Psalms 24
Khwǐdû̌ htě a ǒ ta ta̤sîrîdû̌sîrîhtû
Khwǐdǎ̤wi̤ ata̤sò̌po̤.
1Hǎkhû̌akhû̌ ta ta̤pṳ̂̌꤮ tacǎ ǒ dě hǎkhû̌ běkhû̌nu toǒ mî̌ Cǒmara tûjûpwa̤ ata. Hǎkhû̌ ta kòyòhǎkhû̌phû̌ lǒ̤꤮ bò htǒotoǒ mî̌ atabò hǒ. a 2A ma̤htò̌lò̤ hǎkhû̌ akòtṳkò̌shî̌. A ma̤ měglewǒ nû̌û dě shidû̌te̤we̤ kòda. 3Ûpè tapwa̤ glè htò̌nṳ dě Cǒmara tûjûpwa̤ akholocahtǐkhû̌ pè? Ûpè tapwa̤ glè ihtǒǒ dě ata̤lṳhtò̌ho cahtǐ akûnu pè? b 4Pwǎ̤꤮ pǒ̤ kòyò htě acǔde mṳ̂plî, asò̌phlǒ cahtǐ, a saba kû̌kò ta̤yo̤ta̤gî tò̤, a bèlòhǎlòho kû̌kò yo̤ dǐkhò̌꤮ tò̤nu toǒ hǒ. c 5A glè nî̤bǎ ta̤howi̤ dě Cǒmara tûjûpwa̤ ǒ. Cǒmaradû̌ htě a ma̤lû̌htò̌ge nû̌ûnu ta̤pwa̤ pwe̤ǐlṳ ta ata̤sǔ ǒpe dǐcǎ꤮ tò̤. 6Kòyò hè̌o numî̌ a mî̌ pwa̤ htě a hè dě Cǒmaradû̌ aǒ. Pwa̤ htě a kè̌lǎ Yǎ̤kò acǒmaradû̌ ami̤sǎ. 7Kǒ we̤takhadû̌ toǒ, lṳ̂mo mò̌. Kǒ takhadû̌ děwǐkha toǒ, bòmohtò̌ mò̌. Khwǐdû̌ htě a ǒ ta ta̤sîrîdû̌sîrîhtû glè hènṳ hǒ. 8Khwǐdû̌ htě a ǒ ta ta̤sîrîdû̌sîrîhtû htǒo mî̌ ûpè? A mî̌ Cǒmara tûjûpwa̤ htě akhû̌ǎshû̌sho, apo̤aphǎ, a ma̤pè̤bò ta̤shěta̤pe̤. d 9Kǒ we̤takhadû̌ toǒ, lṳ̂mo mò̌. Kǒ takhadû̌ děwǐkha toǒ, bòmohtò̌ mò̌. Khwǐdû̌ htě a ǒ ta ta̤sîrîdû̌sîrîhtû glè hènṳ hǒ. 10Khwǐdû̌ htě a ǒ ta ta̤sîrîdû̌sîrîhtû htǒo mî̌ ûpè? A mî̌ Cǒmara tûjûpwa̤ htě a pǒǐ ta̤ lǒ̤꤮ bò, Khwǐdû̌ htě a ǒ ta ta̤sîrîdû̌sîrîhtû.
Copyright information for
KxfSCKRC