Psalms 50

Ta̤sabahtò̌ ta ato

Asa ata̤sò̌po̤ htû̌sò̌ǐ.

1Cǒmaradû̌ htě apo̤phǎshû̌sho, Cǒmara tûjûpwa̤ htǒotapwa̤ hî̌bǎlò̤ dě a kaǎhèbò kòyò ǒ dě hǎkhû̌ lṳmṳhtò̌ tokho to̤dě lṳmṳlò̤ tokho lǒ̤꤮ bò.

2Cǒmaradû̌ ǒ dě Sǐokholokhû̌, Sǐokholo mî̌ kholo awî̤awǒ gutṳ̌, Cǒmara ata̤lîta̤rakha ǒlṳhtò̌ bǎnu.

3Pacǒmaradû̌ hèlò̤ pě dě sî̌tukǔkǔ꤮ a hèlò̤ tò̤.

Mî̌plo̤ gècû̌bò nû̌ûlo̤mo̤, gili̤sǎplǎwi̤ sǎte̤we̤bò nû̌û.

4Cǒmara glè cèròtocèròbǎ akòyò.

A kaǎhè mǒkhû̌ ta hǎkhû̌ pwǐ la̤htû pwa̤sasî̌.

5A hî̌ ta, “Kòyò htě acǒtè̤ta ayo̤, a ma̤si lṳtòhtò̌ ta̤phû̌ta̤li̤ dě ama̤ ta̤wṳ̂dò ta he toǒnu, hèǒplǒ lǒkho dě heǒ.”

6Cǒmara mî̌ pwa̤ htě a cèròcǒcèròtè̤.

Mǒkhû̌ hî̌ nû̌û ta Cǒmara cèrò ta̤nu atoabǎ mè̤mè̤̌.

7“Kǒ hekòyò sî, gana̤de lǒkho, he glè hî̌bǎ sî.

“Kǒ Israelphû̌sî, he glè yṳ̂ sî ta sî ma̤sǔ, he mî̌ Cǒmaradû̌, he mî̌ sîcǒmaradû̌.

8“Sî ma̤si lṳtòhtò̌ ta̤phû̌ta̤li̤nu toǒ akhû̌akhî, sî shû̌gè lṳtòhtò̌ ta̤ dě helo̤mo̤ pṳ̂̌꤮ taplǎnu toǒ akhû̌akhî, he sǎhtǎ sî tò̤.

9“Pṳ̂pha tododo dě napṳ̂po̤kûnu bǎbǎ, pè̤ dě napè̤po̤kûnu toǒ bǎbǎ, he lo̤bǎ tò̤.

10“Ma̤tè̤hî̌dě lǒ̤꤮ bò ta̤phû̌ta̤li̤ ǒ dě mi̤kla toǒ bǎbǎ, pṳ̂pa̤na̤ ǒ dě kholo ama arî̌kû toǒ bǎbǎ, hetabò.

11“Lǒ̤꤮ bò htû̌phû̌yṳphû̌ ǒ dě kholo sîtoǒ numî̌ he sî̌yabò asîsî.

“Lǒ̤꤮ bò sò̌htûpwa̤ htě he bǒlò̤ asî dě ya̤dakhû̌ toǒ꤮ mî̌ hetabòbò.

12“Hǎkhû̌ bǎbǎ, ta̤ htě a ǒbò dě hǎkhû̌ htǒo bǎbǎ mî̌ hetabòbò akhû̌akhî, he dè sǎǎsò̌o hî̌dě he kwiǎ tǒ̤ sî tò̤.

13“He ǎ nǒ pṳ̂phayî̌ ya? He o nǒ pè̤sǐ ya?

14“Lṳhtò̌tòhtò̌ mò̌ ta̤hî̌bwǐhî̌sîrî ata̤lṳ dě Cǒmaradû̌ ǒ.

“Ma̤lǒma̤be gemò̌ nata̤olò̤ ta Cǒmara htě adû̌ahtûkhlo kò htǒotapwa̤.

15“Bǎ sî shěto̤bǎ ta ta̤pò̤ta̤sha akhanu, kwigwèbǎǐ mò̌ he.

“He glè ma̤lû̌htò̌ sî, dě sî glè bè̌dubè̌na̤ he.”

16Pwǎ̤ta Cǒmaradû̌ hî̌lè̌ kòyòsò̌phlǒphû̌mò̤shî̌hto ta, Kǒ kòyòphû̌mò̤, he ta̤sû̌ta̤tòwò toǒ bǎbǎ, heta̤wṳ̂dò awi̤akè̌ toǒ bǎbǎ na lo̤bǎ pwe̤ǐlṳ tò̤.

17Na sò̌khě heta̤sû̌ǐwǒge.

Na wîkè hele̤heyo̤.

18Bǎ na kè̌shǐ pwa̤ǎhǔ akhanu, na cû̌ sò̌phlǒnṳkû̌ yǎ.

Na cû̌ bǒsû̌khǎkho kû̌ta kòyò htě a cû̌sǔnṳplěnṳ kòphû̌kòma.

19Nakhû̌phě dě na hî̌bǎ còcè̌꤮ ta ta̤phû̌mò̤shî̌hto.

Naplî̤ dě na pwe̤htò̌ còcè̌꤮ ta̤lòhǎlòho.

20“Na hî̌bǎ khǒwa̤ tû̌ nawè̤.

“Na dǒmi̤shǐyo̤ tû̌ napṳ.

21“Bǎ na ma̤ ta̤htǒtoǒ akhanu, tûklû̌klû̌꤮ he ǒpwǎ akhû̌akhî, na gènè̤ ta he sǒsǒta na.

“Khònò̤htǒo he glè sǎhtǎ na, he glè yṳ̂lṳbò nata̤sǔ dě nalo̤mo̤.

22“Kǒ kòyò htě ashope̤nǎkè Cǒmaradû̌, gènè̤te̤mǎ lǒkho, tò̤̌numî̌ he glè pe̤tṳpe̤glò na.

“Kò pwa̤ma̤lû̌htò̌ge na ǒpe dǐpwǎ̤꤮ tò̤.

23“Kòyò tapwa̤pwa̤ a lṳtòhtò̌ he ta ata̤hî̌bwǐhî̌sîrî ata̤lṳnu tapwa̤ mî̌ abè̌dubè̌na̤ mè̤mè̤̌ he.

“Kòyò htě a jûle̤phî̌yo̤ hele̤heyo̤ tapwa̤ mî̌ he glè dǔlṳ mè̤mè̤̌ yǎta heta̤ma̤lû̌htò̌ge.”