Psalms 22

Ta̤sǎpla̤ hǎwo ta ta̤sò̌po̤ htû̌sò̌ǐ

Khwǐdǎ̤wi̤ ata̤sò̌po̤. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Dě tobǎ sò̌po̤ sǒsǒta ta̤sò̌po̤ htě ami̤ ta, tikhimo̤ dě lṳmṳlîbû todonu to̤to̤.

1Hecǒmara, hecǒmara, na wîkè he ma̤tè? ^a

Na ma̤lû̌htò̌ge he tò̤.

Na gana̤dekû̌ he ta̤kookasha tò̤.

Ma̤titèdě na cû̌ǒ te̤pheyî̤ mè̤mè̤̌ ta he ma̤tè?

2Kǒ hecǒmaradû̌, he kwigwèbǎǐ na pṳ̂̌ni̤ni̤ pwǎtadě na hî̌shǔ he dǐcǎ꤮ tò̤.

He kwihtò̌ na pṳ̂̌sasa꤮ pwǎtadě he nî̤bǎ ta̤gûjûkabǎ dî̌kî̌꤮ tò̤.

3Na mî̌ Cǒmara tûjûpwa̤ dě acahtǐ.

Na hǎnòò̌lò̤ dě gògohta htò̌yî̤khû̌ pwǐ Khwǐdû̌.

Israelphû̌ htû̌sò̌ǐ na.

4Pamo̤phaphiphu dě꤮ awǐnu toǒ yṳǎ tǒ̤꤮ tû̌ na.

Asî yṳǎ na dě na ma̤lû̌htò̌ge asî.

5Asî yi̤kǒhtò̌ dě naǒ dě a nî̤bǎ ta̤ma̤lû̌htò̌ge.

Asî yṳǎnǎla̤ǐ na dě asî sòwò̤ nǒ dǐkhò̌꤮ tò̤.

6Pwǎta he mî̌ alò̤ta htaye̤ dě a nòdû̌.

He mî̌ kòyòhǎkhû̌phû̌ mè̤ nǒ tò̤.

Kòhǔwa̤ kè̌pî̌tî̌bò he, kòyò sò̌khěbò he.

7Kòyò lǒ̤꤮ bò htě a kè̌shǐ henu a ǐshobò he.

A pè̤ǎpè̤obò he.

A luya̤ û̌htò̌û̌lò̤ ahǐkǒ. ^b

8Asî hî̌ ta, “A yṳǎ tû̌ Cǒmara tûjûpwa̤.

“Noma̤lû̌htò̌ge mò̌ yǎta acǒmara tûjûpwa̤nu.

“Pwǐ a mo̤ǐ nû̌ûnu, noma̤lû̌htò̌ge mò̌ yǎta anu.” ^c

9Na noǒlò̤ mo̤wǒ he dě he mo̤ phukû.

Na khwè̌ǐ ma̤kwaǐ he dě he onû̌pe hemo̤nṳ̂shi akhanupe.

10Bǎ he ǒlò̤꤮ akhanu, he ǒ tû̌ dě nacǔdekû.

Bǎ he ǒpepwǎ dě hemo̤phukû akhanu, na htûtû̌ hecǒmaradû̌ hǒ.

11Khòsò̌do ǒ te̤pheyî̤ pûma̤ ta he ma̤.

Ta̤pò̤ta̤sha hèphǔ te̤mǎ ta he hǒ.

Pwa̤ma̤jè he ǒ dǐpwǎ̤꤮ tò̤.

12Pwa̤khuwè he toǒ ǒte̤we̤bò he lò̤kèta pṳ̂pha tṳmṳ ǒte̤we̤bò he.

Pṳ̂pha khû̌ǎshû̌sho dě Bashagakûnu toǒ, hè ǒte̤we̤bò he.

13Asî òmobò akhû̌phě lò̤ta sî̌ò̌ gokrû̌ glè̌ ěǎ ta̤phû̌ta̤li̤nu.

14Hekhû̌heǎ hǎbòkè lò̤kèta kò lò̌lò̤bòkè shi.

Hekhwǐ mî̌ a lòte̤plî̌hǎhtò̌bò.

Hesò̌phlǒ mî̌ alò̤kèta a htûshi lòte̤pò̤bò dě hesookû.

15Hekhû̌heǎ khwedè̌trè̌꤮ lò̤kèta gopo̤htò̌pò̌.

Heplî̤ tǒhtuměkè ta hekhǎdǎla̤.

Na bè̌lò̤kè he dě ta̤si lo̤hǎkla agûla̤.

