Psalms 36
Kòyòhǎkhû̌phû̌ ata̤sǔ ta Cǒmara ta̤wǒ
Cǒmara tûjûpwa̤ apwa̤ma̤ta̤phû̌ Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌honu ta̤pwa̤ aya.
1Kòyò htě a ma̤takǎshǔ ta̤ toǒnu ta̤phû̌mò̤shî̌hto ǒ nû̌ûsò̌phlǒkû dě a nosho nû̌û. Asî gènè̤ lǒkho ta lo̤bǎǐsha bè̌dubè̌na̤ Cǒmara tò̤. a 2A gènè̤dû̌ gènè̤htò̌yî̤ tûlû̌꤮ shû̌ ana̤ akhû̌akhî, a kè̌shǐ lò̤jòpe ata̤sǔta̤plěnu toǒ tò̤. Mè̤tò̤mî̌ a khû̌khwè lò̤jòpe ata̤sǔ tò̤tò̤. 3Ata̤hî̌bǎhî̌shonu còcè̌꤮ ta ta̤phû̌mò̤shî̌hto, ta̤lòhǎlòho. A wîkèbò ta̤sî̌ta̤jò, ta̤ma̤wǒta̤. 4Bǎ a hǎmoǒ dě la̤mi̤khû̌ akhanu bǎbǎ, a ta̤yè̤lò̤nǎ la̤ma̤ còcè̌ ta̤phû̌mò̤shî̌hto. A ma̤pe ta̤wǒ dǐcǎ꤮ tò̤. A wîkè nǒ ta̤phû̌mò̤shî̌hto tò̤tò̤.Cǒmara tûjûpwa̤ ata̤wǒ
5Kǒ Cǒmara tûjûpwa̤, nata̤mo̤ǐ htě ahǎbòjò tò̤nu adû̌ sǒsǒta mǒkhû̌. Nacǒtè̤ta nayo̤ htǒo alè̤ sǒsǒta mǒla̤. 6Nata̤te̤ta̤mǎnu asǒsǒta shǒdû̌shǒhtû. Nata̤ma̤toma̤bǎnu asǒsǒta shidû̌shite̤we̤ yo̤gutṳ̌. Kǒ Cǒmara tûjûpwa̤, na kè̌ǐkhwè̌ǐ wǒ꤮ mè̤mè̤̌ kòyòhǎkhû̌phû̌ ta ta̤phû̌ta̤li̤. 7Kǒ Cǒmaradû̌, nata̤mo̤ǐ htě ahǎbòjò tò̤ htǒo ale̤dû̌pwî̤htû꤮ mè̤mè̤̌. Kòyòhǎkhû̌phû̌ lǒ̤꤮ bò hèǒ to̤dû dě naǒ sǒsǒta shîmo̤ ma̤kwaǐ aphû̌ aděla̤. 8Asî ǎkǒobe, shǎǎshǎo ǒlǒǒbe dě nahǐkûnu. Na ǐolǒbe asî shi ta nata̤wî̤ta̤wǒ dě nashilo̤dû̌kûnu. 9Na mî̌ shipo̤htǎ htě a ǐ kò sò̌htûpwa̤ tapwa̤. Nata̤lî akhû̌akhî, pa kè̌shǐjò ta̤lî. 10Tûrû̌꤮ mo̤ǐ sělěpo̤ pwa̤ htě a sî̌ya nanu ta nata̤mo̤ǐ htě ahǎbòjò tò̤nu. Tûrû̌꤮ ǐpa̤ nata̤cǒta̤tè̤nu ta kòyòcǒkòyòtè̤nu. 11Nohèshě pûma̤ kòyòbè̌htò̌yî̤ ana̤nu toǒ ta he ma̤. No wṳ̂khlè̌kè pûma̤ kòyòphû̌mò̤nu toǒ ta he ma̤. 12Kè̌mò̌ lǒkho, kòyòphû̌mò̤ lòkhǔlòpo̤bò hǒ. Kò bǎlòte̤kè asî dě asî kihtǒbò̌pe tò̤ hǒ.
Copyright information for
KxfSCKRC