Psalms 145

Ta̤sò̌po̤ htû̌sò̌ǐ

Khwǐdǎ̤wi̤ ata̤sò̌po̤ htû̌sò̌ǐ.

1Kǒ hecǒmaradû̌, hekhwǐdû̌, he glè dǒhtû̌ǐlṳ nata̤sîrîdû̌sîrîhtû awi̤akè̌.

He glè htû̌sò̌ǐ nami̤ tûjûpwa̤ talakhǎ.

2He glè htû̌sò̌ǐ na pṳ̂̌ni̤pṳ̂̌sa.

He glè htû̌sò̌ǐ nami̤ tûjûpwa̤ talakhǎ.

3Cǒmara tûjûpwa̤ mî̌ asîrîdû̌sîrîhtû na̤cè̌, a gwa htû̌sò̌ǐ mè̤mè̤̌.

Asîrîdû̌sîrîhtû pwî̌꤮ tènu, kò sî̌yahtû dǐpwǎ̤꤮ tò̤.

4Kòyò tuhtu hto tuhtu glè htû̌sò̌htò̌ǐbò nata̤ma̤.

Asî glè dǒhtû̌ǐbò nata̤ma̤ htě apo̤aphǎ.

5He glè gènè̤ pwǎ pǒ̤꤮ nata̤sîrîpo̤phǎ, nata̤sîrîdû̌sîrîhtû ata̤lîta̤rakha ta nata̤ma̤ htě acǒklî̌kî̌ya.

6Asî glè dǒhtû̌ǐbò nata̤po̤ta̤phǎ htě na ma̤ ta̤te̤pe̤ sû̌pi̤sò̌pi̤.

He glè pwe̤ǐlò̤lṳ bǎ kò ta nata̤ma̤ htě adû̌ayǒ.

7Asî glè dǒhtû̌ǐlṳbò lǒkho nata̤wǒ htě adû̌ayǒ awi̤akè̌.

Asî glè sò̌le̤sò̌lò̤ sò̌po̤htò̌ lǒkho nata̤cǒta̤tè̤ awi̤akè̌.

8Cǒmara tûjûpwa̤ mî̌ a gwèbǎǐ, ma̤bwǐma̤sîrî kòyò.

A sò̌phlǒhtû lǒbe ta ta̤mo̤ǐ htě ahǎbòjò tò̤. ^a

9Cǒmara tûjûpwa̤ mî̌ a ma̤wǒ ta̤ ta kò pṳ̂̌꤮ tapwa̤ aya.

A gwèbǎǐbò ta̤ htě a bǒlò̤.

10Kǒ Cǒmara tûjûpwa̤, ta̤ lǒ̤꤮ bò htě na bǒlò̤ toǒ glè htû̌sò̌htò̌ǐbò na.

Lǒ̤꤮ bò nakòyò cǒtè̤ nò ayo̤ sîtoǒ glè hî̌bwǐhî̌sîrîbò na.

11– 12Ma̤pûhǐ kò pṳ̂̌꤮ tapwa̤ sî̌yabò nata̤ma̤, nata̤po̤ta̤phǎ ta nashila̤gakû ata̤sîrîdû̌sîrîhtû ayanu, asî pwe̤ǐbò nashila̤gakû ata̤sîrîdû̌sîrîhtû awi̤akè̌.

Asî dǒhtû̌ǐbò lǒkho nata̤po̤ta̤phǎ awi̤akè̌.

13Nashila̤gakû numî̌ a ǒgloshomě tûjûpwa̤, na pǒǐbò kòyò tuhtu hto tuhtu. ^b

Cǒmara tûjûpwa̤ mî̌ a cǒtè̤ ta ata̤olò̤ lǒ̤꤮ bò, a ma̤ta̤ pṳ̂̌꤮ tacǎ ta ata̤mo̤ǐ htě ahǎbòjò tò̤.

14Cǒmara tûjûpwa̤ ma̤shû̌ma̤jo kòyò ǒ dě ta̤pò̤ta̤shakû.

A ma̤jè kòyò htě ashò̌lò̤ asò̌phlǒ.

15Ta̤ htě asò̌htûpwa̤ ǒ pṳ̂̌꤮ tacǎ kè̌shu nǎla̤ǐ dě naǒ.

Bǎ akhîakha bǎnu na ǐǎǐo asî. ^c

16Na yṳ̂htò̌ nacǔde dě na ǐǎǐo, na ma̤lǒma̤bebò ta̤ htě asò̌htûpwa̤ ǒ pṳ̂̌꤮ tacǎ ata̤sò̌yṳ. ^d

17Cǒmara tûjûpwa̤ ma̤toma̤bǎ ta̤pṳ̂̌꤮ tacǎ dě a ma̤ta̤ pṳ̂̌꤮ tacǎ ta ata̤mo̤ǐ htě ahǎbòjò tò̤.

18Kòyò lǒ̤꤮ bò htě akwigwèbǎǐ Cǒmara tûjûpwa̤ ta asò̌phlǒcǒsò̌phlǒtè̤ toǒnu Cǒmara ǒphǔtînî̌ ta asî.

19A ma̤lǒma̤bebò bǎ kòyò htě a ǐsha bè̌dubè̌na̤ nû̌ûnu toǒ ata̤sò̌yṳ.

A gana̤de asî kwigwèbǎǐ ta̤ma̤jè dě a ma̤lû̌htò̌ asî.

20Cǒmara tûjûpwa̤ ma̤kwaǐ kòyò lǒ̤꤮ bò ta a mo̤ǐ nû̌û.

A glè ma̤pî̌kèbò kòyòphû̌mò̤.

21He glè htû̌sò̌ǐ Cǒmara tûjûpwa̤.

Ta̤ lǒ̤꤮ bò htě a bǒlò̤ toǒnu to htû̌sò̌ǐ Cǒmara mi̤cahtǐ tûjûpwa̤ talakhǎ.