Psalms 38

Khwǐdǎ̤wi̤ ata̤htû̌sò̌ǐ, ata̤sî̌yahtò̌ ata̤lṳhtò̌ǐ

Khwǐdǎ̤wi̤ ata̤sò̌po̤ htû̌sò̌ǐ. Bǎ akwigwèbǎǐhtò̌ Cǒmara akhanu, a sò̌po̤ ta̤sò̌po̤ htǒoto̤to̤.

1Kǒ Cǒmara tûjûpwa̤, bǎ na sò̌phlǒdû̌ akhanu, sǎhtǎ pûma̤ he ma̤.

Bǎ na sò̌phlǒhtò̌ akha bǎbǎ, phlě pûma̤ he ma̤.

2Napla̤ hèshěnṳbò dě he we̤plǎ, na shò̌lòte̤ he.

3Nata̤sò̌phlǒdû̌ akhû̌akhî, asha mǔsîpwî̤bò hena̤ sapwa̤bò.

He ta̤sǔ akhû̌akhî, he na̤sapwa̤ toǒ shî̌shabò hǒ.

4Heta̤sǔta̤plě htò̌plû̌bǐbò he sǒsǒta ta̤bǐta̤ò̌ ahtǒ.

Ahtǒ tûlû̌꤮ shû̌le heya.

5He ma̤takǎ tû̌ heya akhû̌akhî, he ta̤sha toǒ asobò, amihǎhtò̌bò hǒ.

6Ashajîshajû mè̤mè̤̌ he akhû̌akhî, he û̌tṳglulò̤kè.

Hehǎwo ti̤nǐ̤ mṳhǎ.

7A shakhwǐshakhû̌ bò heshè̌kò.

Asha mǔsîpwî̤bò hena̤ sapwa̤.

8Hekhû̌ǎ hǎbò mṳ̂sîglîkè hǒ, he la̤gala̤prû̌ lò̤kè hǒ.

He sò̌phlǒgu sò̌phlǒgè mè̤mè̤̌ akhû̌akhî, he kookasha hǒ.

9Kǒ Běcǎ ta̤adû̌, he sò̌yṳ kwè̌꤮ titènu, na sî̌yabòtû̌ hǒ.

Na gana̤debò tû̌ heta̤kookasha.

10Aguagè mè̤mè̤̌ hesò̌phlǒ, hekhû̌heǎ ǒpe tò̤tò̤.

Akhǐbò hemi̤sǎ.

11Heta̤sha akhû̌akhî, hekhobǒsû̌ ta hekhobǒsû̌mo̤ toǒ cû̌pa̤kèbò he.

Hekhlilè phǔtînî̌ bǎbǎ, a cû̌ǒ tepheyî̤kèbò ta he.

12Kòyò htě a kè̌lǎ ma̤si he toǒ dò̌nǎ lǒkho htò̌glo.

Kòyò htě a sò̌yṳ ma̤bǎsha he toǒ hî̌pî̌hî̌lṳ̂kèbò he.

pṳ̂̌ni̤ni̤ a shokhû̌ye̤yo̤ ma̤ lòhǎlòho lǒkhopwǎ he.

13Pwǎ̤tadě he sǒsǒkè ta kòyò nò̌kulǎ koo dě a gana̤depe asî ta̤hî̌bǎ tò̤.

He sǒsǒkè ta kòyòpè̌ htě a hî̌shǔjòpe asî tò̤.

14He htûhtò̌kè kòyò htě a gana̤de kû̌pe kò dǐcǎ꤮ tò̤, a htè̌shǔjò kû̌pe kò dǐcǎ꤮ tò̤nu hǒ.

15Kǒ Cǒmara tûjûpwa̤, he ǒyṳ̂kè̌shuǐ na.

Kǒ Běcǎ ta̤adû̌ mî̌ hecǒmaradû̌, na hî̌bǎgeshǔ lòtṳ̌ he pě.

16He hî̌ ta, “Bǎ he lòkhǔlòpo̤ akhanu, nosò̌le̤sò̌lò̤ pûma̤ asî ma̤, dè mè̤tò̤mî̌ nophî̌dû̌phî̌htû pûma̤ asîna̤ dě hekhû̌ ma̤.”

17He glè̌ htò̌tukhu lòkhǔ tikhlǐ hǒ, dě asha꤮ hènè he na̤.

18He olò̤mèlò̤tû̌ heta̤sǔta̤plě.

He sǎpla̤sǎyṳ ǐtû̌ heta̤ma̤sǔ. ^a

19Pwa̤sò̌khě he toǒ a ǒshǔǒmo̤, akhû̌ǎshû̌sho mè̤mè̤̌.

Ta̤wi̤ta̤kè̌ ǒ dǐcǎ꤮ tò̤ pwǎ̤tadě kòyò htě a sò̌khěkhû̌khwè nòdû̌ henu a ǒplṳ̂ǒphǎ mè̤mè̤̌.

20Bǎ he gûkû̌ ta̤wî̤ta̤wǒ akhanu, asî dǒ heyo̤.

He ma̤bǎ asî ta̤wî̤ta̤wǒ pwǎ̤ta asî ma̤geshǔ he ta ta̤phû̌mò̤shî̌hto. ^b

21Kǒ Cǒmara tûjûpwa̤, wîkè pûma̤ he ma̤.

Kǒ hecǒmaradû̌, ǒtepheyî̤ pûma̤ ta he ma̤.

22Kǒ Běcǎ ta̤adû̌, pwa̤ma̤lû̌htò̌ge he, hè ma̤jè phwèmò̌ he nî̌.