Psalms 98
Cǒmaradû̌ mî̌ pwa̤pǒǐ hǎkhû̌akhû̌
Ta̤sò̌po̤htû̌sò̌ǐ
1Sò̌po̤htû̌sò̌ǐ Cǒmara tûjûpwa̤ ta lî̤sò̌po̤ asa. A ma̤ ta̤ htě acǒklî̌kî̌yanu toǒ. Apo̤aphǎ, asîrîshû̌sho akhû̌akhî, a ma̤pè̤ ta̤. 2Cǒmara tûjûpwa̤ ǐsî̌yalṳ a ma̤lû̌htò̌ge ta̤ ta apo̤aphǎshû̌sho. A dǔlṳ a ma̤ ta̤cǒta̤tè̤ toǒ dě khlilèphû̌ toǒ alo̤mo̤. 3Cǒmara gènè̤htò̌to̤ ata̤mo̤ǐ htě ahǎbòjò tò̤ ta acǒtè̤ ta ayo̤ ta Israelphû̌ aya. Hǎkhû̌ sawî̤la̤ kè̌shǐ pacǒmaradû̌ ata̤ma̤lû̌htò̌ge. 4Kǒ hǎkhû̌phû̌ lǒ̤bò sî꤮ sò̌le̤sò̌lò̤ sò̌po̤htò̌ lǒkho Cǒmara tûjûpwa̤. Sò̌le̤sò̌lò̤ kaǎguhtû̌sò̌ǐmò̌, sò̌po̤mo̤mè̤ htû̌sò̌htò̌mò̌ yǎ. 5Sò̌po̤ htû̌sò̌htò̌mò̌ Cǒmara tûjûpwa̤ ta tǐtute̤gwe. Dǒpo̤lṳ ta̤sò̌po̤ ta apo̤nî̤꤮ wǒnu. 6Ǔmò̌ gwè ta sophû̌ne̤. Sò̌le̤sò̌lò̤ htû̌sò̌ǐ lǒkhomò̌ dě Cǒmara tûjûpwa̤ mî̌ Khwǐdû̌htǒo alo̤mo̤. 7Nopo̤ te̤we̤tosobò shidû̌shite̤we̤ ta lǒ̤꤮ bò ta̤ htě a ǒ bǎ shiklanu toǒ. No sò̌po̤ po̤pi̤ti̤pṳ̂tṳ̂ hǎkhû̌ ta kòyò htě a ǒ bǎ hǎkhû̌ bǎotoǒ. 8No pla̤bò shikhî̌ toǒ acǔde. No sò̌le̤sò̌lò̤ sò̌po̤plǒ kholodû̌kholohtû. 9Cǒmara tûjûpwa̤ hèlò̤ cèrò hǎkhû̌ akhû̌akhî, nosò̌po̤bò asî dě alo̤mo̤. A glè cèròcǒcèròtè̤ hǎkhû̌. A glè cèròtocèròbǎ khlilèphû̌ toǒ.
Copyright information for
KxfSCKRC