Psalms 83

Ta̤kwisaba ta pwa̤sò̌khě Israelphû̌ toǒ bǎ lò̤jûkè aya

Asa ata̤sò̌po̤ htû̌sò̌ǐ.

1Kǒ Cǒmaradû̌, cî̌cî̌ ǒ pûma̤, jîkoo pûma̤.

Kǒ Cǒmaradû̌, hǔhǔ꤮ ǒ pûma̤ nî̌.

2Kè̌mò̌, pwa̤sò̌khě na toǒ ma̤ pi̤ti̤pṳ̂tṳ̂bò hǒ.

Kòyò htě a sò̌khěkhû̌khwè nanu toǒ a shěshǔ lǒkho na hǒ.

3Asî tîwî̌hǔsè̌ ta̤ dě a glè hèshě lǒkho nakòyò toǒ.

Asî gènè̤ ma̤phû̌mò̤ lǒkho kòyò htě na ma̤kwaǐ toǒ.

4Asî hî̌ lǒkho ta, Cû̌꤮, ma̤pûhǐ kò shope̤nǎkèbò Israelkhlilèphû̌ tûjû꤮ pwa̤, pa cû̌ma̤pî̌ma̤lṳ̂kèbò asî khlilèphû̌ hò̌꤮.

5Asî sò̌phlǒnî̤dû plǒnûû̌ dě asî ta̤gènè̤hǔ gènè̤sè̌ htǒoakû.

Asîsò̌phlǒ toplǒnû̌û dě a glè shěshǔ lǒkho na.

6A ǒpe kwè̌꤮ khlilètitè hî̌dě, Edogaphû̌ ta Ishumelǎkhlilèphû̌, Mò̌bǎgaphû̌, Hakakhlilèphû̌, 7Kebalǎgaphû̌, Amogaphû̌, Amalè̌khlilèphû̌, Phǐlǐsatǐgaphû̌, Turǔwî̤phû̌ sîtoǒ hǒ.

8Ashǔrǎgaphû̌ toǒ mî̌ asò̌phlǒ nî̤dû kû̌dǒ ta asîsî.

Asî ma̤jè bǎdǒ Lò̌tǎ akhlialè mî̌ Amophû̌ ta Mò̌bǎphû̌ sîtoǒ.

9Ma̤mò̌ asî pwǐ꤮ na ma̤ Mǐdǐyakhlilèphû̌, ^a Khwǐsisera ta Khwǐjabi dě Kǐsho shilo̤htunu. ^b

10Asî sikè dě Edò̌rawî̤nu tò̤glò, asî na̤klû htǒotoǒnu, asoaûkèbò bǎ hǎkhû̌nu.

11Ma̤mò̌ asîhǐkǒlǒkòdû̌ toǒ pwǐ na ma̤ Khwǐorǐbǎ ta Khwǐsebǎ nunu. ^c

Ma̤mò̌ asîkhwǐ aphû̌makhû lǒ̤꤮ bò toǒ pwǐ na ma̤ Khwǐsebǎ ta Khwǐsalamǔnanu. ^d

12Pwa̤sò̌khěnu toǒ hî̌ lǒkho ta, “Cǒmaradû̌ aga htǒotoǒnu pa phî̌ yǎta paya hò̌.”

13Kǒ Cǒmaradû̌, nonûcû̌kèbò asî pwǐ phopiwi htocû̌kè phǎmǔ.

No nûcû̌kèbò asî pwǐ gili̤sǎ htocû̌kè htǒphî.

14Lṳ̂pṳ̂měǐ asî pwǐ mî̌ lěgè gono̤gapwa̤, pwǐ mî̌ gècû̌ kholo toǒ.

15Lṳ̂pṳ̂ mò̌ asî ta nagili̤sǎplǎwi̤.

Ma̤sò̌gònò̤ ǐsha mò̌ asî ta naphopiwi.

16Kǒ Cǒmara tûjûpwa̤, ma̤pûhǐ asî kè̌lǎ htû̌tiwǐ getosǒ ta na ayanu, ma̤sòwò̤sikèmò̌ asî.

17No ǐsha sòwò̤kè asî tûjûpwa̤.

No sòwò̤sikè asî.

18Na ma̤ hǐnu pě꤮ mî̌ asî glè sî̌yahè ta na mî̌ Cǒmara tûjûpwa̤.

Asî glè sî̌yabò ta pǒ̤꤮ pwǎ na mî̌ Cǒmara htě adû̌ahtûkhlo kò dě a pǒǐ hǎkhû̌běkhû̌.