Revelation of John 10
Tanaphû̌ ta lî̤tûlûphû̌ tûklû
1Hǐnuhtodě he kè̌shǐ tanaphû̌ ahǔwa̤ tapwa̤ ǒ mǒkhû̌ hèlò̤. A kûsǒhtò̌ poǒlṳ dě kǒwǒshibo ǒ nû̌û hǐkǒkhû̌. A mi̤sǎnu alò̤ta lṳmṳ dě a khò̌lopo̤nu alò̤ta mî̌gè lî̤pî̤sǐ hǐhtǔnu. 2Dě a cǔdekûnu, a pṳ̂měnṳ lî̤tûlûphû̌ htě kò bòmonǎ nû̌û tûklû. Akhò̌lopo̤ cǔdemû tokhonu a khalò̤ shidû̌shite̤we̤ akhû̌, dě cǔcocî̌ tokhonu a khalò̤ dě khosûkhû̌. 3Dě a yi̤kǒ po̤htò̌shû̌ sǒsǒta sî̌ò̌ toǒ gonu. Bǎ a yi̤kǒhtò̌htonu, tî̌lî̌lò̤ shǔ nû̌û susǒtuhu. 4Bǎ tî̌lî̌lò̤hto susǒtuhu akhanu, he glè̌ khwè̌mǎkè pwǎ̤tadě he gana̤de yo̤po̤htò̌ mǒkhû̌ dě a hî̌, “Bè̌hǔkè tî̌lî̌lò̤ pwe̤ǐlṳ gekhîshǔ na susǒtuhu htǒonu. Khwè̌mǎ ma̤ yǎ ma̤.” 5Bǎnuakha he kè̌shǐ tanaphû̌ htě a ihtǒ ǒ shidû̌shite̤we̤ akhû̌ ta khosûkhû̌ tapwa̤nu a yṳ̂htò̌ acǔdemû dě mǒkhû̌. a 6Dě a bèlò̤nṳ ana̤ ta Cǒmara htě a htûpwa̤ tûjûpwa̤ talakhǎ dě a bǒlò̤ mǒkhû̌, hǎkhû̌, shidû̌shite̤we̤ ta ta̤lǒ̤꤮ bò ǒ dě akû htǒonu tapwa̤ ami̤. Htodě tanaphû̌ htǒotapwa̤nu a hî̌ ta, “Ta̤htǒotoǒ htûhtò̌ pěnu ayî̤pe nǒtò̤hǒ. 7Htû̌꤮ tanaphû̌ apwa̤ susǒtapwa̤ htǒotapwa̤ glè ǔhtò̌ atǔ akhapěnu, Cǒmara ma̤lǒbehtò̌ ata̤ ma̤wǒnǎ ta̤adû̌ayǒ pwǐ a pwe̤ǐhto ajûphû̌ pwa̤po̤ toǒnu pě.” 8Yo̤po̤htò̌ htě he gana̤dehto mǒkhû̌ htǒotoǒnu, a hî̌bǎlò̤ gesǒ he dě a hî̌ he pwǐhè̌o, “Cû̌phî̌ lî̤tûlû htě kò bòmonǎhto yǎdě tanaphû̌ htě a ihtǒ ǒ shidû̌shite̤we̤ akhû̌ ta khosûkhû̌nu tapwa̤ a cǔdekûnu.” b 9Dě he cû̌ tanaphû̌nu tapwa̤ ǒ dě he kwi a lî̤tûlûphû̌nu tûklû. Dě a hî̌ he, “Phî̌ yǎ dě ǎyǎ nî̌꤮. Dě na phukûnu a khǎ pě pwǎ̤tadě na gokûnu a shu sǒsǒta wè̌khû̌shinu pě.” 10He phî̌nṳ lî̤tûlûphû̌ a cǔdekû htǒo dě he ǎ yǎ. He ǎyǎ dě he gokûnu, ashu sǒsǒta wè̌khû̌shi pwǎ̤tadě bǎ he û̌nṳhto yǎ akhanu, akhǎ hè dě hephukû. 11Hǐnuhtodě kò hî̌ he, “Na bǎ hî̌po̤phǎnǎ plṳ̂gesǒ bǎ kòyò toǒ, khlilèphû̌ toǒ, pwa̤hî̌bǎ khǒnû̌û yo̤ toǒ ta Khwǐcophǎ htǒotoǒ awi̤akè̌ nî̌꤮.”
Copyright information for
KxfSCKRC