Psalms 109

Kwihtò̌ ta̤ma̤jè dě Cǒmara tûjûpwa̤ aǒ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.

1Kǒ Cǒmaradû̌, he htû̌sò̌ǐ na.

Jîkoo pûma̤ nî̌.

2Kòyòphû̌mò̤, kòyòcè̌klè lòhoǎ kò toǒnu, a hî̌ tukutakǎbò he.

Asî dǒ lòhǎlòhobò heyo̤.

3Asî ǒte̤we̤, hî̌bǎ sò̌khěkhû̌khwèbò he.

He ma̤sǔma̤plě asî dǐcǎ꤮ tò̤ pwǎ̤ta asî hèshěbò he.

4He mo̤ǐ asî pwǎ̤ta asî bè̌ lǒkhope he ta̤sǔpe.

He saba sadape pwǎ asîya.

5He ma̤wǒpwǎ asî pwǎ̤tadě asî ma̤phû̌mò̤ còcè̌꤮ he. ^a

He mo̤ǐ asî pwǎ̤tadě asî sò̌khěkhû̌khwè lǒkho he.

6Wû̌lǎ kòyòphû̌mò̤ tapwa̤ dě noma̤shǔkè yǎta anu.

No ihtǒǒ pwa̤cèkwè̌ nû̌û ta̤sǔ dě akòshî̌ tapwa̤nu.

7Bǎ kò sèlèkè̌ nû̌û akhanu, kò bè̌ nû̌û ta̤sǔ pě nî̌.

Ata̤kwisabanu, nohtûhtò̌kè yǎ pwǐ ta̤sǔnu nî̌.

8Amṳni̤mṳsa phǔtǔkè tû̌ta pě nî̌.

Kò nṳma̤ tû̌ta agûla̤ tapwa̤pwa̤ pě nî̌. ^b

9Aphû̌ toǒ shodophakè tû̌ta pě nî̌.

Ama ǒkhwè̌kè tû̌ta pě nî̌.

10Aphû̌ toǒ htûkèbò tû̌ta pwa̤kwiǎta̤ pě nî̌.

Asî ǒ dě ahǐphòyò̤kû dě bǎ hǎhtò̌cû̌ kè̌lǎǎtû̌ ala̤ǎla̤o pě nî̌.

11Kòyò htě ashû̌ ǒ kònu toǒ phî̌kèbò tû̌ta nû̌ûta̤kî̌ta̤kû̌ pě nî̌.

Shihǔwa̤gakhlophû̌ toǒ phî̌sigwikèbò tû̌ta nû̌ûta̤kî̌ta̤kû̌ htě a ǎwè̤ǐnu toǒ pě nî̌.

12No ǒpûma̤ kòyò htě a ma̤mo̤ma̤wǒ nû̌û tapwǎ̤꤮ ma̤.

No ǒpûma̤ kòyò htě a gwèbǎǐ nû̌ûphû̌ dě a shodophanu toǒ dǐpwǎ̤꤮ ma̤ma̤.

13Akhlialè toǒ tṳkè tû̌ta pě nî̌.

Kòyò nǒkò tuhtu pě toǒ shope̤nǎ phlǔkèbò tû̌ta nû̌ûmi̤ pě nî̌.

14Cǒmara tûjûpwa̤ to̤mǎǐ tû̌ta aphiaphu sîtoǒ ata̤sǔta̤plě nî̌.

Bòlû̌ pûma̤ bǎ amo̤ ta̤sǔnu ma̤ nî̌.

15– 16A ma̤mo̤ma̤wǒ kû̌kò tò̤, a ma̤jîma̤jû, ma̤sima̤hǎmǎ kòyò htě kò pè̤ǎpè̤o nû̌û, kòyò htě a shodo pwa̤ma̤jè ta kòyòsò̌phlǒpî̌nu toǒ akhû̌akhî, Cǒmara tûjûpwa̤ to̤mǎǐ tû̌ta asî ta̤ma̤sǔ htǒo pṳ̂̌꤮ taplǎ nî̌.

Bǎ hǎkhû̌bǎo nogènè̤to̤pe pûma̤ kò ta ami̤ htǒo ma̤.

