Rev 13 | KxfSCKRC | STEP | Bǎnuakha, he kè̌shǐ ta̤mi̤ta̤mò̤ tado ǒ dě shidû̌shite̤we̤ akû dě a hǎhtò̌. Ane̤ ǒ aphòshǐ, a hǐkǒǒ susǒtama, ane̤ pṳ̂̌꤮ tabonu, a khû̌glûhta ǒbò, htodě ahǐkǒ pṳ̂̌tama alo̤nu kò khwè̌nǎbò nû̌ûmi̤ ta “Ta̤pi̤jishǐcǒ Cǒmara” hǐnu.

Revelation of John 13

Ta̤mi̤ta̤mò̤ ginǐ̤do

1 Bǎnuakha, he kè̌shǐ ta̤mi̤ta̤mò̤ tado ǒ dě shidû̌shite̤we̤ akû dě a hǎhtò̌. ^a Ane̤ ǒ aphòshǐ, a hǐkǒǒ susǒtama, ane̤ pṳ̂̌꤮ tabonu, a khû̌glûhta ǒbò, htodě ahǐkǒ pṳ̂̌tama alo̤nu kò khwè̌nǎbò nû̌ûmi̤ ta “Ta̤pi̤jishǐcǒ Cǒmara” hǐnu. ^b 2 Ta̤mi̤ta̤mò̤ htǒotadonu, alò̤ta khîmî̌phû̌, akhò̌lopo̤nu alò̤ta hta khò̌lopo̤ dě agokûnu alò̤ta sî̌ò̌ gokû. Wṳ̂sapo̤pṳnu tabo ǐ ta̤mi̤ta̤mò̤nu tado ta a ta̤po̤ta̤phǎ ta a la̤hǎnòò̌ Khwǐcophǎ gògohtahtò̌yî̤ htǒonu ta ta̤sîrîshû̌sho dě a glè pǒta̤ aya toǒ. ^c 3 Ta̤mi̤ta̤mò̤ ahǐkǒ susǒtama akla tamanu, alò̤ta a bǎ kamǎ dě a phǔsi tè̤tè̤hto hǒnu, pwǎ̤ta a ta̤shata̤htò toǒnu, awǒgebò htohǒ. Hǎkhû̌teběbò sû̌pi̤sò̌pi̤ dě gûkû̌ ta̤mi̤ta̤mò̤nu tado akò. 4 Wṳ̂sapo̤pṳnu tabo ǐhto a ta̤sîrîshû̌sho ta ta̤mi̤ta̤mò̤nu tado akhû̌akhî, kòyò pṳ̂̌꤮ tapwa̤ subusabahtò̌bò nû̌û. Asî subusabahtò̌ ta̤mi̤ta̤mò̤ dě a hî̌ lǒkho, “Kòyò htě alò̤ta ta̤mi̤ta̤mò̤ htǒonumî̌ aǒ ya? Mî̌ûpè tapwa̤ shěshǔ bǔ yǎ pè?” 5 Ta̤mi̤ta̤mò̤ htǒotadonu, a nî̤bǎ ashuakhwèwǒ dě a glè hî̌bǎhtò̌yî̤ ana̤ dě a pi̤jishǐcǒ Cǒmara. Htohǒtò̤ kò ǐyǎ dě a noǎ a ta̤sîrîshû̌sho li̤shi ta ginǐ̤la pě. ^d 6 A tèhtò̌ ǐshoǐbě Cǒmara ta Cǒmara ami̤. Htohǒtò̤ a ǐshoǐbě to̤ Cǒmara la̤ǒgûla̤ ta bò꤮ kòyò htě a ǒ dě mǒkhû̌nu toǒ. 7 A nî̤bǎ ashuakhwèwǒ dě a glè shě Cǒmara a kòyò saprṳ̂ dě a ma̤pè̤kè asî pě, dě kò glè ǐ yǎ ta̤sîrîshû̌sho dě a pǒǐbò kòyò pṳ̂̌tṳgumṳ, kòyò pṳ̂̌tṳ̂prṳ̂, ta bò꤮ kòyò htě a hî̌bǎ yo̤sǎ titètè̌꤮ bǎbǎ ta khlilèphû̌ titètè̌꤮ bǎbǎnu toǒ pě. ^e 8 Kòyò lǒ̤꤮ bò htě a ǒ hǎkhû̌bǎo pṳ̂̌꤮ tapwa̤nu, a subusabahtò̌bò nû̌û pě. Tèhtò̌ bǎ kò bǒlò̤ hǎkhû̌ akhape, kòyò htě a ǒhtûpwa̤ hǎkhû̌ bǎotoǒ dě kò khwè̌kû̌dǒ asîmi̤ dě sophû̌nu tado a lî̤htûpwa̤ akû hǒtò̤ toǒnu, a glè subusabahtò̌bò lǒkho ta̤mi̤ta̤mò̤ htǒotado. Sophû̌nu tado mî̌ mî̌pwǎ kò ma̤si yǎnu tapwa̤ hǒ. ^f

9 Hǐnudě nò̌ku dèǒ hî̌nu gana̤de lǒkho nî̌꤮.

10 Kòyò tapwa̤pwa̤nu kò yè̤lò̤nǎhto nû̌û dě kò glè pṳ̂ dǒlò̤te̤ a apo̤kû hî̌nu, kò bǎ pṳ̂ dǒlò̤te̤nò a pě. Kòyò tapwa̤pwa̤nu kò yè̤lò̤nǎhto nû̌û dě kò bǎma̤si yǎ ta tǒ̤phû̌ pě hî̌nu, kò bǎ ma̤sinòpwǎ a ta tǒ̤phû̌ pě.

