Psalms 73

Ta̤htû̌sò̌ǐalî̤ subǎ tabǎ

(Ta̤htû̌sò̌ǐ 73-89)

Cǒmara ma̤toma̤bǎ ta̤

Asa ata̤sò̌po̤ htû̌sò̌ǐ

1Cǒmaradû̌ wǒ꤮ mè̤mè̤̌ dě Israelphû̌ ta kòyò htě a sò̌phlǒ mṳ̂plînu toǒ aya.

2Dě he lè̌dě he glè̌ wî phǔtînî̌kè hecǒmara.

Heta̤yṳta̤nǎ glè̌ hǎmǎ phǔtînî̌ lǎ hǒ.

3Bǎ he kè̌shǐ kòyòjîkòyòphû̌mò̤ ata̤dû̌yò̤htò̌sa akhanu, he sò̌khě kû̌tû̌ kòyòphî̌dû̌phî̌htû ana̤nu toǒ.

4Asî kè̌shǐ shěto̤bǎ kû̌nǒ ta̤pò̤ta̤sha tò̤.

Asî khû̌ǎshû̌sho ǒshǔǒmo̤ mè̤mè̤̌.

5Asî shěto̤bǎ kû̌nǒ ta̤pò̤ta̤sha pwǐ kòhǔwa̤nu tò̤.

Asî khòbǎ kû̌ ta̤jîta̤jû pwǐ kòhǔwa̤nu tò̤tò̤.

6Hǐnuakhû̌akhî, asî phî̌dû̌phî̌htû ana̤nu a ǒlṳlîphlo lò̤kèta kò kǒle̤ǐ kǒle̤.

Asî ata̤ma̤jîma̤jû kònu a ǒlṳlîphlo lò̤kèta kò kûsǒhtò̌ hǐdohǐyò̤.

7Asî ata̤dû̌yò̤htò̌sa toǒnu a ǐhtûhtò̌ asî la̤ma̤sǔma̤plě ta̤.

Asîta̤gènè̤ toǒnu còcè̌ ta̤sǔta̤plě.

8Asî pi̤jishǐcǒ kò, a hî̌bǎ còcè̌ ta̤phû̌mò̤shî̌hto.

Asî phî̌dû̌phî̌htû ana̤, a ma̤nûma̤cěbò kò.

9A hî̌bǎ pwǐ a pǒǐ mǒkhû̌.

A pwe̤ pwǐ hǎkhû̌ dě a htû nû̌ûtanu.

10Kǒ꤮ Cǒmara akòyò dě a gûma̤ kû̌bò pwǐ asînu hǒ nǔnǔ꤮.

11Kòyòphû̌mò̤ sîtoǒ hî̌ ta, “Cǒmara cû̌sî̌yajò pa ma̤ta̤ hî̌tè?

“Cǒmara htě adû̌ahtûkhlo kò htǒotapwa̤ mî̌ a cû̌sî̌yajò nò ya?”

12Kè̌mò̌ kòyòjîkòyòphû̌mò̤ sîtoǒ ata̤ǒhtûpwa̤ htǒolè.

A bǎgubǎgè kû̌ kò dǐcǎ꤮ tò̤.

A tǐ̤꤮ dû̌yò̤htò̌ ta dû̌yò̤htò̌.

13He bè̌ mṳ̂plî hesò̌phlǒ pwǎ̤tadě tîkî̌꤮ he nî̤bǎ kû̌ kò ta̤bwǐta̤sîrî toǒ tò̤.

He shǔbò hecǔde dě glè dǔlṳ yǎta heta̤sǔ ǒ dǐcǎ꤮ tò̤ pwǎ̤tadě he nî̤bǎ kû̌kò dǐcǎ꤮ tò̤tò̤.

14Kǒ Cǒmara, na nokhòjîkhòjû he ti̤nǐ̤ mṳhǎ.

Pṳ̂̌wo̤wo̤꤮ na sǎhtǎ he.

15He dè hî̌ kû̌ pwǐ asî hî̌nu hî̌dě, asǒsǒta he cǒtè̤pe ta Cǒmara akòyò toǒ tò̤.

16Pwǎ̤tadě bǎ he kè̌lǎsî̌yaphlo ta̤htǒotoǒ lǒ̤꤮ bò akhanu, apò̤asha mè̤mè̤ heya.

17He hènṳ tû̌mò̌ dě Cǒmara ahocahtǐ akû dě, he sî̌yate̤mǎ hènǒ pwa̤jîphû̌mò̤ toǒ aklè̌ gutṳ.

18Na cû̌bè̌ǒ mè̤mè̤̌ asî dě ta̤sò̌gònò̤ ǐsha agûla̤.

Na noto̤kè asî ta ta̤pî̌ta̤lṳ̂.

19Teděsǎ akû asî pî̌kèbò.

Ta̤cèrò htě a sò̌gònò̤ ǐsha ma̤tṳkèbò asî.

20Kòyòjî phû̌mò̤nu alò̤ta kòyò hǎmoǒmi̤mò̤ dě bǎ lṳmṳlîbû shî̌nǎ hǒ akhanu, a hǎmǎkèbònu pwǎ.

Kǒ Běcǎ ta̤adû̌, bǎ na hèma̤jè he akhanu, asî hǎmǎkèbò.

21Děwǐkha bǎ asû̌gûsò̌gè mè̤mè̤̌ hesò̌phlǒ, ashèwè mè̤mè̤̌ hesǔshi akhanu, 22He pè̌giti̤, he ta̤sî̌ta̤jò ǒkû̌ tò̤.

Dě nalo̤mo̤nu he sǒsǒpwǎ ta ta̤phû̌ta̤li̤.

23Pwǎ̤tadě pṳ̂̌plǎplǎ he ǒphǔ ta na.

Na pṳ̂měǐ hecǔdemû.

24Na yṳ̂klè̌nè̌klò he ta nata̤sî̌ta̤jò.

Nǒkò pěnu, na glè sûcû̌ he dě ta̤bè̌dubè̌na̤ gûla̤ htò̌yî̤.

25Pwa̤ma̤jè he dě mǒkhû̌ pěnu, aǒ pwǎ pǒ̤꤮ na tapwa̤.

Ta̤ htě a ma̤to ta hesò̌phlǒ dě hǎkhû̌bǎo aǒ dǐcǎ꤮ tò̤, aǒ pwǎ pǒ̤꤮ na.

26Hena̤klûphěyî̌, hesò̌phlǒsǔshi khû̌ǎja gilò̤kèbò.

Cǒmaradû̌ mî̌ hesò̌phlǒ akhû̌aǎ.

He gènè̤htò̌ pwǎ pǒ̤꤮ a pwǎ.

27Kǒ Cǒmaradû̌, kòyò htě a ǒyî̤ ta nanu a gupî̌kèbò mè̤mè̤̌.

Na ma̤pî̌ma̤lṳ̂kèbò kòyò htě acǒtè̤ ta na tò̤nu toǒ pě.

28Dě he lè̌dě he ǒphǔ ta Cǒmaradû̌ dě a nî̤bwǐnî̤sîrî mè̤mè̤̌ heya.

Běcǎ ta̤adû̌ mî̌ he la̤ǒtûdû.

He pwe̤ǐlṳbò bǎ kò ta na ma̤ ta̤cǒklî̌kî̌yanu pě.