Psalms 63
Sò̌yṳ ǒphǔ ta Cǒmara
(Shamuělè awǐlǒ tabǎ 22:5, 23:14-15)
Khwǐdǎ̤wi̤ ata̤sò̌po̤ htû̌sò̌ǐ. Dě a sò̌po̤ bǎ a cû̌ǒ dě Yṳ̌da lo̤mî̌shǒkla akhanu.
1Kǒ Cǒmaradû̌, na mî̌ hecǒmara. He sò̌phlosho kè̌lǎ na. He kè̌shuǐ mè̤mè̤̌ na. He sò̌yṳ ǒphǔ ta na lò̤kèta kòyò sò̌yṳ oshi dě lo̤mî̌shǒkla htě shi ǒ dǐmè̌꤮ tò̤nu. 2He kè̌shǐhto nata̤po̤ta̤phǎ ta nata̤sîrîdû̌sîrîhtû. He kè̌shǐ na dě nagûla̤ cahtǐ akû. 3Na ta̤mo̤ǐ htě ahǎbòjò tò̤ htǒo awǒkhlope ta ta̤ǒhtûpwa̤ akhû̌akhî, he glè htû̌sò̌ǐ na. 4He glè hî̌bwǐsîrî htû̌sò̌ǐ na to̤htû̌ he si. Bǎ he kwisabahtò̌ na akhanu, he glè yṳ̂htò̌ hecǔde. 5A glè sò̌wî̤ǐ he pwǐ꤮ kò ǎkǒobe dîhǎsǐwǐ. He glè sò̌le̤sò̌lò̤ htû̌sò̌ǐ na ta lî̤sò̌po̤htû̌sò̌ǐ. 6Bǎ he ǒ la̤mi̤khû̌ akhanu, he gènè̤htò̌ na. He gènè̤ǐ na tasa akû. 7Na mî̌ pwa̤ma̤jè he akhû̌akhî, he sò̌le̤sò̌lò̤ sò̌po̤htû̌sò̌ǐ na dě na děge ayo̤ǔla̤. 8He phǒměǐ na. Na cǔdemû ma̤jè he. 9Kòyò toǒ kè̌lǎ ma̤si lǒkho he. Asî glè lòte̤kèbòtû̌ dě lṳnǎkhwǎdo. 10Asî glè sikèbò ta nò̌she. Asî glè htûbò chyǐmi̤ ashǎ. 11Cǒmaradû̌ ma̤jè bǎ Khwǐdû̌ akhû̌akhî, a glè sò̌le̤sò̌lò̤. Lǒ̤꤮ bò kòyò htě a bèlò̤ ayo̤ ta Cǒmara ami̤nu toǒ glè htû̌sò̌ǐtû̌ Cǒmara. Kòyò htě a lòhǎlòho toǒnu, pwǎpwǎ꤮ a ǒkèbò pě.
Copyright information for
KxfSCKRC