Psalms 37

Kòyòphû̌mò̤ ta kòyòwǒ aklè̌ gutṳ

Khwǐdǎ̤wi̤ ata̤sò̌po̤ htû̌sò̌ǐ.

1Kòyòkhuphû̌mò̤ akhû̌akhî, sò̌phlǒdû̌ sò̌phlǒpî̌ pûma̤.

Kòyò ma̤ ta̤sǔta̤plě akhû̌akhî, sò̌khě kû̌pûma̤ kò ma̤.

2Teděsǎ akû, asî nokhwekè sǒsǒta mi̤mṳ pě.

Ǒyî̤tò̤ pě, asî khwesikèbò lò̤ta sǒdosǒlǎ pě.

3Yṳǎ Cǒmara tûjûpwa̤, ma̤ lǒkho ta̤wǒ.

Nṳǒ bǎ ga htě a ǐ nahtǒo dě ǒ tû̌ta sò̌phlǒ ta̤gûjûkabǎ nî̌.

4Sò̌le̤sò̌lò̤ dě Cǒmara tûjûpwa̤ akû.

A glè ǐtû̌ nasò̌phlǒ ata̤sò̌yṳ.

5Ǐlò̤bò nata̤ǒhtûpwa̤ dě Cǒmara tûjûpwa̤ acǔdekû.

Nǎla̤ǐ yǎ dě a ma̤jè tû̌ta na.

6A glè nolîhtò̌ nata̤cǒta̤tè̤ htǒonu pwǐ lṳmṳlîbû.

A glè norakhahtò̌ nata̤ma̤toma̤bǎ htǒonu pwǐ lṳmṳsha.

7Pwǎpwǎ꤮ ǒ tû̌ dě Cǒmara tûjûpwa̤ alo̤mo̤, ǒpo̤ sò̌phlǒhtû ǐ ta a glè ma̤ bǎ na.

Bǎ kòyòphû̌mò̤ dû̌yò̤htò̌sa ta asîklè̌asîklo akhanu bǎbǎ, bǎ asî ata̤yè̤lò̤nǎ shokhû̌ye̤yo̤ ma̤phû̌mò̤ kò htûhtò̌bò̌ akhanu bǎbǎ, sò̌phlǒdû̌ sò̌phlǒpî̌ pûma̤ma̤.

8Bè̌ǒkǔkè nata̤sò̌phlǒdû̌, cû̌tephekè ta ta̤sò̌phlǒdû̌ gûhî.

A noma̤ còcè̌꤮ pwǎ na ta̤phû̌mò̤shî̌hto akhû̌akhî, sò̌phlǒdû̌ sò̌phlǒpî̌pe pûma̤.

9Kòyòphû̌mò̤ toǒnu a hǎmǎkè pě.

Kòyò htě a kè̌shunǎla̤ǐ Cǒmara tûjûpwa̤ htǒo asî nî̤bǎ shiga htě Cǒmara olò̤nṳ asî htǒo pě. ^a

10Bǎ teděsǎ akû pě, kòyòphû̌mò̤nu toǒ glè hǎmǎkèbò.

Na lṳ̂kè̌lǎ takǎ asî bǎbǎ, na kè̌shǐjòpe asî tò̤.

11Kòyò htě a shò̌lò̤ asò̌phlǒ toǒnu, shigahtǒo a glè htû asî û̌cata̤bî̌. ^b

A nî̤bǎ ta̤ǒmo̤ǒkwǐ pṳ̂̌꤮ tacǎ htě Cǒmara ǐ htǒonu pě.

12Kòyòkhuphû̌mò̤ shokhû̌ye̤yo̤ ma̤phû̌mò̤ lǒkho kòyòsò̌phlǒwǒ.

A ǎmṳ̂bò akhǎ.

13Pwǎ̤tadě Běcǎ ta̤adû̌ sî̌ya ta mṳni̤ htě kò glè cèrò asînu aphǔhè hǒ akhû̌akhî, Běcǎ ta̤adû̌ sǎya̤ǐpwǎ kòyòphû̌mò̤nu toǒ.

