Psalms 58
Kwisabahtò̌ Cǒmara ta a glè cèrò kòyòphû̌mò̤
Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya. Dě bǎ sò̌po̤ sǒsǒta Khwǐdǎ̤wi̤ ata̤sò̌po̤ htě ami̤ ta, ma̤pî̌kè pûma̤ hǐnu to̤to̤ ma. Ebrephû̌yo̤nu, a kaǎ ta̤sò̌po̤ htǒo ta Mǐkatama ta̤sò̌po̤.
1Pwa̤pǒta̤ toǒ, sî hî̌bǎcǒhî̌bǎtè̤ mè̤mè̤̌nò sîyo̤ ya? Sî cèròtocèròbǎ nò bǎ kò ya? 2Amè̤ nǒtò̤, dě sîsò̌phlǒkûnu, sî gènè̤ còcè̌꤮ ta̤phû̌mò̤shî̌hto. Bǎ hǎkhû̌nu, sî pè̤ǎpè̤o ma̤pò̤ma̤sha kò ta sîcǔde. 3Kòyòphû̌mò̤ toǒ cû̌sǔ lǒkho klè̌ htě a ǒphijaû̌lò̤ khû̌lû̌khape. Asî lǒplò̤, hî̌bǎlòhǎlòhope dě amo̤phukû kha. 4Asî ta̤hî̌bǎ toǒ awè̤ lò̤kèta wṳ̂sa wè̤. Asî koo lò̤kèta wṳ̂sa nò̌kulǎ koo. a 5Hǐnudě asî gana̤dejòpe pwa̤ma̤lèǔ wṳ̂ ayo̤sǎ htǒonutò̤. Kò ǔpwe̤ pwî̌tè꤮ bǎbǎ asî gana̤dejòpe tò̤. 6Kǒ Cǒmaradû̌, ma̤la̤gakèbò mò̌ asîkhû̌khi. Kǒ Cǒmara tûjûpwa̤, dela̤gakèbò mò̌ sî̌ò̌tolo toǒ asèmè̤. 7Nohǎmǎkèbò asî pwǐ shi dû̌hè dě a dû̌cû̌tûlû̌ hǎmǎkènu. Bǎ asî wo̤htò̌ ta a mṳ̂ khlǐ akhanu, nola̤gakè asîpla̤. 8No sǒsǒkè asî ta simi̤ cû̌ kha mè̤yè̤ ǒlṳ teděsǎ dě ahǎmǎkènu. No sǒsǒpo̤tû̌ asî ta phijaû̌phû̌pî̌kè dě a kè̌shǐbǎ kû̌kò lṳmṳ tò̤nu. 9Bǎ ta̤shî̌shǒmṳ sǐso, mè̤tò̤mî̌ ta̤shî̌shǒmṳkhwe toǒ ugû lǎ gopo̤ hǒtò̤ akhanu, Cǒmara ma̤hǎmǎ phlǔkèbò tû̌ kòyòkhuphû̌mò̤nu toǒ pě. 10Bǎ kòyòcǒkòyòtè̤ toǒ kè̌shǐ ta Cǒmara ma̤ geshǔ asî akhanu, asî glè sò̌le̤sò̌lò̤. Asî glè shǔbò lǒkho akhò̌lopo̤ ta kòyòphû̌mò̤nu toǒ asǐ. 11“Kòyòcǒtè̤ toǒ glè nî̤bǎ mè̤mè̤̌ ta̤ma̤khû̌kǎ. “Cǒmaradû̌ htě a cèròtocèròbǎ bǎ hǎkhû̌ htǒotapwa̤nu aǒ mè̤mè̤̌.” Kòyò hî̌ lǒkho hǐnu pě.
Copyright information for
KxfSCKRC