Psalms 135

Lî̤sò̌po̤ htû̌sò̌htò̌

1– 2Kǒ pwa̤ ǒ dě Cǒmara tûjûpwa̤ ahǐ, pacǒmaradû̌ ata̤lṳhtò̌hokû toǒ sî꤮, htû̌sò̌ǐ Cǒmara tûjûpwa̤, htû̌sò̌ǐ mò̌ ami̤.

Cǒmara tûjûpwa̤ apwa̤ma̤ta̤phû̌ sî꤮, htû̌sò̌ǐ mò̌ lǒkho.

3Cǒmara tûjûpwa̤ mî̌ awǒ mè̤mè̤̌ akhû̌akhî, htû̌sò̌ǐ mò̌ yǎ.

A sò̌phlǒwǒ꤮ mè̤mè̤̌ akhû̌akhî, sò̌po̤htû̌sò̌htò̌ mò̌ ami̤.

4Cǒmara tûjûpwa̤ wû̌lǎ Yǎ̤kò akhlialè toǒ ta aya tû̌.

A wû̌lǎ Israelkhlilèphû̌ htǒonu ta akhlilèphû̌ htě ale̤dû̌pwî̤htû. ^a

5He sî̌ya ta Cǒmara tûjûpwa̤ mî̌ asîrîpo̤phǎ.

Pa Běcǎ ta̤adû̌ mî̌ adû̌ahtûkhlo ta Cǒmara ahǔwa̤ toǒ lǒ̤꤮ bò.

6Dě mǒkhû̌nu bǎbǎ, bǎ hǎkhû̌ bǎbǎ, dě shidû̌shite̤we̤kû bǎbǎ, shidû̌shite̤we̤ kòdanu bǎbǎ, Cǒmara tûjûpwa̤ ma̤bò pwǐ a sò̌yṳma̤nu.

7A nohtò̌ poǒlṳ dě mǒkòtṳkòshî̌, a nohtûhtò̌ tî̌lî̌bobo, khwè̌juju.

Gili̤ ǒ dě Cǒmara la̤bè̌ǒplǒ nû̌û gûla̤nu toǒ dě a nohtû̌hè. ^b

8Cǒmara tûjûpwa̤ ma̤sikèbò Egyptga phû̌wè̤pwa̤ ta ta̤phû̌ta̤li̤ phû̌wè̤pwa̤ lǒ̤꤮ bò. ^c

9Cǒmaradû̌ dǔlṳ ata̤cǒklî̌kî̌ya ta ta̤sû̌pi̤sò̌pi̤ toǒ dě a shě Egyptgaphû̌ ta apwa̤ma̤ta̤phû̌ toǒ lǒ̤꤮ bò. ^d

10A ma̤pî̌kè plṳ̂꤮ mè̤mè̤̌ khlilèphû̌ toǒ, htohǒtò̤ a ma̤sikè Khwǐ htě a sîrîshû̌sho toǒ.

11A ma̤sikèbò Amò̌rî̌khlilèphû̌khwǐ Khwǐsǐho, ^e Bashagakhwǐ Khwǐokǎ ta lǒ̤꤮ bò Khanaga akhwǐ toǒ. ^f

12Asîhǎkhû̌ toǒnu, a ǐkè nû̌ûta akòyò Israelkhlilèphû̌ toǒ ta û̌cata̤bî̌.

13Kǒ Cǒmara tûjûpwa̤, nami̤ mî̌ a ǒměǒgle tûjû꤮ pwa̤.

Kǒ Cǒmara tûjûpwa̤, nami̤ lṳshilṳga tû̌ta tûjû꤮ pwa̤.

14Cǒmara tûjûpwa̤ glè ǒkû̌ ta akòyò tokho.

A gwèbǎǐ apwa̤ma̤ta̤phû̌ toǒ.

15Khlilèphû̌hǔwa̤ toǒ acǒmara ta̤yo̤ta̤gî mî̌ kòyòhǎkhû̌phû̌ bǒ nû̌û dě kò ma̤pwǎ yǎta wûhta. ^g

16Akhû̌phě ǒ pwǎ̤tadě a hî̌bǎjò tò̤.

Ami̤sǎphlǒ ǒ pwǎ̤tadě a kè̌shǐjò tò̤tò̤.

17Anò̌ku ǒ pwǎ̤tadě a gana̤dejò tò̤.

Anò̌khi ǒ pwǎ̤tadě a sǎnṳsǎhtò̌jò tò̤tò̤.

18Lǒ̤꤮ bò kòyò htě a bǒ pwa̤yo̤nu toǒ bǎbǎ, a nǎla̤ǐ pwa̤yo̤nu toǒ bǎbǎ, a glè sǒsǒtû̌ta pwa̤yo̤.

19Kǒ Israel akhlialè toǒ, htû̌sò̌ǐ Cǒmara tûjûpwa̤.

Kǒ Aro akhlialè pwa̤lṳhtò̌ta̤ toǒ, htû̌sò̌ǐ Cǒmara tûjûpwa̤. ^h

20Kǒ Lě̤wǐ akhlialè toǒ, htû̌sò̌ǐ Cǒmara tûjûpwa̤.

Kǒ kòyò htě a ǐsha bè̌dubè̌na̤ Cǒmara tûjûpwa̤ toǒ, htû̌sò̌ǐ Cǒmara tûjûpwa̤.

21Kò htû̌sò̌ǐ tû̌ta Cǒmara tûjûpwa̤ ǒ dě Sǐokholo Ye̤rǔshèlèwî̤kûnu tapwa̤.

Htû̌sò̌ǐ Cǒmara tûjûpwa̤ nî̌.