlidû̌ khlěkhlǒ nûhtò̌to̤ dě gili̤sǎkla, nûlò̤to̤ dě shipěpǒyo̤ aplǎkû.

Asî ǐsha gònò̤gèglèbò.

27Asî cû̌ nûhtonûlò̤ sǒsǒta pwa̤omṳshi.

Asî la̤klo sî̌ya khlòsî̌khlòjò sǒkhli toǒnu, a nòdû̌bò pwǎ.

28Asî ǒ dě ta̤pò̤ta̤sha akû dě a kwigwèbǎǐ Cǒmara tûjûpwa̤.

A ma̤lû̌htò̌ge asî dě ta̤jîta̤jû akû.

29A noǒkǔkèbò gili̤sǎplǎwi̤ dě shipěpǒ ǒkǔkèbò.

30Shipěpǒ ǒkǔkèbò akhû̌akhî, asî sò̌le̤sò̌lò̤.

Cǒmara sûcû̌to̤ asî dě asî la̤cû̌bè̌ǒkǔ sǒkhlidû̌ gûla̤nu tò̤glò.

31Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

32No bè̌dubè̌na̤mò̌ asî ta Cǒmara tûjûpwa̤ dě kòyòprṳ̂ho akla.

No htû̌sò̌ǐ mò̌ asî ta Cǒmara dě khlilèphû̌ ahǐkǒlǒkòdû̌ toǒ ta̤ǒhtuhî̌bǎplǒ akû.

33Cǒmara nohtûhtò̌ shikhî̌ toǒ ta lo̤mî̌shǒkla.

A nohtûhtò̌ shipo̤htǎ gûla̤ toǒ ta hǎkhû̌khwe.

34Kòyò htě aǒ bǎnu toǒ ma̤ ta̤phû̌mò̤shî̌hto akhû̌akhî, a nohtûhtò̌kèbò hǎplǒhǎyî̌khû̌ htǒonu ta hǎkhû̌cakwǎ.

35A nohtûhtò̌ lo̤mî̌shǒkla ta shikoǒ.

A nohtûhtò̌ hǎkhû̌khwe ta shipo̤htǎ.

36A noǒ kòyòhǒwi̤sǎǎ bǎ gûla̤nu tò̤glò.

Asî ma̤htò̌ lǒkho awî̤phû̌.

37Asî ma̤ǎ lǒkho hǔkla, a shǒǐtû̌ lǒkho sobîmṳ.

Asî nî̤bǎ plṳ̂꤮ mè̤mè̤̌ sobîsǎ.

38Cǒmara howi̤homò̤ asî akhû̌akhî, asî hǐphû̌phòphû̌ ǒwo̤ǒhtò̌.

A noyû̌ gilò̤kè nǒ asîta̤phû̌ta̤li̤ tò̤.

39Bǎ asî kòyò ǒpî̌tî̌ gilò̤kè akha, asî khuwè̤ toǒ glè pè̤ǎpè̤o asî, ma̤jîma̤jû asî dě a sǎpla̤sǎyṳbò.

40Cǒmara ma̤sòwò̤kèbò pwa̤pǒta̤nu toǒ.

A nolète̤we̤ hǎbò nòdû̌ asî khîkha bǎ lo̤mî̌shǒklakhû̌nu.

41Pwǎ̤tadě a bè̌htò̌yî̤ lè̌ kòyò shodo pwa̤ma̤jè dě ta̤ma̤jîma̤jû akû.

A noǒwo̤ǒphǎ꤮ htò̌ asîhǐphû̌phòphû̌ lò̤kèta sophû̌mṳ.

42Kòyòcǒkòyòtè̤ kè̌shǐ dě a mo̤sû̌mo̤sò̌.

Kòyòphû̌mò̤ lǒ̤꤮ bò lè̌dě aǒ sî̌tukǔ꤮ kèbò.

43No gènè̤te̤mǎbò ta̤ htǒotoǒ ta kòyò htě ata̤sî̌ta̤jò ǒnu.

No sî̌ya te̤mǎbò asî ta Cǒmara tûjûpwa̤ ata̤mo̤ǐ htě ahǎbòjò tò̤nu nî̌.