Psalms 20

Ta̤kwisaba ata̤ma̤pè̤ dě Khwǐ aya

Khwǐdǎ̤wi̤ ata̤sò̌po̤. Ta̤sò̌po̤ htǒonumî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya.

1Bǎ na kè̌shǐbǎ ta ta̤guta̤gè akhanu, Cǒmara tûjûpwa̤ gana̤de tû̌ta nata̤kwisaba nî̌.

Yǎ̤kò acǒmara ami̤htǒo a ma̤kwaǐ tû̌ta na nî̌.

2A ǒ dě agûla̤ cahtǐ dě a ma̤jè tû̌ta na nî̌.

A ǒ dě Sǐokholokhû̌ dě a ǐjè tû̌ta na nî̌.

3A gènè̤htò̌to̤bò tû̌ta nata̤lṳta̤tò̌nu toǒ nî̌.

A phî̌shǔbò tû̌ta na shû̌gè lṳhtò̌ ta̤phû̌ta̤li̤nu toǒ nî̌.

4Pwǐ na sò̌yṳbònu a ǐtû̌ta na nî̌.

Pwǐ na ta̤yè̤lò̤ǒnǎ tû̌ nata̤ma̤ toǒnu a behtò̌belò̤bò tû̌ta bǎ na nî̌.

5Bǎ na ma̤pè̤ ta̤ akhanu, pa glè sò̌le̤sò̌lò̤ sò̌po̤mo̤mè̤.

Cǒmaradû̌ ami̤ akhû̌akhî, pa glè hǔhtò̌nṳ ta̤ma̤pè̤ akhû̌pa̤la̤.

Nata̤kwigwèbǎǐhtò̌ lǒ̤꤮ bò toǒnu Cǒmara tûjûpwa̤ ǐbò tû̌ta na nî̌.

6Khònò̤htǒo he sî̌ya ta Cǒmara tûjûpwa̤ ma̤lû̌htò̌genṳ Khwǐ htě a wû̌htò̌nu tapwa̤.

A ǒ dě mǒkhû̌ cahtǐ dě a gana̤de nû̌ûta̤kwisaba, ^a

A ma̤lû̌htò̌ge nû̌û ta acǔdemû dě asîrîpo̤phǎ.

7Kòyò toǒǒ mî̌ a nǎla̤ǐtû̌ lǒkho atîsî̌lo̤ ta tîsî̌ htě ala̤htò̌shě ta̤.

Pa lè̌dě, pa nǎla̤ǐpwǎ pǒ̤꤮ pacǒmara tûjûpwa̤ ami̤. ^b

8Kòyò hǐnutoǒ mî̌ a gònò̤gèglè, lòkhǔpo̤kè pě. ^c

Pa lè̌dě pa ihtǒ ǒměǒglewǒ pě. ^d

9Kǒ Cǒmara tûjûpwa̤, ma̤lû̌htò̌ Khwǐdû̌ nî̌.

Bǎ pa kwihtò̌ nata̤ma̤jè akhanu, gana̤de pata̤kwi htǒo nî̌.