14Kòyòkhuphû̌mò̤ toǒ, ma̤pûhǐ a ma̤si kòyòshuphǔshèwèphû̌, kòyò shodota̤ma̤jè, kòyòcǒkòyòtè̤ toǒ ayanu, a běhtò̌nǎ anò̌she, a wo̤htò̌nǎ akhlǐ.

15Pwǎ̤tadě asî glè shusi gesǒtû̌ ana̤.

Asîkhlǐ bǎbǎ kò glè yǒla̤gakèbò.

16Kòyòsò̌phlǒwǒ ata̤dû̌yò̤htò̌sa tîkî̌꤮ phû̌pwǎnu, awǒplṳ̂ khlope ta kòyòphû̌mò̤ ata̤dû̌yò̤htò̌sa.

17Ma̤tè̤hî̌dě Cǒmara tûjûpwa̤ glè yǒla̤gakèbò kòyòphû̌mò̤ toǒ acû̌go.

A glè ma̤jè kòyòsò̌phlǒwǒ.

18Cǒmara tûjûpwa̤ sî̌ya kòyò htě ata̤sǔ ǒtò̤nu toǒ amṳni̤.

Asî û̌cata̤bî̌ glè ǒměǒgle wǒtû̌ tûjûpwa̤.

19Bǎ gapò̤gasha akha bǎbǎ, asî la̤sòwò̤ gûla̤ ǒtò̤.

Bǎ gawi̤gakodû̌ akha bǎbǎ asî ǎkǒobebǎ.

20Kòyòphû̌mò̤ lè̌dě a glè sihǎmǎkèbò.

Pwa̤sò̌khě Cǒmara tûjûpwa̤ glè hǎmǎkèbò pwǐ mi̤pho ǒ dě ya̤dakhû̌.

Asî glè hǎmǎkèbò lò̤ta mî̌khǔ.

21Kòyòphû̌mò̤nu a phî̌bǒ kòta̤ dě a ǐ gesǒ kò tò̤.

Kòyòsò̌phlǒwǒnu a ǐ kò dě a sò̌le̤ǐ tò̤.

22Kòyò htě Cǒmara tûjûpwa̤ howi̤homò̤ nû̌û toǒnu, shigahtǒo a glè htû nû̌û û̌cata̤bî̌.

Kòyò htě Cǒmara tûjûpwa̤ ǐsholè̌ nû̌û toǒ dě kò glè wṳ̂hǎhtò̌cû̌tepheyî̤kè asî.

23Cǒmara tûjûpwa̤ yṳ̂klè̌nè̌klò kòyò htě a mo̤ǐ nû̌ûnu ta̤pwa̤ akhǎlǎla̤kha.

A sò̌phlǒto nû̌ûklè̌.

24Cǒmara tûjûpwa̤ pṳ̂gleměǐ nû̌û ta acǔde akhû̌akhî, a shî̌tikhlǐ pwǎ̤tadě a lòkhǔ tò̤. ▼

▼Htǒoto̤to̤ amûasǎ mî̌ a cû̌tî̤lî̤ klè̌ pwǎ̤tadě a cû̌to̤ dě klè̌sǔklè̌bǎ tò̤.

25Dě he phijaû̌ to̤htû̌ he mo̤pwa̤ khònò̤htǒo, kòyòsò̌phlǒwǒ toǒ bǎbǎ, aphû̌ali̤ toǒ bǎbǎ, Cǒmara tûjûpwa̤ wîkè asî dě a cû̌kwiǎ kòshǎnu, he kè̌shǐ nǒ dǐkhò̌꤮ tò̤.

26Pṳ̂̌plǎplǎ a sò̌yṳǐshǔ kòyò, a ǐbǒko kòyò, dě Cǒmara howi̤ nû̌ûphû̌li̤.

