Psalms 69
Kwihtò̌ ta̤ma̤jè
Htǒomî̌ Khwǐdǎ̤wi̤ ata̤sò̌po̤. Dě ta̤sò̌po̤ htǒomî̌ pwa̤sò̌po̤ ta̤ ahǐkǒlǒkòdû̌ dě ta̤lṳhtò̌hokûnu toǒ aya. Dě bǎ sò̌po̤ sǒsǒta, ta̤phota̤gî ta̤sò̌po̤nu to̤to̤.
1Kǒ Cǒmaradû̌, ma̤lû̌htò̌ge mò̌ he. Shidû̌ htò̌to̤kè hegobo. 2He lòte̤ǒtò̤ dě hǎpèè̌kla. He khacû̌jòpe tò̤. He lòcǔnṳ dě shiyo̤. Shidû̌ plû̌bǐbò he. 3He kaǎguhtò̌ mè̤mè̤̌ ta̤ma̤jè, he lòdǒlòde mè̤mè̤̌. Hegobokû mî̌ akhwebò. He ǒpo̤ kè̌cû̌ mè̤mè̤̌ Cǒmaradû̌ dě a gaya̤bò hemi̤sǎphlǒ. 4Kòyò htě he ma̤sǔ asî dǐcǎ꤮ tò̤ dě a sò̌khě he toǒ mî̌ aǒplṳ̂khlope ta hekhǔlṳ. Kòyò htě a ma̤pî̌ma̤lṳ̂ he toǒnu, asîrîshû̌sho mè̤mè̤̌. Ta̤kî̌ta̤kû̌ htě he ǎhǔ mè̤tò̤ toǒnu bǎbǎ, asî kwi gutṳgla he. a 5Kǒ Cǒmaradû̌, na sî̌yatû̌ he ma̤kwaǐ ta̤sǔnu toǒ. He bè̌hǔjò nǒ he ta̤sǔ dě nalo̤mo̤ tò̤. 6Kǒ Cǒmara tûjûpwa̤ htě a pǒ ta̤ lǒ̤꤮ bò, hekhû̌hekhî nogènè̤pî̌tî̌kè pûma̤ pwa̤ htě a ǒpo̤kè̌shuǐ nanu ma̤. Kǒ Israel Cǒmaradû̌, hekhû̌hekhî, nohtûhtò̌ pûma̤ ta̤sòwò̤ ta pwa̤kè̌lǎ nanu aya ma̤. 7Nakhû̌nakhî kò pi̤jishǐcǒbò he. He sòwò̤ mi̤sǎpî̌ mè̤mè̤̌. 8Hekhlihelè bè̌ he pwǐ kòhǔwa̤ tapwa̤. Hepṳhewè̤ kè̌pe he tò̤. 9He sò̌phlosho mo̤ǐ mè̤mè̤̌ nahǐ. He ta̤sò̌phlǒsho mo̤ǐ htǒonumî̌ a gèbòkè he sǒsǒta mî̌. b Ta̤ htě kò pi̤jishǐcǒ na toǒnu, a hèbǎ dǒ he. c 10Bǎ hehǎhewo dǔǎdǔo shǎ akhanu, kò pi̤jibò he. 11He kûsǒhtò̌ hǐdotûphrû dě a dǔlṳ ta̤sǎpla̤, kò luya̤bò he. 12Kòyò hǎnòò̌ lǒkho dě wî̤takhadû̌htunu toǒ dǒbò heyo̤. Pwa̤ǎmṳopǒ toǒ sò̌po̤khě sò̌po̤khǒbò he. 13Kǒ Cǒmara tûjûpwa̤, hedě he glè kwisabahtò̌ pwǎ dě naǒ. Kǒ Cǒmaradû̌, nata̤mo̤ǐnu ahǎbòjò tò̤ akhû̌akhî, bǎ akhîakha tobǎ akhapěnu gana̤de he kwi na htǒo. Ma̤jèmò̌ he ta nata̤ma̤lû̌htò̌ge htě ate̤mǎ htǒo. 14Cǐhtò̌ mò̌ he dě hǎpèè̌ kla. Nolòte̤ǒtò̤ pûma̤ he ma̤. Ma̤lû̌htò̌ he ta pwa̤ htě a sò̌khě he. Cǐhtò̌pû he dě shidû̌shikwi akû. 15Nodû̌htò̌ plû̌bǐkè pûma̤ he ta shi ma̤. Nolòcǔkè pûma̤ he ma̤. Noplubǐkè pûma̤ he dě lṳkûhtǒo ma̤. 16Kǒ Cǒmara tûjûpwa̤, nata̤mo̤ǐ htě ahǎbòjò tò̤ htǒo, a wǒ mè̤mè̤̌ akhû̌akhî, hî̌shǔpû he. Na gwèbǎǐ jòjî̌꤮ he tò̤ akhû̌akhî, tiwǐkè̌topû he. 17He kè̌shǐshěto̤bǎ ta ta̤pò̤ta̤sha akhû̌akhî, kè̌khǒkè pûma̤ nami̤sǎ ta napwa̤ma̤ta̤phû̌htǒo ma̤. Hî̌shǔphwèmò̌ he. 18Hèǒphǔ ta he, ma̤lû̌htò̌ge he. Htè̌gemò̌ he dě pwa̤sò̌khě he htǒotoǒ acǔdekû. 