Psalms 62
Yṳǎ Cǒmara ata̤ma̤kwaǐ
Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě ta̤sò̌po̤htû̌sò̌ǐ htǒo to̤to̤ mî̌ Jedutu htě a yṳ̂klè̌nè̌klò ǐ pwa̤sò̌po̤htû̌sò̌ǐ ta̤nu tapwa̤ aya.
1He khòsò̌do ǒpo̤ kè̌shuǐ tû̌꤮ dě Cǒmaradû̌ aǒ. Ta̤ma̤lû̌htò̌ge he ǒ dě aǒ hè. 2Pwa̤ htě a htû helo̤dû̌ ta pwa̤ma̤lû̌htò̌ge he mî̌ tû̌꤮ a. A mî̌ pwa̤ma̤kwaǐ he, he lò̤jûjòpe dî̌kî̌꤮ tò̤. 3Sî lǒ̤꤮ bò htǒo, sî glè shěyî̤ he pwî̌tè? He mî̌ pwa̤khû̌ǎyṳ̂̌lò̤ sǒsǒta we̤dědǎ htě alòte̤ja, sî glè shěpe he ya? 4Asî ma̤wǒnǎ ta bè̌lòte̤kè he dě ta̤bè̌dubè̌na̤ agûla̤htò̌yî̤gutṳ̌. Asî mo̤ǐ ta̤ lòhǎlòho toǒ. Asî howi̤homò̤ kò ta khû̌phě, asî ǐsho kò dě asò̌phlǒkû. 5He sò̌phlǒhtû ǒpo̤ kè̌shuǐ tû̌꤮ pwǎ Cǒmaradû̌ aǒ. Heta̤kè̌shuǐ ǒ dě nû̌ûǒ hè. 6Pwa̤ htě a htû helo̤dû̌, pwa̤ma̤lû̌htò̌ge he mî̌ tû̌꤮ a. A mî̌ pwa̤ma̤kwaǐ he, he lò̤jûjòpe tò̤. 7Cǒmara mî̌ pwa̤ htě a ma̤lû̌htò̌ge he, a ǐ he ta̤bè̌dubè̌na̤. A mî̌ helo̤dû̌ htě ashû̌asho, hela̤ǒtûdûbǐ gûla̤. 8Kǒ kòyòhǎkhû̌phû̌ sî, Cǒmaradû̌ mî̌ pwa̤la̤ǒtûdûbǐ agûla̤ hǒ, yṳǎ Cǒmaradû̌ pṳ̂̌꤮ taplǎ. Pwe̤ǐlṳbò yǎta sîta̤pò̤ta̤sha lǒ̤꤮ bò. 9Kòyòhǎkhû̌phû̌ sǒsǒpwǎta ta̤sǎnṳsǎhtò̌ taplǎ. Kòyò dû̌yò̤ bǎbǎ, kòyò shèwè bǎbǎ, a nòdû̌ sǒsǒ꤮ bònû̌û. Dè jèkè̌ asî ta cò̌cû̌lǎ hî̌mî̌, a phidè̌shè̌꤮ pwǎ. Asî lǒ̤꤮ bò mî̌ a alò̤pwǎ ta ta̤sǎnṳsǎhtò̌ taplǎ. 10Yṳǎnǎla̤ǐ pûma̤ ta̤ma̤jîma̤jû kò ma̤. Phî̌htò̌yî̤ pûma̤ sîna̤ ta ta̤kî̌ta̤kû̌ htě sî phî̌sigwiǎ kònu toǒ ma̤. Sǔsǔ na ta̤dû̌yò̤htò̌sa ǒdû̌htò̌ bǎbǎ, nǎla̤ǐ pûma̤ ta̤hǐnu toǒ ma̤. 11Cǒmaradû̌ hî̌phlote̤mǎ ayo̤ dě he gana̤de plṳ̂꤮ mè̤mè̤̌ ta Cǒmaradû̌ mî̌ a po̤phǎshû̌sho. 12Htohǒtò̤ kǒ Běcǎ ta̤adû̌, nata̤mo̤ǐ mî̌ ta̤mo̤ǐ htě ahǎbòjò tò̤. Pwǐ꤮ asî ma̤hto ta̤nu, na glè ǐ mè̤mè̤̌ kò pṳ̂̌꤮ tapwa̤ ata̤ma̤nî̤khû̌kǎ. a
Copyright information for
KxfSCKRC