27Wîkèbò ta̤phû̌mò̤shî̌hto, ma̤ lǒkho ta̤wî̤ta̤wǒ, pěmî̌ sî ǒbǎ dě gakû tûjûpwa̤.

28Cǒmara tûjûpwa̤ mo̤ǐ ta̤ma̤toma̤bǎ, a wîkè nǒ akòyòcǒkòyòtè̤ tò̤.

A ma̤kwaǐ asî tûjûpwa̤.

Kòyòphû̌mò̤ aphû̌ali̤ toǒ lè̌dě kò glè wṳ̂hǎhtò̌cû̌ tepheyî̤kè asî.

29Kòyòsò̌phlǒwǒ toǒnu, shigahtǒo a glè htû nû̌û û̌cata̤bî̌.

A glè ǒbǎ bǎnu tûjûpwa̤ talakhǎ.

30Kòyòsò̌phlǒwǒ hî̌bǎ còcè̌꤮ pwǎ ta̤sî̌ta̤jò, ^d

A dǒhtû̌ǐ còcè̌꤮ pwǎ ta̤tota̤bǎ.

31Acǒmaradû̌ ta̤sû̌ta̤tòwò ǒměǒgle nû̌û sò̌phlǒkû.

A cû̌klè̌ dě a lòkhǔ tò̤.

32Kòyòphû̌mò̤ shokhû̌ye̤yo̤ dò̌nǎ kòyòsò̌phlǒwǒ aklè̌.

A kè̌lǎ ma̤si asî.

33Pwǎ̤tadě Cǒmara tûjûpwa̤ wîkè kòyòcǒkòyòtè̤ dě kòyòphû̌mò̤ acǔdekû tò̤.

Bǎ asî to̤ dě ta̤cèrògûla̤ akhapě, kò cèrò to̤ asî tò̤tò̤.

34Ǒpo̤kè̌shuǐ Cǒmara tûjûpwa̤, pṳ̂gleměǐ ata̤sû̌ta̤tòwò.

Cǒmara tûjûpwa̤ phǒhtò̌yî̤ na pě, a ǐ na shiga dě a htû naû̌cata̤bî̌ pě.

Na kè̌shǐ kò wṳ̂hǎhtò̌cû̌ tepheyî̤kè kòyòphû̌mò̤nu toǒ pě.

35He kè̌shǐ kòyòphû̌mò̤, kòyòkhukòyòhî htě a shû̌sho tapwa̤ sǒsǒta sǒmṳdû̌tònò dǒhtò̌ tû̌ dě aphǎkhû̌.

36Pwǎ̤tadě teděsǎ akû, a sikè, a hǎmǎkè pě.

He kè̌lǎ yǎ pwǎ̤tadě he kè̌shǐjòpe yǎtò̤.

37Gènè̤kè̌ lǒkho kòyò htě ta̤sǔ ǒtò̤ ta kòyòcǒkòyòtè̤nu.

Asî mî̌ asò̌phlǒwǒ, a sò̌dohobî̌ dě alo̤mo̤ tokho pěnu a ǒmo̤ǒkwǐ pě.

38Pwǎ̤tadě bò꤮ ta̤ma̤sǔphû̌ toǒnu a glè pî̌kèbò.

Nǒkò gutṳ̌lò̤ pě, kòyòphû̌mò̤ htǒotoǒ a gusiguhǎmǎbò.

39Cǒmara tûjûpwa̤ ma̤lû̌htò̌ge kòyòsò̌phlǒwǒ.

Bǎ asî shěto̤bǎ ta ta̤pò̤ta̤sha akhanu, a mî̌ asî la̤ǒtûdû aměagle.

40Asî hèǒtûdû lǒkho ana̤ dě Cǒmara tûjûpwa̤ aǒ akhû̌akhî, a ma̤jo asî, a ma̤lû̌htò̌geǐ asî.

A ma̤lû̌htò̌ge asî kòyòphû̌mò̤ acǔdekû dě a ma̤kwaǐ asî.