19Kò pi̤jishǐcǒ he, kò ma̤sòwò̤ he, kò ma̤tukutakǎ he hî̌tènu, na sî̌yabòtû̌ hǒ. Na kè̌shǐbòtû̌ pwa̤sò̌khě he toǒ pṳ̂̌꤮ tapwa̤. 20Kò pi̤jishǐcǒ he akhû̌akhî, a sha mè̤mè̤̌ hesò̌phlǒ, a shèwè mè̤mè̤̌ he. He kè̌lǎ pwa̤gwèbǎǐ he pwǎ̤ta he kè̌shǐ dǐpwǎ̤꤮ tò̤. He kè̌lǎ pwa̤ma̤mo̤ma̤kwǐ he pwǎ̤ta he kè̌shǐ dǐpwǎ̤꤮ tò̤tò̤. 21Asî shû̌nṳ atiwǐ dě heshǎǎ kla. Bǎ he sò̌oshi akhanu, asî ǐo he sî̌yo̤ hè̌wo̤kaprǎ. d 22Asî ma̤pwè dě a jèwè̤ǎjèwè̤o. Nopî̌nolṳ̂ gesǒtû̌ ta asîna̤ pwǐ a nî̤ sumṳnu pě. Pwè htě asî jèwè̤ǎjèwè̤o htǒo nohtûkè asî sumṳ nî̌. e 23Nolakèbò asîmi̤sǎ. Noja gònò̤gèglèkèbòtû̌ asî shè̌kò nî̌. f 24Sò̌phlǒdû̌gûhî asî, cèròkèmò̌ asî. Nokhòbǎbòtû̌ asî ta nata̤sò̌phlǒdû̌. 25No ǒkhwè̌kèbòtû̌ asîgûla̤. Dě asîgûla̤ htǒonu noǒ pûma̤ kòyò dǐpwǎ̤꤮ ma̤. g 26Asî ma̤jîma̤jû kòyò htě na phlěpo̤hto yǎnutoǒ. Kòyò htě na ma̤shahto yǎ toǒnu, asî tǐ̤꤮ ma̤sha shoshopo̤. 27Pwǐ asîta̤sǔta̤plě ǒnu bè̌htò̌plṳ̂po̤ asîta̤sǔ. No nî̤bǎkû̌ pûma̤ asî ta nata̤ma̤lû̌htò̌ge dî̌kî̌꤮ ma̤. 28Kò glè htǔpi̤kèbòtû̌ asîmi̤ dě lî̤htûpwa̤ akû. No khwè̌htudǒ pûma̤ asîmi̤ dě kòyòsò̌phlǒwǒ toǒ ami̤ aklanu ma̤. h 29Ajîajû ashuphǔshèwè mè̤mè̤̌ he. Kǒ Cǒmaradû̌ ma̤lû̌htò̌ge he, ma̤kwaǐpû he. 30He glè htû̌sò̌ǐ Cǒmaradû̌ ami̤ ta lî̤sò̌po̤. He glè bè̌dubè̌na̤ yǎta heta̤hî̌bwǐhî̌sîrîhtò̌ yǎ. 31Ma̤hǐnudě Cǒmara tûjûpwa̤ glè sò̌phlǒǒkhlope ta lṳhtò̌ pṳ̂phadû̌ todo. A sò̌phlǒtokhlope ta pṳ̂phadû̌ htě ane̤ ǒ, akhò̌mè̤ ǒ todo. 32Kòyò htě a khòbǎ ta̤jîta̤jû glè kè̌shǐ dě a glè sò̌le̤sò̌lò̤. Sî kè̌lǎ Cǒmaradû̌ toǒnu, sîsò̌phlǒ glè shû̌htò̌shohtò̌. 33Cǒmara tûjûpwa̤ glè gana̤detû̌ kòyò shodo pwa̤ma̤jè ata̤yi̤kǒhtò̌. A shope̤kè kòyò htě kòpṳ̂dǒlòte̤ nû̌ûnu tò̤. 34Kǒ mǒkhû̌, hǎkhû̌, shidû̌shite̤we̤ ta ta̤bǒlò̤ ǒ dě asîlo̤ lǒ̤꤮ bò sî, htû̌sò̌ǐ mò̌ yǎ. 35Cǒmaradû̌ glè ma̤lû̌htò̌ge tû̌ Ye̤rǔshèlèwî̤ ǒ dě Sǐokholokhû̌. A glè ma̤htò̌ gesǒ wî̤ dě Yṳ̌dagakû. Akòyò toǒ glè ǒ lǒkho bǎnu. A nî̤bǎtû̌ hǎkhû̌ bǎnu pě. 36Apwa̤ma̤ta̤phû̌ aphû̌ali̤ htě asubusabahtò̌ nû̌ûnu, a nî̤bǎ tû̌ hǎkhû̌ htǒo pwǐ asî aû̌cata̤bî̌ pě. Kòyò htě a mo̤ǐ nû̌û toǒnu, a ǒtû̌ bǎnu pě.
Copyright information for
KxfSCKRC