Psalms 68

Ta̤ma̤pè̤ lî̤sò̌po̤ htû̌sò̌ǐ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokû nutapwa̤ aya.

1Kǒ꤮ Cǒmaradû̌, ma̤mò̌, ma̤ nûpò̌nûshîkèbò mò̌ pwa̤sò̌khě na.

Nokhlè̌htokhlè̌lò̤kèbòmò̌ nakhuwè. ^a

2No khǔkèbò asî lò̤ta mî̌khǔ cû̌kèbònu.

No jûbǔjakèbò asî sǒsǒta mî̌gè jûkè tarǎbonu.

Kòyòjîkòyòjû pî̌kèbò tû̌ta dě Cǒmaradû̌ alo̤mo̤ nî̌.

3Pwǎ̤tadě kòyòcǒkòyòtè̤ sò̌le̤sò̌lò̤ tû̌ta nî̌꤮.

Asî mo̤sû̌mo̤sò̌bò tû̌ta dě Cǒmaradû̌ alo̤mo̤ nî̌꤮.

Asî ǒcòcè̌꤮ tû̌ta ta̤sò̌le̤sò̌lò̤ nî̌꤮.

4Sò̌po̤htò̌ Cǒmaradû̌, sò̌po̤htû̌sò̌htò̌ yǎ.

Htû̌sò̌ǐ pwa̤ htě a htò̌dò̌ poǒlṳ htǒotapwa̤.

A mi̤ ta Cǒmara tûjûpwa̤.

Hǐnudě sò̌le̤sò̌lò̤ lǒkhomò̌ dě alo̤mo̤ htǒo.

5Cǒmaradû̌ ǒ dě agûla̤ cahtǐ.

A mî̌ phû̌ htě shodopha toǒ apha, pwa̤ htě a ma̤kwaǐ mamǔǒkhwè̌.

6Kòyò htě a shodo khonu, Cǒmaradû̌ bè̌ǒ bǎ nû̌û hǐphû̌phòphû̌.

A kaǎhtò̌ kòyò lò̤te̤ dě apo̤kû, a ǐ asî gûla̤ dě a pelemo̤.

Kòyò htě a shěshǔ Cǒmaranu a bǎ ǒkè dě lo̤mî̌shǒkla gûla̤.

7Kǒ Cǒmaradû̌, bǎ na cû̌wǐ dě nakòyò alo̤mo̤, na sûcû̌ phlǔ asî ta lo̤mî̌shǒklakhû̌ akhanu, 8Hǎkhû̌ guyṳ dě khwè̌ julò̤.

A htûhtò̌ hǐnu bǎ na mî̌ Cǒmaradû̌, Israel acǒmaradû̌ hèlò̤ ǒlṳhtò̌ dě Sǐnǎkholonu akha. ^b

9Kǒ Cǒmaradû̌ na nojulò̤ lǒbe khwè̌.

Na nosuhtò̌ gesǒ nashigakhwekhû̌ dě na ǐ yǎta nakòyò.

10Nakòyò ǒ lǒkho bǎnu.

Kǒ꤮ Cǒmaradû̌, nasò̌phlǒ wǒ꤮ mè̤mè̤̌ akhû̌akhî, na kè̌ǐkhwè̌ǐ kòyò htě kò pè̤ǎpè̤o nû̌û.

11Běcǎ ta̤adû̌ hî̌lò̤ yo̤.

Mamǔ pṳ̂̌pwa̤ cû̌lè pwe̤ǐlṳ pîshîcû̌bò ta̤sò̌le̤sò̌lò̤ awi̤akè̌.

12Khwǐ ta akliphû̌ toǒ hǎhtò̌khlè̌bò.

Mamǔ ǒkè dě hǐ toǒ mèpa̤bò ta̤kî̌ta̤kû̌ htě a phî̌geǐ ta̤shěta̤pe̤ akla.

13Kòyò htě a hǎmoǒlò̤ dě sophû̌po̤kû toǒ aya bǎbǎ, ta̤kî̌ta̤kû̌nu toǒ mî̌ asǒsǒta he htû̌li̤cò̌děge dě kò plubǐ rakha sǒsǒ yǎta wû.

Ashû̌nu aplò̌kîtrî̌ lò̤kèta hta.

14Bǎ Cǒmara htě apo̤phǎshû̌sho htǒotapwa̤ nonûpò̌pîshî kèbò Khwǐ toǒ akhanu, a lò̤kèta cashilò̤ dě Salamokholokhû̌.

15Bashakholo mî̌ adû̌ahtû awî̤꤮ mè̤mè̤̌.

Kholo plǔhtò̌ toǒ ǒplṳ̂꤮.

16Kǒ Bashakholodû̌ akholokhi sî, ma̤tè̤dě na cû̌kè̌ sò̌khětǒ̤ kholo htě Cǒmaradû̌ wû̌lǎ yǎta ala̤ǒnu tama hî̌tè?

Cǒmara tûjûpwa̤ glèǒ bǎnu tûjûpwa̤.

17Cǒmaradû̌ alo̤ la̤htò̌shě ta̤shěnu a ǒ asò̌ ta asò̌, asě ta asěkû.

Běcǎ ta̤adû̌ ǒ Sǐnǎkhololo̤ dě a hèlò̤, a hènṳ dě agûla̤ cahtǐ akû.

18Bǎ na gekihtò̌ dě gûla̤htò̌yî̤ akhanu, na pṳ̂cû̌ǐ pwa̤sò̌khě na dě alò̤jûkè nala̤nu toǒ.

