Psalms 44

Ta̤kwisaba ta ta̤ma̤kwaǐ aya

Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Ebrephû̌yo̤nu, a kaǎ ta̤sò̌po̤ htǒo ta Misakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ dě Kǒri akhlialè toǒ sò̌po̤ nû̌û.

1Kǒ Cǒmaradû̌, dě꤮ wǐkha paphipaphusî ahtukha, nama̤ kwè̌꤮ bǎ asî hî̌tènu, asî dǒhtû̌ǐlṳ gebǎ pa dě pa gana̤de ta pana̤.

2Na wṳ̂hǎhtò̌kè khlilèhǔwa̤ toǒ ta nata̤sîrîshû̌sho, na noǒ paphipaphusî toǒ bǎ gakû bǎo.

Na ma̤pî̌ma̤lṳ̂kèbò khlilèphû̌hǔwa̤ sîtoǒ, na ǐ dû̌htò̌htûhtò̌ paphiphu sîtoǒ.

3Asî pǒǐ shiga htǒo numî̌ asî nò̌she akhû̌akhî mè̤tò̤. ^a

Asî ta̤ma̤pè̤ htǒonu bǎbǎ, asî khû̌ǎ tû̌ akhû̌akhî, mè̤tò̤tò̤.

Asî ma̤mo̤ nasò̌phlǒ, nata̤sîrîshû̌sho, nakhû̌naǎ, nata̤kè̌dû̌ asî akhû̌akhî, asî ma̤pè̤ ta̤.

4Na mî̌ hekhwǐ, hecǒmaradû̌ dě a ǐ Israel ▼

▼Israel ta Yǎ̤kò mî̌ tapwǎ̤꤮ pa.

khlilèphû̌ ata̤ma̤pè̤.

5Nakhû̌nakhî pa ma̤sima̤hǎmǎ bòmṳ̂sîglîkè tṳtṳ pwa̤khû̌khwè pa toǒ.

Nami̤ akhû̌akhî, pa glè yî̤pò̌cû̌ kèbò pwa̤khû̌khwè pa toǒ.

6He nǎla̤ǐ tû̌ hekhlǐ dî̌kî̌꤮ tò̤.

He nò̌she꤮ mî̌ a ǐjò he ta̤ma̤pè̤ tò̤tò̤. ^c

7Na noma̤pè̤kè pa ta pwa̤sò̌khě panu.

Na nosòwò̤kè kòyò htě a sò̌khěkhû̌khwè pa.

8Cǒmaradû̌ ma̤pè̤kèbò pwa̤sò̌khě pa toǒ akhû̌akhî, pa htû̌sò̌ǐ yǎ dě kòhǔwa̤ lo̤mo̤ ti̤nǐ̤ mṳhǎ.

Pa glè htû̌sò̌ǐ nami̤ tûjûpwa̤.

9Pwǎ̤tadě khònò̤htǒo na wîkè pa, na nosòwò̤kè pa.

Na htò̌shěhtu kû̌pe ta̤shě ta pakliphû̌ toǒ tò̤.

10Na nokhlè̌gekèbò pa ta pwa̤sò̌khě pa toǒ ala̤. ^d

Kòyò htě asò̌khěkhû̌khwè pa toǒ asò̌yṳ titètè̌꤮ dě a phî̌sigwibò pata.

11Na noma̤sikèbò pa pwǐ꤮ kò ma̤si sophû̌.

Na ma̤htò̌pò̌htò̌shî cû̌kèbò pa dě khlilèhǔwa̤ toǒ akla. ^e

12Na shaǎpwî̤ja tû̌pwǎ nakòyò. ^f

Na kwidû̌kû̌ asî pwî̤ tò̤.

13Na nopi̤jishǐcǒ sòwò̤, hî̌jîhî̌jû, luya̤bò pa ta kòyò ǒ te̤wǐte̤we̤ ta pa.

14Dě khlilèhǔwa̤ toǒ aklanu, na nopi̤jishǐcǒ luya̤bò kò ta pa. ^g

Kòyò gènè̤pî̌tî̌ pa, a jîsutǔ ame̤htò̌ nǒlò̤ lǒkho ahǐkǒ.

15He gènè̤sòwò̤ǐ mè̤mè̤̌ hena̤ ti̤nǐ̤ mṳhǎ.

Hemi̤sǎ ǒkû̌pe kò tò̤.

16Kò pi̤jishǐcǒ he, kò hî̌khǒhî̌wa̤ he, kò ma̤ he hǐnu dě pwa̤sò̌khě he, pwa̤ sò̌yṳ ma̤sha he toǒ alo̤mo̤ akhû̌akhî, he khòbǎ hǐnu.

17Pa shope̤nǎǐkè na tò̤tò̤, nata̤wṳ̂dò dě pa cû̌tûlû̌khatî̤lî̤ tò̤tò̤, pwǎ̤tadě pa khòbǎbò ta̤htǒo toǒ.

18Pasò̌phlǒ tèlè̌khǒpe nǒ tò̤.

Pa cû̌khǒkè nǒ naklè̌ dǐkhò̌꤮ tò̤tò̤. ^h

19Pwǎ̤ta na ma̤la̤gala̤prû̌ lò̤kè pa bǎ chyǐmi̤ la̤ǒ agûla̤.

Na bè̌ǒkè pa dě ta̤si la̤pǒ agûla̤.

20Pa dè shope̤nǎǐkè pacǒmaradû̌, pa dè cû̌ sabahtò̌khǒ Cǒmara ahǔwa̤ toǒ hî̌mî̌, 21Cǒmaradû̌nu a sî̌yabòtû̌ pata̤gènè̤hǔ gènè̤sè̌ toǒ akhû̌akhî, ta̤htûhtò̌ htǒotoǒ mî̌ a sî̌ya nòtò̤ ya?

22Pa gûkû̌ nakò akhû̌akhî, pa kè̌shǐshěto̤bǎ ta ta̤si ti̤nǐ̤ mṳhǎ.

Kò gènè̤ pa pwǐ sophû̌ htě kò glè̌ ma̤si nû̌ûnu. ⁱ

23Kǒ Běcǎ ta̤adû̌ ihtǒma̤ mò̌, na cû̌꤮ hǎmoǒshope̤ ma̤titè?

Ihtǒma̤ mò̌, wîkè pûma̤ pa ma̤.

24Na cû̌ htû̌tiwǐkhǒkè tǒ̤ nami̤sǎ ma̤tè? ^j

Na shope̤nǎkè nò pa khòjîkhòjû htǒonu ta kò ma̤jîma̤jû pa htǒotoǒ hǒ ya?

25Pa lò̤jû dě lòkhǔpo̤kè dě hǎmǔkla.

Palòkhǔ lò̤lo dě hǎkhû̌.

26Hèma̤jè mò̌ pa, na mo̤ǐ pa ta nata̤mo̤ǐ htě ahǎbòjò tò̤ htǒo akhû̌akhî, ma̤lû̌htò̌ge mò̌ pa tò̤ya.