Psa 95 | KxfSCKRC | STEP | Hèmò̌, sò̌le̤sò̌lò̤ sò̌po̤htò̌ Cǒmara tûjûpwa̤ hò̌꤮. Pa kaǎgu htû̌sò̌ǐ plǒnûû̌ lo̤dû̌ htě alò̤ta pwa̤ma̤kwaǐ pa htǒotapwa̤ hò̌꤮.

Psalms 95

Lî̤sò̌po̤ htû̌sò̌ǐ

1 Hèmò̌, sò̌le̤sò̌lò̤ sò̌po̤htò̌ Cǒmara tûjûpwa̤ hò̌꤮.

Pa kaǎgu htû̌sò̌ǐ plǒnûû̌ lo̤dû̌ htě alò̤ta pwa̤ma̤kwaǐ pa htǒotapwa̤ hò̌꤮. ^a

2 Hènṳ plǒnûû̌ alo̤mo̤ dě pa hî̌bwǐhî̌sîrîhtò̌ yǎ hò꤮.

Pa sò̌le̤sò̌lò̤ sò̌po̤ htû̌sò̌ǐ yǎ hò꤮.

3 Cǒmara tûjûpwa̤ mî̌ Cǒmara htě asîrîshû̌shokhlo kò.

Khwǐdû̌ htě asîrîshû̌shokhlo ta Cǒmara ahǔwa̤ toǒ lǒ̤꤮ bò.

4 Hǎkhû̌ gûla̤ htě a yo̤khlo toǒ bǎbǎ, kholodû̌kholohtûkhlo toǒ bǎbǎ, a ǒbò dě acǔdekû.

5 A bǒlò̤ shidû̌shite̤we̤ akhû̌akhî, shidû̌shite̤we̤ mî̌ ata.

Kholoplǔ toǒ mî̌ a bǒlò̤ ta ana̤na̤.

6 Hèmò̌, hègene̤ û̌lò̤mò̌, sabahtò̌mò̌ yǎ.

Pa gene̤lò̤ dě Cǒmara tûjûpwa̤, htě a bǒlò̤ pa htǒotapwa̤ alo̤mo̤ hò꤮.

7 A mî̌ pacǒmaradû̌.

Pa mî̌ kòyò htě a kè̌ǐkhwè̌ǐ.

Pa mî̌ sophû̌ htě a gèǐ.

Khò̌ti̤ni̤ a hî̌ titènu na to gana̤de tû̌꤮ pwǎ ayo̤. ^b

8 Cǒmara tûjûpwa̤ hî̌ ta, hǐkǒshò̌ sǒsǒ lǒkho pûma̤ ta sîphisîphu hǐkǒshò̌ dě Merǐbǎ shihtǎpo̤ gûla̤ ta dě lo̤mî̌shǒklakhû̌ Masa gûla̤nu ma̤. ^c

9 Gûla̤ bǎnu mî̌ sîphisîphu toǒ kè̌shǐbǎhtobò he ma̤ta̤ ta asîya toǒ pwǎ̤ta asî kè̌lǎ ma̤kè̌pe hehe. ^d

10 Hǐnudě hewi̤ja asî aně li̤shi.

He hî̌ ta, Asî mî̌ kòyò htě acǒtè̤ta he tò̤.

“‘Kòyò htě a gana̤de heta̤mǎlò̤ tò̤,’ he hî̌kè hǐnu.

11 “Ma̤hǐnudě he sò̌phlǒdû̌ asî dě he hî̌lò̤kè asî yo̤ tûmû ta, ‘Shiga htě he olò̤ ta he glè ǐ yǎta asî la̤ǒkǔ teděsǎ htǒotò̤glònu, asî nṳbǎpe tò̤ hǒ.’” ^e