Psa 97 | KxfSCKRC | STEP | Cǒmara tûjûpwa̤ pǒǐ ta̤, nosò̌le̤sò̌lò̤ mò̌ hǎkhû̌phû̌. Nomo̤sû̌mo̤sò̌ mò̌ kòyò ǒ dě shidû̌shite̤we̤kû shikholophû̌jonu toǒ.

Psalms 97

1 Cǒmara tûjûpwa̤ pǒǐ ta̤, nosò̌le̤sò̌lò̤ mò̌ hǎkhû̌phû̌.

Nomo̤sû̌mo̤sò̌ mò̌ kòyò ǒ dě shidû̌shite̤we̤kû shikholophû̌jonu toǒ.

2 Poǒlṳ ta ta̤khǐsuwṳ ǒte̤we̤bǐbò nû̌û.

A pǒcǒpǒtè̤ a pǒtopǒbǎ akòyò.

3 Cǒmara plûcû̌wǐ amî̌gèrosho dě alo̤mo̤.

A ugèkèbò pwa̤sò̌khě htě a ǒte̤we̤ nû̌ûnu toǒ.

4 Cǒmara atî̌lî̌bo lîlò̤ dě hǎkhû̌.

Hǎkhû̌ kè̌shǐ dě a ǐsha gònò̤gèglè.

5 Dě Cǒmara tûjûpwa̤ alo̤mo̤ ta dě hǎkhû̌ htǒoteběbò aběcǎ alo̤mo̤nu, kholo toǒ lòte̤jûkèbò sǒsǒta tarǎbo jûbǔjanu.

6 Mǒkhû̌ toǒ pwe̤ǐlṳ nû̌û ta̤cǒta̤tè̤.

Lǒ̤꤮ bò khlilèphû̌ toǒ kè̌shǐbò nû̌û ta̤lîta̤rakha.

7 Lǒ̤꤮ bò kòyò htě a sabahtò̌, bè̌dû̌bè̌yǒ ta̤yo̤ta̤gî htě a nòdû̌ toǒ glè sòwò̤kèbò.

Lǒ̤꤮ bò Cǒmara htě a mè̤ tò̤ htǒotoǒnu a glè sabahtò̌bò Cǒmara tûjûpwa̤.

8 Kǒ Cǒmara tûjûpwa̤, Ye̤rǔshèlèwî̤phû̌ gana̤de nata̤cèrò dě a sò̌le̤.

Lǒ̤꤮ bò Yṳ̌da dophû̌shǒphû̌ toǒ gana̤de nata̤cèrò dě a sò̌lò̤.

9 Kǒ Cǒmara tûjûpwa̤, hǎkhû̌ teběbò mî̌ nadû̌nahtûkhlo kòyò.

Kò bè̌dû̌khlo na ta Cǒmara ahǔwa̤ lǒ̤꤮ bò.

10 Kǒ kòyò htě a mo̤ǐ Cǒmara tûjûpwa̤ sî, sò̌khěkhû̌khwè ta̤phû̌mò̤shî̌hto.

Cǒmara tûjûpwa̤ kè̌ǐkhwè̌ǐ kòyò htě acǒtè̤ ta ayo̤ toǒ ata̤htûpwa̤.

A ma̤lû̌htò̌ge asî dě kòyòphû̌mò̤ acǔdekû.

11 Cǒmara ata̤mo̤ta̤wǒ lîrakhalò̤ sǒsǒta lṳmṳ dě kòyòcǒkòyòtè̤ alo̤.

A phî̌hèǐ ta̤sò̌le̤sò̌lò̤ ta kòyòsò̌phlǒwǒ aya.

12 Kǒ kòyòcǒkòyòtè̤ toǒ, Cǒmara tûjûpwa̤ ma̤ bǎ sî akhû̌akhî, sò̌le̤sò̌lò̤ lǒkho.

Hî̌bwǐhî̌sîrîhtò̌mò̌ ami̤cahtǐ.