17A sò̌yṳ ǐsho còcè̌꤮ kò akhû̌akhî, nolò̤bǎ gesǒtû̌ yǎta ta̤ǐsho nî̌.

A sò̌yṳ howi̤homò̤ kû̌kò dǐkhò̌꤮ tò̤ akhû̌akhî, nonî̤bǎ pûma̤ a ta̤howi̤homò̤ dî̌kî̌꤮ ma̤.

18No bote̤we̤bǐtû̌ yǎta ta̤ǐsho pwǐ a sǒ hǐdonu.

No sǐcǒnṳtû̌ ta̤ǐsho sǒsǒta hǐdopo̤to̤shi sǐcǒnṳ dě aphěyî̌kûnu.

No sǐcǒnṳtû̌ ta̤ǐsho sǒsǒta htǒshi sǐcǒnṳ dě khwǐgîkûnu.

19Ta̤ǐsho htǒonu noǒte̤we̤bǐbòtû̌ yǎ pwǐ a sǒte̤we̤bǐbò hǐdonu.

Ta̤ǐsho htǒonu note̤we̤bǐbòtû̌ yǎ pwǐ kò wò̤te̤we̤ sò̌to̤ pṳ̂̌ni̤ni̤nu.

20Cǒmara tûjûpwa̤ ma̤ geshǔsǒtû̌ kòyò htě a bè̌ he ta̤sǔ, a hî̌ phû̌mò̤ henu nî̌.

21Kǒ Cǒmara tûjûpwa̤, heběcǎ ta̤adû̌, la̤bè̌dubè̌na̤ nami̤wî̤mi̤wǒ htǒoaya, ma̤jè mò̌ he.

Nata̤mo̤ǐ htě ahǎbòjò tò̤ htǒonu awǒ꤮ mè̤mè̤̌ akhû̌akhî, ma̤lû̌htò̌kèmò̌ he.

22Kò pè̤ǎpè̤o he, he shodo pwa̤ma̤jè.

Asha꤮ mè̤mè̤̌ hesò̌phlǒ.

23He glè̌ hǎmǎphwèkè lò̤kèta heyo̤ǔ hǎmǎkè bǎ lṳmṳlò̤ akha.

He sǒsǒta dèpo̤ dě gili̤sǎ lûcû̌hǎmǎkè nû̌ûnu.

24He dǔǎ shǎ akhû̌akhî, hekhò̌dela̤ jabò hǒ.

A ǒkè pwǎ pǒ̤꤮ hekhwǐ ta hephě pwǎ.

25Pwa̤sò̌khě he toǒ kè̌shǐ he bǎtè tò̤glò tè꤮ bǎbǎ, a pi̤jishǐcǒbò he.

A nǒ lǒkho ahǐkǒ dě a luya̤bò he. ^c

26Kǒ Cǒmara tûjûpwa̤, hecǒmaradû̌, ma̤jèmò̌ he.

Nata̤mo̤ǐ hǎbòjò tò̤ akhû̌akhî, ma̤lû̌htò̌ge he.

27Kǒ Cǒmara tûjûpwa̤, nosî̌yate̤mǎ asî ta na ma̤ta̤ lǒ̤bò, na ma̤htûhtò̌bò yǎta nana̤.

28Asî dě a ǐsho he, na dě na howi̤homò̤ he.

Bǎ asî hèshě he akhanu, nolò̤jûkèbòtû̌ asî, pwǎ̤tadě nosò̌le̤sò̌lò̤tû̌ napwa̤ma̤ta̤phû̌ mî̌ hehtǒo nî̌.

29Pwa̤sò̌khě he toǒ sòwò̤ mi̤sǎpî̌bò tû̌ta nî̌.

No kûsǒhtò̌bò asî ta̤sòwò̤ pwǐ kò kûsǒhtò̌bǐ kòna̤ ta hǐdopo̤to̤nu.

30He glè hî̌bwǐsîrî mè̤mè̤̌ Cǒmara tûjûpwa̤.

He glè htû̌sò̌ǐ yǎ dě kòyòprṳ̂ho akla.

31Cǒmara tûjûpwa̤ ma̤kwa dǐdòshǔ, ma̤lû̌htò̌ge kòyò htě a shodo pwa̤ma̤jè dě kò cèròsi nû̌ûnu.