Psalms 29
Cǒmara tûjûpwa̤ ayo̤ pwe̤lṳ dě gili̤sǎplǎwi̤ akû
Khwǐdǎ̤wi̤ ata̤sò̌po̤.
1Kǒ mǒkhû̌tanaphû̌ toǒ, htû̌sò̌ǐ Cǒmara tûjûpwa̤. Htû̌sò̌ǐ ata̤sîrîdû̌sîrîhtû ta ata̤po̤ta̤phǎ. a 2Dǒhtû̌ǐ Cǒmara tûjûpwa̤ ami̤ ta̤sîrîdû̌sîrîhtû. Gene̤lò̤ sabahtò̌ Cǒmara tûjûpwa̤ htě a ǒ ta ata̤lîrakhacahtǐ. 3Cǒmara tûjûpwa̤ ayo̤ pwe̤lṳ dě shidû̌shite̤we̤kû. Cǒmaradû̌nu a sîrîdû̌sîrîhtû hî̌bǎ shû̌sho lò̤kèta mǒgomǒyi̤. Cǒmara tûjûpwa̤ yo̤pwe̤ te̤we̤tosobò dě shidû̌shite̤we̤kû. 4Cǒmara tûjûpwa̤ ayo̤pwe̤ po̤phǎshû̌sho mè̤mè̤̌. Cǒmara tûjûpwa̤ ayo̤pwe̤ lǒbe sǒsǒta ta̤sîrîdû̌sîrîhtû. b 5Cǒmara tûjûpwa̤ ayo̤pwe̤ ma̤la̤gabò sûyûmṳ adû̌atònò. Sǒmṳdû̌ ǒ dě Lebanokholoklanu toǒ bǎbǎ Cǒmara tûjûpwa̤ ma̤lòkhǔlòpo̤bò. 6A ma̤guyṳ Lebanokholokla sǒsǒta pṳ̂phaphû̌ pe̤. Sǐriokholo lè̌dě asǒsǒta pṳ̂mi̤ pe̤. c 7Cǒmara tûjûpwa̤ ayo̤pwe̤ ma̤htûhtò̌ tî̌lî̌bo. 8Cǒmara tûjûpwa̤ ayo̤pwe̤ ma̤guyṳbò lo̤mî̌shǒkla lo̤seměkhû̌. A ma̤guyṳpo̤ kû̌dǒ Khadeshǎga lo̤mî̌shǒkla lo̤seměkhû̌khû̌. 9Cǒmara tûjûpwa̤ ayo̤pwe̤ ma̤guyṳbò asǒmṳdû̌ cahtǐ. A ma̤lòsukèbò sǒlǎ dě mi̤kla. Kò lǒ̤꤮ bò ǒ dě ta̤lṳhtò̌hokûnu toǒ hî̌ lǒkho ta, “Ta̤sîrîdû̌sîrîhtû ǒkû̌ tû̌ta Cǒmara tûjûpwa̤.” d 10Cǒmara tûjûpwa̤ pǒǐ shidû̌. e Cǒmara tûjûpwa̤ mî̌ Khwǐ htě a pǒǐ ta̤ tûjûpwa̤. 11Cǒmara tûjûpwa̤ glè ǐ akòyò ta̤khû̌ta̤ǎ. A howi̤homò̤ akòyò ta ta̤gûjûkabǎ pě. f
Copyright information for
KxfSCKRC