Psalms 94

Cǒmara tûjûpwa̤ mî̌ pwa̤cèrò ta̤ lǒ̤꤮ bò

1Kǒ Cǒmara tûjûpwa̤, na mî̌ Cǒmara htě ama̤gekhîshǔ kò, kǒ Cǒmaradû̌ htě a ma̤geshǔ ta̤.

Ǐ lṳhtò̌mò̌ na ta̤sîrîdû̌sîrîhtû.

2Kǒ pwa̤ htě acèrò hǎkhû̌, ma̤mò̌.

Ma̤ geshǔ mò̌ kòyò htě a phî̌dû̌phî̌htû ana̤nu toǒ pwǐ asî to khòbǎnu.

3Kǒ Cǒmara tûjûpwa̤, kòyòphû̌mò̤ htǒotoǒ sò̌le̤sò̌lò̤ yî̤pe pwî̌tè?

Kǒ Cǒmara, a glè yî̤pe pwî̌tè?

4Asî bè̌dû̌bè̌htû ana̤nu a yî̤pe pwî̌tè?

Lǒ̤꤮ bò kòyòphû̌mò̤ toǒ hî̌bǎ htû̌sò̌ yî̤pe pwî̌tè?

5Kǒ Cǒmara tûjûpwa̤, asî ma̤jîma̤jû, ma̤nûma̤cě mè̤mè̤̌ nakòyò.

6Asî ma̤sima̤hǎmǎbò mamǔǒkhwè̌, phû̌ htě shodopha, shiphû̌gaphû̌nu toǒ.

7Asî hî̌ ta, “Cǒmara tûjûpwa̤ kè̌shǐ nǒtò̤.

“Yǎ̤kò acǒmara sî̌ya nǒtò̤tò̤.” ^a

8Kǒ kòyòǒlû̌ǒkhlo sî, sî̌yaphlophǎ mò̌ lǒkho ta̤ tò̤ya.

Kòyòǒò̌ toǒ, sî glè̌ sî̌yaphlophǎ kû̌kò htû̌꤮ bò̌hòtè pě?

9Cǒmara mî̌ a bǒlò̤ nò̌kulǎ, a gana̤dejò tò̤ sî gènè̤ ya?

A mî̌ pwa̤bǒlò̤ mi̤sǎphlǒ, a kè̌shǐjò tò̤ sî gènè̤ ya?

10A mî̌ pwa̤sû̌ǐwǒge khlilèphû̌ toǒ, sî gènè̤ ta a plèjò kò tò̤ya?

A mî̌ pwa̤ htě a sû̌ǐ bǎ kò ta̤sî̌ta̤jò, sî gènè̤ ta ata̤sî̌khû̌sî̌ya ǒnǒ tò̤ya?

11Cǒmara tûjûpwa̤ sî̌ya kòyòhǎkhû̌phû̌ ata̤gènè̤ toǒ.

A sî̌ya ta asî ta̤gènè̤ toǒnu anòdû̌ pwǎ. ^b

12Kǒ Cǒmara tûjûpwa̤, kòyò htě na sû̌ǐwǒge yǎ dě na sû̌ǐ bǎ asî ta nata̤sû̌ǐnu toǒ mî̌ a nî̤bǎ ta̤howi̤.

13Na ma̤kwaǐ asî dě ata̤pò̤ta̤sha akû to̤htû̌ kò phoyo̤hto hǎkû ta kòyòphû̌mò̤ la̤lòte̤si ayanu pě.

14Cǒmara tûjûpwa̤ wîkè nǒ akòyò toǒ tò̤.

A bè̌kè nǒ kòyò htě a wû̌lǎnu toǒ dî̌kî̌꤮ tò̤.

15Ta̤cèrònu atoabǎ gesǒ pě.

Lǒ̤꤮ bò kòyòcǒkòyòtè̤ toǒ jûle̤phî̌yo̤kû̌bòtû̌ pě.

16Ûpè tapwa̤ glè ihtǒ ma̤kwadǐdòshǔ bǎ he ta kòyòphû̌mò̤nu toǒ pè?

Ûpè tapwa̤ glè ihtǒ shěshǔ bǎ he ta kòyò ma̤ ta̤phû̌mò̤shî̌htonu toǒ pè?

17Cǒmara tûjûpwa̤ dè ma̤jè he tò̤ hî̌mî̌, he sikèhtohǒ.

18Kǒ Cǒmara tûjûpwa̤, bǎ he hî̌ ta, “He glè̌ si hǒ” akhanu, nata̤mo̤ǐ htě ahǎbòjò tò̤ htǒo a ma̤jè he.

19Bǎ he bǎgubǎgè mè̤mè̤̌ akhanu, na ma̤mo̤ǐ hesò̌phlǒ, na ma̤sò̌le̤sò̌lò̤ he.

20Pwa̤ pǒ ta̤ htě aphû̌mò̤shî̌hto toǒnu, a htûjò nakhobǒsû̌ tò̤.

Asî htû̌tèplè̌ noǎtonoǎbǎ kû̌kò ta̤sû̌ta̤tòwò tò̤.

21Asî shokhû̌ye̤yo̤ ma̤si kòyòcǒkòyòtè̤ toǒ.

Asî cèròsi kòyò htě ata̤sǔ ǒtò̤ toǒ.

22Pwǎ̤tadě Cǒmara tûjûpwa̤ mî̌ hewî̤we̤dû̌ atònò.

Hecǒmara mî̌ a htû lo̤dû̌ hela̤ǒtûdû.

23Cǒmara ma̤ geshǔ kòyòphû̌mò̤nu toǒ pwǐ asîta̤sǔ ǒnu pě.

Asî ta̤sǔ akhû̌akhî, Cǒmara ma̤sikèbò asî pě.

Cǒmara tûjûpwa̤, pacǒmara ma̤hǎmǎkèbò asî pě.