Psa 84 | KxfSCKRC | STEP | Kǒri akhlialè toǒ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě tobǎ sò̌po̤ wo̤wǒ̤ ta pwa̤dǒ ta̤dǒta̤ǔ a dǒ ta̤ǔta̤po̤ htě apli̤ǒnu toǒ. Kǒ Cǒmara tûjûpwa̤ htě a pǒ ta̤ lǒ̤꤮ bò, ta̤lṳhtò̌ho htě na ǒǐnu awî̤awǒ mè̤mè̤̌.

Psalms 84

1 Kǒ Cǒmara tûjûpwa̤ htě a pǒ ta̤ lǒ̤꤮ bò, ta̤lṳhtò̌ho htě na ǒǐnu awî̤awǒ mè̤mè̤̌.

2 He sò̌yṳ subusaba mè̤mè̤̌ dě Cǒmara tûjûpwa̤ la̤ǒgûla̤ akû bǎo, he sò̌phlǒmo̤ mè̤mè̤̌. ^a

Hena̤ sapwa̤ ta hesò̌phlǒ sama glè sò̌le̤sò̌lò̤ sò̌po̤htò̌ Cǒmaradû̌ htě ahtûpwa̤nu tapwa̤.

3 Kǒ Cǒmara tûjûpwa̤ htě a pǒ ta̤ lǒ̤꤮ bò, hekhwǐ, hecǒmaradû̌, htû̌pwa̤phû̌ toǒ dě a kè̌lǎǒ agûla̤.

Htû̌li̤cò̌ toǒ dě a ma̤ tû̌ api̤ ta aphû̌ toǒ aya bǎ nata̤lṳhtò̌wa̤ toǒ akòshî̌.

4 Kòyò ǒ dě nata̤lṳhtò̌hokû toǒnu, a nî̤bǎ ta̤howi̤.

Asî sò̌po̤htû̌sò̌ǐ na pṳ̂̌꤮ taplǎ.

5 Kòyò htě aphî̌khû̌phî̌ǎ dě naǒ toǒnu na howi̤homò̤ asî.

Asî sò̌phlosho hǎhtò̌ cû̌htò̌ subusaba kû̌ na dě Sǐokholokhû̌.

6 Bǎ asî cû̌nṳ Bakha galo̤to̤khwekû akhanu, shi htǎpo̤bò dě hǎla̤.

Bǎ khwè̌julò̤ sakhû̌lû̌꤮ akhanu, a julò̤bebò galo̤to̤kû, shikoǒphû̌ toǒ ǒhtò̌.

7 Bǎ asî cû̌ akhanu, asîkhû̌ǎ shohtò̌ ta shohtò̌.

Asî pṳ̂̌꤮ tapwa̤ hèdǔlṳ to̤bò ana̤ bǎ Cǒmaradû̌ htě a pǒǐ lǒ̤꤮ bò Cǒmara ahǔwa̤ toǒnu tapwa̤ alo̤mo̤, bǎ Sǐokholokhû̌nu.

8 Kǒ Běcǎ Cǒmara tûjûpwa̤ htě a pǒ ta̤ lǒ̤꤮ bò, gana̤de heta̤kwisabahtǒo nî̌.

Kǒ Yǎ̤kò acǒmaradû̌, gana̤depû nî̌.

9 Kǒ Cǒmaradû̌, kè̌dû̌ mò̌ nakhwǐ htě pwa̤ma̤kwaǐ pa lò̤ta gòtò̤ htǒo.

Kè̌dû̌ mò̌ kòyò htě na wû̌lǎ yǎnu tapwa̤ nî̌.

10 Ǒ dě nata̤lṳhtò̌hokû ti̤ni̤nu awǒkhlope ta ǒ dě ahǔwa̤ ani̤ tîrî̌.

He htû pwǎ pwa̤ǒpo̤ bǎ Cǒmaradû̌ ahǐtakhakûnu amo̤khlope ta he ǒ dě kòyòphû̌mò̤ ahǐdǒkû.

11 Běcǎ Cǒmara tûjûpwa̤ mî̌ alò̤ta lṳmṳ, pwa̤ma̤kwaǐ pa.

Cǒmara tûjûpwa̤ gwèbǎǐ pa, a bè̌dû̌bè̌htû pa.

Kòyò htě a ma̤toma̤bǎ ta̤ toǒnu, Cǒmaradû̌ sò̌phlǒǒ asî ta̤wî̤ta̤wǒ.

12 Kǒ Cǒmara tûjûpwa̤ htě a pǒ ta̤ lǒ̤꤮ bò, kòyò lǒ̤꤮ bò htě a yṳǎ na toǒnu a nî̤bǎ ta̤howi̤. ^b