Psa 39 | KxfSCKRC | STEP | Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Dě ta̤sò̌po̤ htû̌sò̌ǐ htǒoto̤to̤ mî̌ Jedutu htě a yṳ̂klè̌nè̌klò pwa̤sò̌po̤htû̌sò̌ǐ ta̤nu tapwa̤ aya. He hî̌lò̤ ǐtû̌ hena̤ ta, “He ma̤ titètè̌꤮ bǎbǎ, ma̤pûhǐ he ma̤sǔ ta̤ tò̤nu, he glè sè̌rè̌ǐ heta̤hî̌bǎ. “Dě kòyò sò̌phlǒphû̌mò̤shî̌hto toǒ alo̤mo̤nu, he glè pobǒbǐ꤮ ǐ hekhû̌phě.”

Psalms 39

1 He hî̌lò̤ ǐtû̌ hena̤ ta, “He ma̤ titètè̌꤮ bǎbǎ, ma̤pûhǐ he ma̤sǔ ta̤ tò̤nu, he glè sè̌rè̌ǐ heta̤hî̌bǎ.

“Dě kòyò sò̌phlǒphû̌mò̤shî̌hto toǒ alo̤mo̤nu, he glè pobǒbǐ꤮ ǐ hekhû̌phě.”

2 Tûklû̌klû̌꤮ he ǒ dě he hî̌bǎ dǐcǎ꤮ tò̤.

Yo̤sǎ htě awǒ toǒ bǎbǎ, he hî̌bǎhtò̌ tò̤ pwǎ̤tadě he ta̤guta̤gè toǒ a tǐ̤꤮ ǒplṳ̂ htò̌htò̌.

3 Hesò̌phlǒdû̌ sò̌phlǒpî̌ mè̤mè̤̌.

He dè gènè̤ shosho, he sò̌phlǒ tǐ̤꤮ pî̌ shosho, gutṳ̌lò̤ dě he hî̌bǎhtò̌kè.

4 Kǒ Cǒmara tûjûpwa̤, he ta̤ǒhtûpwa̤ dě hǎkhû̌htǒo a glè gutṳ bò̌khòtè?

Hemṳni̤mṳsa toǒ aphǒ pwî̌꤮ tènu, dǔlṳ he tò̤ya.

Hemṳni̤mṳsa htǒo a phwè pwî̌꤮ tènu ǐsî̌ya he tò̤ya.

5 Dè hî̌mè̤mè̤̌mî̌, na ǐ he mṳni̤mṳsa aphǒ꤮ mè̤mè̤̌.

Hemṳni̤mṳsa htǒo dě nalo̤mo̤nu mî̌ amè̤ nǒ dǐcǎ꤮ tò̤.

Dè hî̌te̤mǎ mî̌, kòyòhǎkhû̌phû̌ lǒ̤꤮ bò ata̤ǒhtûpwa̤ mṳni̤mṳsa htǒonumî̌ alò̤ta sǎhtò̌sǎnṳ pwǎ. ^a

6 Kòyòhǎkhû̌phû̌ ata̤ǒhtûpwa̤nu teděsǎ akû a glè hǎmǎkèbò sǒsǒta ta̤yo̤ǔ.

Asî jipwi̤ ǎwè̤ lòdǒlòde nòdû̌.

Asî kè̌lǎ bè̌plǒ ta̤dû̌yò̤htò̌sa pwǎ̤tadě ta̤dû̌yò̤htò̌sa htǒo ûpè glè̌ nî̤bǎ pěnu kò sî̌ya dǐpwǎ̤꤮ tò̤. ^{▼▼Lǔka 12:20}

7 Hǐnuakhû̌akhî, kǒ Cǒmara tûjûpwa̤, khònò̤htǒo he bǎ kè̌shuǐpe titè?

He la̤kè̌shuǐ numî̌ aǒ pwǎ tǒ̤꤮ na.

8 Ma̤lû̌htò̌ge he ta heta̤ma̤sǔ lǒ̤꤮ bò htǒo.

Noǐsho pûma̤ he ta kòyòphû̌mò̤shî̌htonu toǒ ma̤.

9 Ta̤ htǒtoǒ mî̌ na nohtûhtò̌ pwǎ akhû̌akhî, cî̌cî̌ heǒkè pwǎ hǒ, he hî̌pe dǐcǎ꤮ tò̤.

10 Phlěshape pûma̤ he ma̤. ^c

Na phlě mè̤mè̤̌ he dě he glè̌ phǔsi tînî̌.

11 Kò ma̤ ta̤sǔta̤plě dě na sǎhtǎ kò, na phlě kò, na ma̤pî̌ma̤lṳ̂kèbò asî ta̤sò̌yṳ pwǐ sǔpha ěpwî̌kèbò ta̤kî̌ta̤kû̌. ^d

Dè hî̌mè̤mè̤̌ mî̌, kòyòhǎkhû̌phû̌ lǒ̤꤮ bò ata̤ǒhtûpwa̤ mṳni̤mṳsa htǒo numî̌ alò̤ta sǎhtò̌sǎnṳ pwǎ.

12 Kǒ Cǒmara tûjûpwa̤, gana̤de pû bǎ heta̤kwisabahtò̌ na, gana̤depo̤pû bǎ he kwigwèbǎǐ nata̤ma̤jè htǒo.

Bǎ hehǎwo akhanu, jîkoo pû ma̤.

Děwǐkha pwǐ hephihephu lǒ̤꤮ bò htû shǐpwa̤shǐmè̤nu, he htû sǒsǒ nashǐtè̤mè̤ pwǐ asînu.

13 Bǎ he si dě he hǎhtò̌cû̌ tephe hǒtò̤ akhanu, ma̤pûhǐ he ya̤bò̌ gesǒ ayanu, sò̌phlǒdû̌pe pûma̤ he ma̤ nî̌.