Psalms 34

Htû̌sò̌ǐ Cǒmara htě a ma̤lû̌htò̌ge pa dě ta̤pò̤ta̤sha akla

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒoto̤to̤ mî̌ asò̌po̤ bǎ a jîkimi ana̤ Khwǐabǐmalè̌ htě awṳ̂hǎhtò̌tephekè nû̌û dě a hǎhtò̌khlè̌tephehtokè akhanu.

1He glè htû̌sò̌ǐ Cǒmara tûjûpwa̤ pṳ̂̌꤮ khîpṳ̂̌kha.

He htû̌sò̌ǐ ǒkǔpe yǎtò̤.

2Cǒmara tûjûpwa̤ ma̤ bǎ he akhû̌akhî, he glè htû̌sò̌ǐ yǎ.

Nogana̤de kòyò htě kò ma̤jîma̤jû asînu toǒ dě nosò̌le̤sò̌lò̤ asî.

3Pwe̤ǐlṳ plǒnûû̌ ta Cǒmara tûjûpwa̤ ata̤sîrîdû̌sîrîhtû hò꤮.

Pa htû̌sò̌ǐ plǒnûû̌ ta ami̤ hò꤮.

4He kwihtò̌ Cǒmara tûjûpwa̤ ata̤ma̤jè dě a kǒshǔ he.

A ma̤lû̌htò̌ge he dě ta̤sò̌gònò̤ ǐsha lǒ̤꤮ bò akla.

5Kòyò kè̌shunǎla̤ǐ yǎ ǒ toǒ glè sò̌le̤.

Asî glè sòwò̤ mi̤sǎpî̌tî̌ dǐkhò̌꤮ tò̤.

6Kòyò htě kò ma̤jîma̤jû nû̌û htǒotapwa̤ kwigwèbǎǐ Cǒmara tûjûpwa̤ dě a gana̤de nû̌ûta̤kwi.

A ma̤lû̌htò̌ge nû̌û dě ata̤pò̤ta̤sha lǒ̤꤮ bò akla.

7Kòyò htě a ǐsha bè̌dubè̌na̤ Cǒmara tûjûpwa̤nu, Cǒmara atanaphû̌ ǒpo̤te̤we̤, ma̤lû̌htò̌ge asî.

8Cǒmara tûjûpwa̤ wǒ pwî̌꤮ tènu kè̌lǎsî̌ya dě sî̌yaphlo lǒkho.

Kòyò htě a ǒtûdû nǎla̤ǐ nû̌ûnu toǒ, nî̤bǎ ta̤howi̤. ^a

9Kòyò htě a bè̌dubè̌na̤ Cǒmara tûjûpwa̤ toǒ, ǐsha lǒkho yǎ nî̌.

Kòyò htě a ǐsha nû̌û la̤ toǒnu, a lo̤bǎ ta̤ dě a nî̤bǎbò.

10Sî̌ò̌ tolophû̌ toǒ ǒti̤wi̤ sǎǎsò̌o ashǎ.

Pwǎtadě kòyò htě a kè̌lǎ Cǒmara tûjûpwa̤ glè nî̤bǎbò ta̤wǒ pṳ̂̌꤮ tacǎ.

11Hè lǒkho mò̌ hephû̌mǔphû̌khû sî꤮ gana̤de lǒkho heyo̤.

To ǐsha bè̌dubè̌na̤ Cǒmara tûjûpwa̤ hî̌tènu, he sû̌ǐtòwòǐ bǎ sî.

12Sî sò̌yṳ ta̤ǒhtûpwa̤ amo̤ ya?

Mî̌ sî sò̌yṳ ǒhtûpwa̤ mṳni̤mṳsahtû htě a ǒ ta ta̤sò̌le̤sò̌lò̤nu ya? ^b

13Dè hî̌ hî̌numî̌, sè̌rè̌ǐ naplî̤ dě a bǎ hî̌bǎ ta̤phû̌mò̤shî̌hto tò̤.

Htohǒtò̤ sè̌rè̌ǐpo̤ nakhû̌phě dě a bǎ hî̌bǎ lòhǎlòho tò̤.

14Cû̌tephekè ta ta̤phû̌mò̤shî̌hto, ma̤ ta̤ htě awǒ.

Jipwi̤ kè̌lǎ ta̤gûjûkabǎ dě pṳ̂gleměǐ yǎ. ^c

15Cǒmara tûjûpwa̤ khwè̌ǐ kòyòsò̌phlǒwǒ.

A gana̤de asîta̤kwihtò̌ ta̤ma̤jè. ^d

16Pwǎ̤tadě Cǒmara tûjûpwa̤ ma̤dǐdòshǔkè kòyò htě a ma̤ ta̤phû̌mò̤shî̌hto.

A nosibò asî dě kò gènè̤to̤pe asî dǐpwǎ̤꤮ tò̤.

17Bǎ kòyòcǒkòyòtè̤ kwihtò̌ ta̤ma̤jè akhanu, Cǒmara tûjûpwa̤ gana̤deshǔ ata̤kwi.

A ma̤lû̌htò̌ge asî dě asîta̤pò̤ta̤sha lǒ̤꤮ bò akla.

18Cǒmara tûjûpwa̤ ǒphǔkû̌ ta kòyò htě a sò̌phlǒpî̌.

A ma̤lû̌htò̌ge kòyò htě ata̤kè̌shuǐ ǒpe tò̤.

19Kòyòsò̌phlǒwǒ tapwa̤ kè̌shǐ shěto̤bǎplṳ̂ ta̤pò̤ta̤sha pwǎ̤tadě Cǒmara tûjûpwa̤ ma̤lû̌htò̌ge yǎta ta̤nu toǒ lǒ̤꤮ bò akla.

20Cǒmara tûjûpwa̤ ma̤kwaǐ wǒ꤮ mè̤mè̤̌ akhwǐ.

A nola̤ga nû̌û dǐbǒ꤮ tò̤. ^e

21Ta̤phû̌mò̤shî̌hto htě kòyòphû̌mò̤ ma̤nu toǒ, a glè ma̤sigesǒ tû̌ asî.

Kòyò htě a sò̌khě kòyòsò̌phlǒwǒ toǒnu, Cǒmara glè cèrò asî.

22Cǒmara tûjûpwa̤ htè̌ge apwa̤ma̤ta̤phû̌.

Kòyò htě a hèǒtûdû ana̤ dě aǒ toǒnu, a khòbǎ ta̤cèrò tò̤.