Psalms 74

Ta̤kwisaba ta pwa̤ma̤jè glè lû̌htò̌ aya

Htǒomî̌ Asa ata̤sò̌po̤ dě Ebrephû̌yo̤nu, a kaǎ ta̤sò̌po̤ htǒo ta Masakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ.

1Kǒ Cǒmaradû̌, na cû̌ wîkè pa tûjûpwa̤ ma̤tè?

Na cû̌ sò̌phlǒdû̌gûhî nasophû̌ prṳ̂ho htě na gèǐ htǒotoǒ mî̌ a ma̤tè? ^a

2Gènè̤htò̌nṳ nakòyò htě na htè̌ge asî dě꤮ wǐkhanu ta nakhlilèphû̌ htě na pwî̤ge asî dě a glè htûbò nakòyònu.

Htohǒtò̤ gènè̤htò̌nṳpo̤ Ye̤rǔshèlèwî̤ ǒ dě Sǐokholokhû̌ htě na ǒ ǐyǎ htǒonutò̤glò.

3Hèlèkè̌mò̌ kò ma̤lòte̤japî̌bò htǒo.

Pwa̤sò̌khě pa toǒ ma̤pî̌ma̤lṳ̂kèbò lǒ̤꤮ bò ta̤ ǒ dě ta̤cahtǐ gûla̤ akûnu toǒ.

4Pwa̤sò̌khě na toǒ ma̤pè̤ ta̤ dě yi̤kǒhtò̌ na ta̤lṳhtò̌hokû.

Asî shǒhtò̌ akhû̌pa̤la̤ bǎnu pwǐ ta̤ma̤pè̤ anò̌dò tacǎ.

Ta̤kwisaba ta khlilèphû̌ ta̤lû̌htò̌ge aya

5Asî hèdelòte̤jabò ta̤kî̌ta̤kû̌ lò̤kèta kòyò gûga sǒ dě mi̤kla.

6Sǒbě htě kò htǎwî̤ nû̌û toǒnu, asî po̤lòte̤jakèbò nû̌ûta kû ta khî̌po̤.

7Asî shû̌gèkèbò nata̤cahtǐ agûla̤.

Asî ma̤bǐaǒ phû̌mò̤shî̌htobò kò nala̤ǒ gûla̤.

8Asî hî̌ ta, pa ma̤pî̌kèbò asî pṳ̂̌꤮ tapwa̤ hò̌꤮.

Asî shû̌gèkèbò lǒ̤꤮ bò gûla̤ htě kò la̤subusabahtò̌ Cǒmaranu toǒ.

9Pa kè̌shǐ nata̤ma̤cǒklî̌kî̌ya dǐcǎ꤮ tò̤.

Pwa̤po̤ ǒpe dǐpwǎ̤꤮ tò̤tò̤.

Akhîakha yî̤ pwî̌tè pěnu kò sî̌ya dǐpwǎ̤ tò̤tò̤.

10Kǒ Cǒmaradû̌, pwa̤sò̌khě na toǒ luya̤po̤ na pwî̌tè pě?

A pi̤jishǐcǒ nami̤ tûjûpwa̤ pě ya?

11Na cû̌dò̌tûlû̌ ma̤tè?

Hèma̤jè mò̌ pa, ma̤pî̌ma̤lṳ̂bòmò̌ asî.

12Kǒ Cǒmaradû̌, he sî̌yahto ta na mî̌ pakhwǐ děwǐkhape.

Na ma̤lû̌htò̌ sala̤ pa dě pagakû bǎo.

13Na ma̤ phò̌pa̤kè shidû̌shite̤we̤ ta nata̤sîrîpo̤phǎ. ^b

Na po̤phò̌kè wṳ̂sapo̤pṳdû̌ ▼

▼Wṳ̂sapo̤pṳ mî̌ wṳ̂dû̌ mè̤mè̤̌ tacǎ.

ǒ dě shidû̌shite̤we̤kûnu tobo ahǐkǒ toǒ.

14Na demǔdeplěkè ta̤phû̌ta̤li̤ ǒ dě shikla htě kò kaǎ nû̌û ta Lawǐta htǒotodo ahǐkǒ toǒ. ^d

Na bǔǎkè yǎta ta̤mi̤ta̤mò̤ ǒ dě lo̤mî̌shǒkla.

15Na nohtǎhtò̌ shihtǎpo̤ toǒ, na nodû̌hè shilo̤ toǒ.

Na nosǔkhwekè shikhî̌ toǒ. ^e

16Na nohtûhtò̌ lṳmṳkhǐ ta lṳmṳsha.

Na bè̌lò̤tû̌ lṳmṳ ta la dě agûla̤ ta agûla̤. ^f

17Dě hǎkhû̌ na bè̌tobè̌bǎbò tû̌ ta̤pṳ̂̌tacǎ agûla̤ ta agûla̤. ^g

Na nohtûhtò̌ gagûkha ta gawo̤kha.

18Kǒ Cǒmara tûjûpwa̤, pwa̤sò̌khě na htǒotoǒ luya̤bò na pwî̌꤮ tènu, gènè̤htò̌nṳ tû̌ pě nî̌.

Kòyò kòyònòdû̌ pi̤jishǐcǒbò nami̤ pwî̌꤮ tènu, gènè̤htò̌to̤ tû̌.

19Ǐkè pûma̤ htû̌li̤cò̌ mî̌ nakòyò toǒ asò̌phlǒhtûpwa̤ ta ta̤mi̤ta̤mò̤ ma̤.

Shope̤kè pûma̤ nakòyò htě a khòbǎ ta̤shuphǔshèwènu toǒ asò̌phlǒhtûpwa̤ dî̌kî̌꤮ ma̤.

20Hǎkhû̌ htě akhǐalo̤ gûla̤nu toǒ, a ǒlǒǒbebò ta ta̤ma̤nûma̤cě akhû̌akhî, gènè̤htò̌nṳ nata̤wṳ̂dò.

21No htûhtò̌ pûma̤ ta̤sòwò̤ ta kò ma̤jîma̤jû nû̌ûnu toǒ ayama̤.

No htû̌sò̌ǐ nami̤ ta kòyò htě kòpè̤ǎpè̤o nû̌û, kòyò shodo pwa̤ma̤jènu toǒ.

22Kǒ Cǒmaradû̌ ma̤kwaǐ mò̌ nana̤, gènè̤htò̌nṳ mò̌ kòyòǒò̌phuhtònu toǒ hî̌phû̌mò̤shî̌hto na ti̤nǐ̤ mṳhǎ htǒonu.

23Pwa̤sò̌khě na dě a sò̌phlǒdû̌ na, a yi̤kǒyi̤hta na toǒnu, shope̤kè asî ma̤.

Pṳ̂̌plǎplǎ asî hèma̤ pi̤ti̤pṳ̂tṳ̂ ma̤tukutakǎ na toǒnu, shope̤kè pûma̤ma̤.