Cǒmara kaǎ akòyò ta a bǎkhòsò̌do ta̤jîta̤jû dě bǎ yṳǎ ta̤ ayapwǎ. ^g

Ta̤mi̤ta̤mò̤ ǒ dě hǎla̤ hǎhtò̌

11 Hǐnuhtodě he kè̌shǐ ta̤mi̤ta̤mò̤ ahǔwa̤ tado ǒ dě hǎla̤ hǎhtò̌. Dě ane̤ ǒ ginǐ̤phò dě alò̤ta sophû̌ ane̤nu, htodě a hî̌bǎ sǒsǒta wṳ̂sapo̤pṳ nutabo. 12 Ta̤mi̤ta̤mò̤ htě a ǒ dě hǎla̤ hǎhtò̌ htǒotadonu, a noǎbò ta̤mi̤ta̤mò̤ dě awǐnu tado a ta̤sîrîshû̌sho toǒ alo̤mo̤, ma̤pûhǐ kò sabahtò̌ ta̤mi̤ta̤mò̤ htě a bǎ kamǎhto dě awǒgesǒnu tado, dě a noshû̌ hǎkhû̌htǒo ta kòyò lǒ̤bò ǒ hǎkhû̌ htǒotoǒ dě a glè sabahtò̌ nû̌û. 13 Ta̤mi̤ta̤mò̤ ginǐ̤do tado htǒonu, a ma̤lṳ bǎ kò ta̤cǒklî̌kî̌ya toǒ. A no mî̌ mǒkhû̌ dě a glè hèlò̤ hǎkhû̌bǎo dě kò pṳ̂̌꤮ tapwa̤ a lo̤mo̤. 14 Htodě a dǔlṳ a ta̤cǒklî̌ htě ta̤mi̤ta̤mò̤ dě awǐnu tado noma̤ nû̌û alo̤mo̤nu toǒ akhû̌akhî, a lǒplò̤ nṳbò kòyò ǒhtûpwa̤ hǎkhû̌bǎo toǒ. Ta̤mi̤ta̤mò̤ ginǐ̤do tadohtǒo, a nobǒhtò̌ asî pwa̤yo̤pwa̤gî tado, ma̤pûhǐ a bè̌dû̌bè̌htû gesǒ ta̤mi̤ta̤mò̤ htě a bǎ kamǎ ta tǒ̤phû̌ dě a ǒhtûpwa̤penu tado. 15 Ma̤pûhǐ pwa̤yo̤pwa̤gîhtǒo hî̌bǎjò dě a ma̤sibò kòyò htě a sabahtò̌ kû̌ nû̌û tò̤nu toǒ ayanu, kò ǐ ta̤mi̤ta̤mò̤ ginǐ̤donu tado ta̤po̤ta̤phǎ, htě a glè ǔnṳ htûpwa̤jò ta̤mi̤ta̤mò̤ dě awǐnu tado apwa̤yo̤pwa̤gî. 16 Kòyò htě ami̤dû̌ toǒ bǎbǎ, kòyò htě kò gènè̤ pî̌tî̌ nû̌û toǒnu bǎbǎ, kòyò dû̌yò̤ bǎbǎ, kòyò shèwè bǎbǎ, jûphû̌ toǒ bǎbǎ, kòyò nî̤bǎ ta̤pelesesǎ toǒ bǎbǎ, ma̤pûhǐ asî nî̤bǎ ta̤ma̤dòǐ tacǎ dě acǔdemû alo̤, mè̤tò̤mî̌ dě a me̤htò̌lo̤ ayanu, ta̤mi̤ta̤mò̤ ginǐ̤dotadonu tado noshû̌noshobò kò pṳ̂̌꤮ tapwa̤. 17 Kòyò htě ata̤ma̤dòǐ ǒkû̌kò tò̤ toǒnu, a pwî̤ǎshaǎ kû̌kò tò̤. Ta̤ma̤dòǐ htǒonumî̌ ta̤mi̤ta̤mò̤ ami̤, mè̤tò̤mî̌ ta̤dǒmǎnǎ tacǎ dě a ǐ lṳhtò̌ nû̌ûmi̤.

18 Ma̤pûhǐ sî sî̌yaphlo ayanu, sî bǎ lîmò. Kòyò tapwa̤pwa̤nu aǒ ta ta̤sî̌ta̤jò dě a dǒbǎjò ta̤mi̤ta̤mò̤ a ta̤dǒmǎnǎ htǒotacǎnu, nodǒbǎ tû̌ yǎnu, ma̤tè̤hî̌dě ta̤dǒbǎ htǒonumî̌ kòyòhǎkhû̌phû̌ alî̤phlǒ dǒmǎnǎ. Alî̤phlǒ dǒmǎnǎ htǒonumî̌ ya̤susǒ ta shisusǒ ta susǒ.