Psalms 86
Kwisabahtò̌ ta̤ma̤jè
Khwǐdǎ̤wi̤ ata̤kwisaba
1Kǒ Cǒmara tûjûpwa̤, kò ma̤jîma̤jûbò he, he shodo pwa̤ma̤jè akhû̌akhî, gana̤depû he kwihtò̌ nahtǒo dě ma̤jè he nî̌. 2He cǒtè̤ ta heyo̤ akhû̌akhî, ma̤kwaǐpû he. Kǒ hecǒmaradû̌, ma̤lû̌htò̌ge napwa̤ma̤ta̤phû̌ htě a yṳǎnǎla̤ǐ nahtǒo nî̌. 3Kǒ Běcǎ ta̤adû̌, he kwigwèbǎǐ na ti̤nǐ̤ mṳhǎ akhû̌akhî, gwèbǎǐ he nî̌. 4Kǒ Běcǎ ta̤adû̌, he kwisabahtò̌ na akhû̌akhî, ma̤ sò̌le̤sò̌lò̤ napwa̤ma̤ta̤phû̌ htǒo nî̌. 5Kǒ Běcǎ ta̤adû̌, na wǒ mè̤mè̤̌, na bòlû̌ kòta̤sǔ. Nata̤mo̤ǐ htě a hǎbòjò tò̤ htǒo, na dǔlṳ bǎ yǎta kòyò lǒ̤꤮ bò htě a kwigwèbǎǐ nanu toǒ. 6Kǒ Cǒmara tûjûpwa̤, khòsò̌do gana̤depû he ta̤kwisabahtò̌ na htǒo. He kwigwèbǎǐ nahtǒo, khòsò̌do dò̌ bǎ he ta nanò̌ku nî̌. a 7Na gana̤de he ta̤kwisaba pě akhû̌akhî, bǎ he khòbǎ ta̤pò̤ta̤sha akhanu, he kwigwèbǎhtò̌ na. b 8Kǒ Běcǎ ta̤adû̌, Cǒmara htě alò̤ta nanu aǒ dǐpwǎ̤꤮ tò̤. Pwa̤ htě a ma̤jò sǒsǒta nanu aǒ dǐpwǎ̤꤮ tò̤tò̤. 9Kǒ Běcǎ ta̤adû̌, khlilèphû̌ lǒ̤꤮ bò htě na bǒlò̤ toǒnu, asî hèsubusabahtò̌bò dě nalo̤mo̤ pě. Asî htû̌sò̌ǐ lǒkho nata̤sîrîdû̌sîrîhtû pě. c 10Nasîrî mî̌ ashû̌asho. Nata̤ma̤ mî̌ acǒklî̌kî̌ya. Cǒmara mî̌ pǒ̤꤮ natapwǎ̤pa. 11Kǒ Cǒmara tûjûpwa̤, ma̤pûhǐ he ǒhtûpwa̤ kû̌ pwǐ nata̤te̤ta̤mǎ ayanu, sû̌ǐtòwòǐ pû he ta naklè̌naklò. d Ma̤pûhǐ he ǐsha bè̌dubè̌na̤ nami̤ ayanu, ǐ he sò̌phlǒ samabò htě a jûle̤phî̌yo̤ na htǒonu nî̌. e 12Kǒ Běcǎ ta̤adû̌, hecǒmaradû̌, he glè htû̌sò̌ǐ na ta hesò̌phlǒ samabò. He pwe̤ǐlṳ bǎ kò ta na wǒ꤮ mè̤mè̤̌ htǒonu tûjûpwa̤ pě. 13Na mo̤ǐ he ta nata̤mo̤ǐ htě ahǎbòjò tò̤ htǒo awǒ jòjî̌꤮ ta heya tò̤. He glè̌ to̤ phǔtînî̌ ta lṳnǎkhwǎdo akha na ma̤lû̌htò̌ge he. 14Kǒ Cǒmaradû̌, kòyòphî̌dû̌ phî̌htû ana̤ toǒ hèshě lǒkho he. Kòyòkhu kòyòhî htě a bè̌dubè̌na̤ kû̌kò Cǒmara tò̤ toǒ kè̌lǎ ma̤si lǒkho he. f 15Pwǎ̤tadě kǒ Běcǎ ta̤adû̌, na mî̌ Cǒmara htě a gwèbǎǐ kòyò, a ma̤bwǐma̤sîrî kòyò, na sò̌phlǒhtû, na lǒbe ta ta̤mo̤ǐ htě a hǎbòpè̤ jòtò̤. Nalǒbe ta nata̤cǒtè̤ ta yo̤. g 16Htû̌tiwǐ kè̌getîkhî he, gwèbǎǐpû he. Ǐmò̌ napwa̤ma̤ta̤phû̌ ta nakhû̌naǎnu. Ma̤lû̌htò̌ge mò̌ napwa̤ma̤ta̤phû̌ aphû̌makhû htǒo. 17Kǒ Cǒmara tûjûpwa̤, na ma̤jè he, na ma̤mo̤ǐ he akhû̌akhî, pwa̤sò̌khě he toǒ sòwò̤kèbò pě. Dǔlṳ bǎmò̌ he ta nata̤wǒ ta heya ata̤ma̤dòǐ tacǎcǎnu. Pědě asî kè̌shǐ nata̤ma̤dòǐ, dě a sòwò̤kèbò pě.
Copyright information for
KxfSCKRC