Psa 91 | KxfSCKRC | STEP | Kòyò hè ǒ dě Cǒmara htě adû̌ahtûkhlo kò ala̤ǒhǔ měgle akû toǒ꤮, asî glè hèǒkǔsǎbò̌ nǒ dě Cǒmara htě apo̤phǎshû̌sho htǒotapwa̤ ata̤ma̤kwaǐ ala̤ pě.

Psalms 91

1 Kòyò hè ǒ dě Cǒmara htě adû̌ahtûkhlo kò ala̤ǒhǔ měgle akû toǒ꤮, asî glè hèǒkǔsǎbò̌ nǒ dě Cǒmara htě apo̤phǎshû̌sho htǒotapwa̤ ata̤ma̤kwaǐ ala̤ pě.

2 He hî̌ Cǒmara tûjûpwa̤ ta, “Na mî̌ hela̤ǒhǔ aměgle, hewî̤we̤dû̌ dě atònò.

“Na mî̌ hecǒmara htě he yṳǎnǎla̤ǐ.”

3 Cǒmara glè ma̤lû̌htò̌ge na dě kò dò̌hǔ htò̌glonu toǒ acǔdekû ta ta̤shasila̤ toǒ acǔdekû.

4 A glè hǔbǐ na ta aděge,

Na ǒtûdûbǎ dě aděla̤.

Ata̤cǒtè̤tayo̤nu asǒsǒta nagòtò̤, la̤ma̤kwaǐ na. ^a

5 Ta̤sò̌gònò̤ ǐsha hè bǎ lṳmṳkhǐkhanu bǎbǎ, pla̤ htě kò khǎ yǎ bǎ lṳmṳshanu bǎbǎ, na la̤ǐsha ǒnǒ dǐcǎ꤮ tò̤.

6 Ta̤shasila̤ hè dě ta̤khǐklanu bǎbǎ, khînǎmo̤pha htě a ma̤si kò bǎ lṳmṳshanu bǎbǎ, na la̤ǐsha ǒnǒ dǐcǎ꤮ tò̤.

7 Kòyò lòkhǔsi apwa̤ tîrî̌ dě nacǔcocî̌ tokho bǎbǎ, kòyò lòkhǔsi apwa̤ tòsò̌ dě nacǔdemû tokho bǎbǎ, a hèbǎto̤ nǒ na tò̤.

8 Cǒmara cèrò kòyòphû̌mò̤ toǒnu na glè kè̌shǐ yǎta nami̤sǎ.

Na glè sî̌yate̤mǎ ta nana̤.

9 Na nohtû Cǒmara tûjûpwa̤, Cǒmara htě adû̌ahtûkhlo kò ta nala̤ǒhǔ aměgle, la̤ma̤kwaǐ nagûla̤ akhû̌akhî, 10 Ta̤phû̌mò̤shî̌hto hèbǎ nǒ na dǐcǎ꤮ tò̤.

Ta̤shasila̤ hèphǔ dě nahǐkòshî̌ dǐcǎ꤮ tò̤tò̤.

11 Na cû̌ bǎtètè̌꤮ bǎbǎ, Cǒmara glè nokè̌ǐkhwè̌ǐ ma̤kwaǐ na ta amǒkhû̌tanaphû̌. ^b

12 Ma̤pûhǐ na khò̌lòpo̤ bǎsha ta lo̤ tò̤nu, asî phǒhtò̌shǔtû̌ na pě. ^c

13 Na glè khayî̤cû̌bò̌ dě sî̌ò̌ ta wṳ̂phû̌mò̤ toǒ alo̤.

Na glè yî̤pwî̌cû̌bò̌ sî̌ò̌dû̌ toǒ ta wṳ̂sapo̤pṳ sîtoǒ. ^d

14 Cǒmara tûjûpwa̤ hî̌, he glè ma̤lû̌htò̌ge kòyò htě a mo̤ǐ he.

He glè ma̤kwaǐ kòyò htě a sî̌yate̤mǎwǒ hemi̤.

15 Bǎ na kwigwèbǎǐ he akhanu, he glè gana̤deshǔ.

Bǎ na shěto̤bǎ ta ta̤pò̤ta̤sha akhanu, he glè ǒkû̌ ta na.

He glè ma̤lû̌htò̌ge na, he glè bè̌htò̌yî̤ na.

16 “He glè noǒhtûpwa̤ něhtûlahtû na ta ta̤sò̌phlǒmo̤.

“He glè dǔlṳ sî̌ya na ta he mî̌ pwa̤ htě a ma̤lû̌htò̌ge na.”