Psalms 59

Ta̤kwisaba ta ta̤ma̤kwaǐ aya

(Shamuělè awǐlǒ tabǎ 19:11)

Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Dě bǎ sò̌po̤ sǒsǒta Khwǐdǎ̤wi̤ ata̤sò̌po̤ htě ami̤ ta, ma̤pî̌kè pûma̤ hǐnu to̤to̤ ma̤. Ebrephû̌yo̤nu, a kaǎ ta̤sò̌po̤ htǒo ta Mǐkatama ta̤sò̌po̤. Dě bǎ Khwǐsò̌lǔ nocû̌ǒpo̤ akliphû̌ toǒ ta Dǎ̤wi̤ ahǐ, dě a noma̤sikè nû̌û akhanu, a sò̌po̤ ta̤sò̌po̤ htǒoto̤to̤.

1Kǒ hecǒmaradû̌, ma̤lû̌htò̌ he dě pwa̤sò̌khě he toǒ acǔdekû.

Ma̤kwaǐ he ta kòyò htě a hèshě henu toǒ.

2Ma̤lû̌htò̌ he ta kòyò htě a ma̤ ta̤phû̌mò̤shî̌hto.

Ma̤lû̌htò̌ he ta kòyòma̤sima̤hǎmǎ kònu toǒ acǔdekû.

3Kè̌mò̌ lè, asî glè ma̤si he ayanu, a ǒpo̤kè̌jo lǒkho.

Pwa̤ma̤jîma̤jû kò toǒ cû̌tûsû kaǎplǒbò kò dě a glè hèshě he.

Kǒ Cǒmara tûjûpwa̤, he cû̌tûlû̌khatî̤lî̤ nǒ na ta̤ dǐkhò̌꤮ tò̤.

He ma̤sǔ nǒ ta̤ dǐcǎ꤮ tò̤tò̤.

4Heta̤sǔta̤plě ǒ dǐcǎ꤮ tò̤ pwǎ̤ta asî ǒnǎwǒ ta a glè̌ hèshě he.

Ma̤mò̌, ma̤jèmò̌ he, ǒpo̤ kè̌mò̌.

5Kǒ Cǒmara tûjûpwa̤, Cǒmaradû̌ htě a pǒ ta̤ lǒ̤꤮ bò mî̌ Israelphû̌ acǒmaradû̌, ma̤mò̌, cèrò mò̌ khlilèphû̌ lǒ̤꤮ bò htě a yṳǎ kû̌kò Cǒmaradû̌ tò̤nu toǒ.

Gwèbǎǐ pûma̤ kòyò ma̤ ta̤phû̌mò̤shî̌htonu toǒ dî̌kî̌꤮ ma̤.

6Asî gesǒ bǎ lṳmṳkhǐpo̤lo̤.

A gaya̤ lò̤ta chyǐ.

A lèkè̌jo te̤we̤ wî̤.

7Asî hî̌bǎ bǐaǒ akhû̌phě hî̌tènu gana̤de mò̌ta.

Asîplî̤nu a htòmè̌sû̌ lò̤kèta nò̌she.

Asî gènè̤ ta kò gana̤de kû̌ asî dǐpwǎ̤꤮ tò̤. ^a

8Pwǎ̤tadě, kǒ Cǒmara tûjûpwa̤, na ya̤ǐkè pwǎ asî.

Na pi̤jikèbò khlilèphû̌ htě a yṳǎ kû̌ Cǒmara tò̤. ^b

9Kǒ Cǒmaradû̌, na mî̌ hekhû̌heǎ hǒ, he ǒpo̤kè̌shuǐ na.

Na mî̌ hela̤ǒtûdûbǐ agûla̤.

10Hecǒmaradû̌ htě a mo̤ǐ he ta ta̤mo̤ǐ htě ahǎbòjò tò̤ htǒo a glè hèma̤jè he.

Cǒmara nokè̌shǐ he ta pwa̤sò̌khě he toǒ lò̤jûkè.

11Kǒ paběcǎ ta̤adû̌ htě amî̌ hegòtò̤, taplǎpa ma̤sikè pûma̤ asî hǒma̤.

Pěmî̌ hekòyò toǒ shope̤nǎkèbò na cèrò pwa̤sò̌khě na toǒ hî̌tènu hè̌.

Noǎ nasîrîpo̤phǎ, ma̤htò̌pò̌htò̌shîkèbò mò̌ asî.

Ma̤pî̌ma̤lṳ̂kèbò mò̌ asî.

12Asî hî̌bǎ ta̤nu, còcè̌꤮ asǔaplě.

Asî bè̌htò̌yî̤ asò̌phlǒ dě alò̤ta kò dò̌nǎ htò̌glo, no bǎgesǒtû̌ yǎta asî nî̌.

13Asî ǐsho lòhǎlòho akhû̌akhî, sò̌phlǒdû̌, ma̤pî̌kèbò mò̌ asî.

Ma̤tṳkèbò asînu.

Pǒ̤꤮ dě kòyò htě hǎkhû̌bǎo pṳ̂̌꤮ tapwa̤ glè sî̌ya ta Cǒmaradû̌ pǒǐ Yǎ̤kò akhlialè.

14Asî gesǒ bǎ lṳmṳkhǐpo̤lo̤.

A gaya̤ lò̤ta chyǐ.

A lèkè̌jo te̤we̤ wî̤.

15Asî lèkè̌lǎǎ lǒkho ashǎ.

A dè ǎkǒobe tò̤ hî̌mî̌, a ǔmo̤.

16Pwǎ̤tadě bǎ he shěto̤bǎ ta ta̤pò̤ta̤sha akhanu, na mî̌ wî̤we̤dû̌ htě atònò, na mî̌ hela̤ǒtûdû.

Hǐnuakhû̌akhî, he glè sò̌po̤htò̌ nakhû̌naǎ.

Lṳmṳlîkha, he glè htû̌sò̌ǐ nata̤mo̤ǐ htě ahǎbòjò tò̤.

17Kǒ Cǒmaradû̌, na mî̌ hekhû̌heǎ, he glè sò̌po̤ htû̌sò̌ǐ na.

Na mî̌ wî̤we̤dû̌ htě atònò, Cǒmaradû̌ htě a mo̤ǐ mè̤mè̤̌ he.