Kòyò htě a shěshǔ nanu toǒ bǎbǎ, na nî̤bǎ sû dě asîǒ.

Běcǎ Cǒmara tûjûpwa̤ ǒ bǎ gûla̤nu tò̤glò pěpě. ^c

19Htû̌sò̌ǐ Běcǎ ta̤adû̌ htě a ò̌bǎ pata̤bǐta̤ò̌ pṳ̂̌ni̤ni̤nu tapwa̤.

A mî̌ Cǒmara dě a ma̤lû̌htò̌ge pa.

20Pa Cǒmara mî̌ Cǒmara htě a ma̤lû̌htò̌ge kòyò.

A mî̌ Cǒmara tûjûpwa̤, Běcǎ ta̤adû̌ dě a ma̤lû̌htò̌ge pa ta ta̤si.

21Cǒmaradû̌ glè dephò̌kè mè̤mè̤̌ pwa̤sò̌khě yǎ toǒ ahǐkǒ.

A glè demǔkè mè̤mè̤ kòyò htě a ma̤ sayè̤ ta̤sǔnu toǒ ahǐkǒkhwǐ.

22Běcǎ ta̤adû̌ hî̌ ta, “He glè kaǎge gesǒ pwa̤sò̌khě he ǒ dě Bashaganu toǒ bǎo.

“He glè kaǎgesǒ asî ǒ dě shidû̌shite̤we̤ yo̤kû.

23“Ma̤hǐnudě na glè phrǒcû̌bò asîsǐ.

“Nachyǐ sîtoǒ glè hèlî̌obò asîsǐ.”

24Kǒ Cǒmaradû̌, kò kè̌shǐbò nakòyòprṳ̂ho sò̌dodo꤮ a cû̌htò̌nṳplǒbò nû̌û htǒonu.

Kò kè̌shǐbò hecǒmara htě amî̌ hekhwǐ, cû̌htò̌nṳ dě gûla̤ cahtǐkû.

25Pwa̤sò̌po̤ta̤ ǒ dě alo̤mo̤, pwa̤dǒ ta̤dǒta̤ǔ ǒ nǒkò, aplǎkû dě mamǔ phû̌sǎ toǒ pla̤hè lǒkho cî̌ca.

26Asî hî̌ ta, “Sò̌po̤htû̌sò̌ǐ mò̌ Cǒmaradû̌ dě kòyòprṳ̂ho alo̤mo̤ htǒo.

“Israel aprṳ̂aho sî, htû̌sò̌ǐ mò̌ Cǒmara tûjûpwa̤.”

27Bejame mî̌ htě akònò htǒo akhlilè cû̌wǐ dě alo̤mo̤ gutṳ̌.

Htodě Yṳ̌da akhlialè ahǐkǒlǒkòdû̌ aprṳ̂aho gûkû̌ nǒkò.

Htodě Sabulo ta Natali ahǐkǒlǒkòdû̌ gûge nǒkò.

28Kǒ꤮ Cǒmaradû̌, nolò̤mò̌ nasîrîpo̤phǎ.

Dǔlṳmò̌ nasîrîpo̤phǎ htě a ma̤hto bǎ pa dě awǐkhanu.

29Khwǐ glè phî̌hènṳ bǎ na sû dě Ye̤rǔshèlèwî̤ nata̤lṳhtò̌hokû.

30Sǎhtǎ mò̌ Egyptga htě asǒsǒta ta̤mi̤ta̤mò̤ ǒ dě po̤mṳklanu.

Sǎhtǎ mò̌ khlilèphû̌ htě asǒsǒta pṳ̂pha prṳ̂ho ǒ dě pṳ̂phû̌ aklanu.

Tûrû̌꤮ sǎhtǎ asî to̤htû̌ a shò̌lò̤ asò̌phlǒ, nohè lṳhtò̌ asî ta wûyî̌ ta hta.

Ma̤nûpîshîkèbò khlilèphû̌ htě a sò̌yṳshě sò̌yṳpè̤ ta̤.

31Khwǐ akòyòdû̌ glè ǒ dě Egyptga hè.

Kǔshǎkhlilèphû̌ glè bè̌dubè̌na̤ Cǒmaradû̌, a glè ǐ nû̌û sû.

32Kǒ shiga ǒ bǎ hǎkhû̌ bǎotebě sî, sò̌po̤ htû̌sò̌ǐ mò̌ Cǒmaradû̌.

Sò̌po̤ htû̌sò̌ǐ mò̌ Běcǎ ta̤adû̌.

33Htû̌sò̌ǐ mò̌ Cǒmara htě a dò̌cû̌tûlû̌ mǒla̤ dě aǒ dě꤮ wǐkha tǒ̤꤮ khònò̤nu tapwa̤.

A hî̌bǎ pwe̤te̤we̤toso lò̤kèta tî̌lî̌.

34Pwe̤ǐ dǒhtû̌ǐlṳmò̌ Cǒmaradû̌ asîrîpo̤phǎ.

A pǒ ta̤ pwǐ Khwǐ tapwa̤ dě Israelphû̌ akla.

Asîrîpo̤phǎ ǒlṳhtò̌ dě mǒla̤.

35Kǒ Cǒmaradû̌, dě nata̤lṳhtò̌ho cahtǐ akûnu, a gònò̤gèglè ǐsha.

Israel acǒmaradû̌ ǐ akòyò toǒ ata̤po̤ta̤phǎ ta atakhû̌ta̤ǎ.

Htû̌sò̌ǐ mò̌ Cǒmaradû̌.