16Kòyòphû̌mò̤ sîtoǒ ǒte̤we̤bò he lò̤kèta chyǐmi̤ ǒpo̤te̤we̤bò henu.

Asî htǎnṳbò lǒkho hecǔde ta khò̌lopo̤. ^d

17He dǒmǎbò̌ lǒ̤bò hekhwǐ pṳ̂̌꤮ tobo.

Asî kè̌kolo luya̤ lǒ̤bò he.

18Asî bèphî̌ lǒkho hehǐdopo̤to̤htû.

A bǒ lǒkho ta̤bèbwǐ. ^e

19Kǒ Cǒmara tûjûpwa̤, ǒ te̤pheyî̤ pûma̤ ta he ma̤.

Kǒ hekhû̌heǎ, hèma̤jè phwèmò̌ he.

20Ma̤lû̌htò̌ge he dě nò̌she akla.

Ma̤lû̌htò̌gepo̤ heta̤ǒhtûpwa̤ dě chyǐnu toǒ acǔdekû.

21Ma̤lû̌htò̌ge he dě sî̌ò̌ hò̌kû.

Ma̤lû̌htò̌gepo̤ he dě pṳ̂mi̤ ane̤kû.

22Na ta̤ma̤wǒ awi̤akè̌nu toǒ he glè pwe̤ǐlṳ bǎ hepṳwè̤ toǒ.

Kò subusabaplǒ nû̌û asò̌gonu, he glè htû̌sò̌ǐ na. ^f

23Kòyò htě a ǐsha bè̌dubè̌na̤ Cǒmara tûjûpwa̤ sî, htû̌sò̌ǐmò̌ yǎ.

Lǒ̤꤮ bò Yǎ̤kò akhlialè toǒ, bè̌dû̌bè̌htû lǒkho yǎ.

Israel aphû̌ali̤ lǒ̤꤮ bò sî, bè̌dubè̌na̤ lǒkho yǎ.

24A sò̌khě kè̌tûlû̌kè pwa̤bǎpò̤bǎsha ata̤shuphǔshèwè tò̤.

A kè̌khǒkè̌wa̤kè asî tò̤tò̤.

Bǎ asî kwihtò̌ nû̌û ta̤ma̤jè akhanu, a gana̤de dě a hî̌shǔ asî.

25He glè htû̌sò̌ǐ tû̌ na dě pwa̤yṳǎta̤ prṳ̂ho alo̤mo̤.

He glè lṳhtò̌tòhtò̌ tû̌ na pwǐ heta̤olò̤nǎnu dě pwa̤ǐsha bè̌dubè̌na̤ nanu alo̤mo̤.

26Kòyò htě kò pè̤ǎpè̤o nû̌ûnu toǒ ǎkǒobe sò̌phlǒmo̤bò pě.

Pwa̤ htě a kè̌lǎ Cǒmara tûjûpwa̤ sîtoǒ htû̌sò̌ǐbò nû̌û pě.

Sîsò̌phlǒ gûjûkabǎ tû̌ta pṳ̂̌shupṳ̂̌kha pě.

27Hǎkhû̌tebě shiga lǒ̤꤮ bò glè gènè̤htò̌ Cǒmara tûjûpwa̤ dě a glè getîkhîbò lǒkho dě nû̌ûǒ.

Shiga khlilèphû̌ lǒ̤꤮ bò gene̤lò̤ sabahtò̌bò dě alo̤mo̤ pě.

28Cǒmara tûjûpwa̤ pǒǐ ta̤ lǒ̤꤮ bò.

A pǒǐpo̤ khlilèphû̌ lǒ̤꤮ bò.

29Kòyò htě a phî̌dû̌phî̌htò̌yî̤ ana̤nu toǒ, glè ma̤pwè subusabahtò̌ lǒ̤bò.

Kòyò htě a bǎ getîkhîbòsǒ dě lo̤hǎklanu toǒ glè gene̤lò̤ lǒ̤bò.

30Khlilèphû̌ to̤hè htû̌꤮ anǒ pě toǒ glè ma̤shû̌ma̤jo lǒkho tû̌ nû̌ûta̤ma̤.

Khlilèphû̌ tuhtu hto tuhtu gana̤de sî̌yabǎbò Běcǎ ta̤adû̌ awi̤akè̌ pě.

31Kò glè pwe̤ǐlṳ bǎ kòyò htě a ǒlò̤ hǒtò̤nu toǒ ta Běcǎ Cǒmara ata̤cǒta̤tè̤.

Asî glè gana̤debǎ Běcǎ ata̤ma̤lû̌htò̌ge awi̤akè̌.