Psalms 79
Ta̤kwisaba ta ta̤ma̤lû̌htò̌ge khlilèphû̌ aya
Asa ata̤sò̌po̤ htû̌sò̌ǐ.
1Kǒ Cǒmaradû̌, pwa̤sò̌khě pa khlilèphû̌hǔwa̤ toǒ hènṳ shěpè̤kèbò shiga htě na ǐ pa htǒohǒ. Asî hèma̤lòte̤ja phû̌mò̤shî̌htobò nata̤lṳhtò̌hocahtǐ htǒohǒ. Asî ma̤pò̌ma̤shîkèbò Yerǔshèlèwî̤ htǒohǒ. a 2Asî bǔǎkèbò napwa̤ma̤ta̤phû̌ toǒ alṳto̤ ta htû̌phû̌ dě mǒla̤. Asî bǔǎkèbò nakòyòcǒtè̤ ta yo̤ toǒ ayî̌ ta ta̤mi̤ta̤mò̤. 3Asî ma̤si nakòyò dě asǐ dû̌hè te̤we̤lṳ̂bò bǎ Yerǔshèlèwî̤ kòshî̌ lò̤ta shi. Pwa̤ lǔlò̤ lṳto̤ toǒnu, a ǒkèpe dǐpwǎ̤꤮ tò̤. 4Khlilèphû̌ htě aǒ te̤we̤ ta panu toǒ a hî̌jîhî̌jû, luya̤, pi̤jishǐcǒbò pa. b 5Kǒ Cǒmara tûjûpwa̤, na glè̌ sò̌phlǒdû̌ yî̤ pa to̤ htû̌꤮ bò̌khòtè pě? Mî̌ tûjûpwa̤ pěya? Na glè̌ khû̌khwè, sò̌phlǒdû̌gûhî yî̤ pa sǒsǒta mî̌gènu to̤ htû̌꤮ bò̌khòtè pě? c 6Sò̌phlǒdû̌ sǔshihtûmò̌ khlilèphû̌hǔwa̤ htě a sî̌ya na tò̤nu toǒ. Sò̌phlǒdû̌gûhîmò̌ shigahǔwa̤ htě a saba kû̌ na tò̤nu toǒ. d 7Asî ma̤sibò nakòyò Israelphû̌ toǒ hǒ. Asî ma̤pî̌ma̤lṳ̂bò pashiga hǒ. 8Paphipaphu dě꤮ awǐnu toǒ ata̤sǔta̤plě akhû̌akhî, nokhòbǎ pûma̤ pa ma̤ nî̌. Pa sò̌phlǒpî̌ sò̌phlǒlṳ̂kèbò hǒ akhû̌akhî, gwèbǎǐ phwèmò̌ pa khònò̤ htǒo nî̌. 9Kǒ Cǒmaradû̌, pwa̤ma̤lû̌htò̌ge pa. Ma̤pûhǐ nami̤ sîrîdû̌sîrîhtû ayanu, ma̤jè pû pa nî̌. Ma̤pûhǐ kò bè̌dubè̌na̤ nami̤ ayanu, ma̤lû̌htò̌ge pû pa, bòlû̌kè pa ta̤sǔta̤plě toǒ nî̌. 10Kǒ Cǒmaradû̌, cû̌plûhî̌ pû khlilèphû̌hǔwa̤nu toǒ ta, “Sîcǒmaradû̌ ǒ bǎtè?” Khlilèphû̌hǔwa̤ toǒ sî̌ya ta a ma̤si napwa̤ma̤ta̤phû̌nu toǒ dě na ma̤ geshǔ asî ta li̤nu, ǐkè̌shǐ pa nî̌. 11Gana̤de pû kòyò ǒ dě apo̤kûnu toǒ ata̤kookasha. Ma̤lû̌htò̌ kòyò htě kò glè̌ cèròsi asînu toǒ ta nasîrîpo̤phǎ. 12Kǒ Běcǎ ta̤adû̌, khlilèphû̌hǔwa̤ toǒ hî̌jîhî̌jû na akhû̌akhî, ma̤ geshǔsǒ mò̌ asî ta li̤ susǒtaplǎ. 13Htodě pa mî̌ nakòyò toǒ htě asǒsǒta sophû̌ dě na gèǐ yǎ la̤ǎshǎkhû̌. Pa glè hî̌bwǐhî̌sîrîhtò̌ na tûjûpwa̤ talakhǎ. Pa htû̌sò̌ǐ na tuhtu hto tuhtu pě.
Copyright information for
KxfSCKRC