Psalms 9

Hî̌bwǐhî̌sîrî htû̌sò̌ǐ Cǒmaradû̌ ata̤ma̤toma̤bǎ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya. Ta̤sò̌po̤pwe̤ htǒomî̌ bǎ sò̌po̤pwe̤ sǒsǒta ta̤sò̌po̤ htě ami̤ ta hephû̌makhû sinu to̤to̤.

1Kǒ Cǒmara tûjûpwa̤, he glè htû̌sò̌ǐ na ta hesò̌phlǒ sama.

He glè pwe̤ǐlṳbò kò ta na ma̤ ta̤cǒklî̌kî̌ya.

2Nakhû̌nakhî, he glè sò̌le̤sò̌lò̤, mo̤sû̌mo̤sò̌ pě.

Kǒ Cǒmara htě adû̌ahtûkhlo kò, he glè sò̌po̤htû̌sò̌ǐ nami̤.

3Bǎ na dǔlṳ nana̤ ta pwa̤sò̌khě he toǒ akha, a htû̌tiwǐ gekhî, a lòkhǔsibò.

4Na sèlèkè̌ he dě na kè̌shǐ ta hecǒhetè̤.

Na hǎnòò̌lò̤ dě nagògohtahtò̌yî̤khû̌ dě na cèròcǒcèròtè̤ ta̤.

5Na sǎhtǎ khlilèphû̌ toǒ.

Na ma̤pè̤kèbò kòyòphû̌mò̤ toǒ.

Na htǔpi̤kèbò asîmi̤ tûjûpwa̤ talakhǎ. ^a

6Pwa̤sò̌khě pa toǒ apî̌alṳ̂ bò꤮ mṳ̂sîglî tûjûpwa̤.

Na ma̤pò̌ma̤shîkèbò asî wî̤dû̌ toǒ, dě kò gènè̤ to̤ǐgepe dǐcǎ꤮ tò̤.

7Cǒmara tûjûpwa̤ pǒǐbò ta̤ tûjûpwa̤.

A ma̤měgle agògohtahtò̌yî̤ ta a la̤cèròtocèròbǎ aya.

8A glè cèròcǒ cèròtè̤ hǎkhû̌phû̌.

A glè pǒtopǒbǎ khlilèphû̌ toǒ.

9Cǒmara tûjûpwa̤ mî̌ kòyò khòbǎ ta̤ma̤jîma̤jû ala̤ǒtûdû.

Bǎ ta̤pò̤ta̤sha hèbǎ kò akhanu, a mî̌ la̤ǒhǔ aměagle.

10Kǒ Cǒmara tûjûpwa̤, tòkhò̌꤮ na wîkè kòyò htě a kè̌lǎ nanu toǒ tò̤.

Kòyò htě a sî̌ya nami̤ toǒnu, a glè yṳǎnǎla̤ǐ na.

11Sò̌po̤ htû̌sò̌ǐmò̌ Cǒmara tûjûpwa̤ hǎnòò̌lò̤ dě Sǐokholokhû̌ htě a pǒta̤ htǒota̤pwa̤.

A ma̤wǒ kwè̌꤮ paya ta titènu pwe̤ǐlṳbòmò̌ khlilèphû̌ toǒ.

12Cǒmara gènè̤htò̌to̤ kòyò htě kò pè̤ǎpè̤o nû̌û.

A shope̤kè asî ta̤kwigwèbǎǐnu toǒ tò̤.

A cèrò kòyò htě a ma̤sǔ asînu toǒ. ^b

13Kǒ Cǒmara tûjûpwa̤, kè̌mò̌lè pwa̤sò̌khě he toǒ ma̤jîma̤jû mè̤mè̤̌ he.

Gwèbǎǐ he, cǐhtò̌ lû̌htò̌ he dě ta̤si atakhadû̌kû htǒo.

14Ma̤pûhǐ he yi̤kǒyi̤hta pwe̤ǐlṳbò heta̤htû̌sò̌ǐ na htǒo dě Ye̤rǔshèlèwî̤phû̌nu toǒ alo̤mo̤ pě aya, htodě ma̤pûhǐ he sò̌le̤sò̌lò̤ tû̌ta nata̤ma̤lû̌htò̌ge htǒo pě ayanu, gwèbǎǐ he.

15Khlilèphû̌toǒ phoyo̤ hǎkû dě a lòte̤nṳbò gesǒtû̌ nû̌ûta ana̤.

Asî cû̌khabǎ gesǒtû̌ htò̌glo htě a dò̌nǎ kònu toǒ.

16Cǒmara tûjûpwa̤ dǔlṳ ana̤ ta a ma̤toma̤bǎ ta̤. ^c

Kòyòsò̌phlǒphû̌mò̤ cû̌tophonṳbò gesǒtû̌ htò̌glo htě a cû̌dò̌nǎhǔ kònu toǒ.

17Kòyòsò̌phlǒphû̌mò̤ ta khlilèphû̌ htě ashope̤nǎ Cǒmara toǒ a glè cû̌to̤bò dě lṳnǎkhwǎdo.

18Kòyò htě a shodo pwa̤ma̤jè toǒnu Cǒmara shope̤nǎkè asî dǐkhò̌꤮ tò̤.

Kòyò htě kòpè̤ǎpè̤o nû̌û toǒ ata̤kè̌shuǐnu kò glè ma̤pî̌ma̤hǎmǎjò nǒ tò̤. ^d

19Kǒ Cǒmara tûjûpwa̤, ma̤mò̌ tò̤ ya, nola̤lò̤ pûma̤ nana̤ ta kòyòhǎkhû̌phû̌ ma̤.

Kò cèròkèbò tû̌ta khlilèphû̌ dě nalo̤mo̤ pě nî̌.

20Kǒ Cǒmara tûjûpwa̤ ma̤ǐshakèmò̌ asî.

Nosî̌yakèmò̌ asî ta asîmî̌ kòyòhǎkhû̌phû̌ htě a mî̌ dǐcǎ꤮ tò̤, a sijòpwǎ htǒonu.