Rev 14 | KxfSCKRC | STEP | Bǎnukha, he kè̌shǐ sophû̌nu tado ihtǒ ǒ Sǐokholokhû̌. Dě kò ihtǒ ǒdǒkû̌ ta a apwa̤ tesě ta lǐ̤sò̌ ta lǐ̤rî̌. Dě kòyò htǒotoǒ a me̤htò̌lo̤nu, kò khwè̌mǎnǎ sophû̌ htǒotado ami̤ ta apha ami̤.

Revelation of John 14

Sophû̌ ta a kòyò saprṳ̂

1 Bǎnukha, he kè̌shǐ sophû̌nu tado ihtǒ ǒ Sǐokholokhû̌. Dě kò ihtǒ ǒdǒkû̌ ta a apwa̤ tesě ta lǐ̤sò̌ ta lǐ̤rî̌. Dě kòyò htǒotoǒ a me̤htò̌lo̤nu, kò khwè̌mǎnǎ sophû̌ htǒotado ami̤ ta apha ami̤. ^a 2 Dě he gana̤de ta̤po̤htò̌ mǒkhû̌ tacǎ dě a po̤ sǒsǒta shipe̤lòte̤plò̤ htodě tî̌lî̌lò̤. Htohǒtò̤ a po̤ sǒsǒta kò dǒpo̤pè̤tè̤ tǐtu toǒnu. 3 Kòyò htě kò htè̌ge asî apwa̤ tesě ta lǐ̤sò̌ ta lǐ̤rî̌ htǒotoǒnu, a ihtǒ ǒ lǒkho dě Khwǐcophǎ gògohtahtò̌yî̤ ta ta̤htûpwa̤ htǒo lǐ̤do ta wè̤khǔwè̤pwa̤nu toǒ alo̤mo̤. Asî sò̌po̤lî̤ asa to̤to̤ htě kò sû̌ǐjò bǎ pwǎpǒ̤ asî htǒonu to̤to̤ pwǎ. 4 Asî htǒotoǒ numî̌ makhû htě asò̌phlǒ mṳ̂aplî dě a hǎmoǒplǒnǒ ta mamǔ tò̤ toǒ. Asî mî̌ makhûphû̌sǎ htě a cǒtè̤ toǒ. Sophû̌nu tado cû̌bǎtè tò̤glò bǎbǎ, asî gûcû̌kû̌ nû̌ûkò. Asî mî̌ kò htè̌gehto a bǎ hǎkhû̌phû̌ toǒ akla dě asî mî̌ kòyò toǒ htě kò lṳhtò̌ wǐgutṳ̌ nû̌û dě Cǒmara ta sophû̌nu tado aǒ hǒ. 5 Asî hî̌bǎ lòho kû̌kò tò̤. Asî ta̤sǔta̤plě ǒkû̌kò tò̤ numî̌ kò sî̌ya. ^b

Tanaphû̌ sò̌su

6 Htodě he kè̌shǐ tanaphû̌ ahǔwa̤tapwa̤ a wi̤htò̌yî̤ mǒla̤ dě a phî̌hènṳ ta̤sò̌le̤sò̌lò̤ tûjûpwa̤ awi̤akè̌. Dě a glè dǒnè sî̌yabǎ kòyòhǎkhû̌phû̌ toǒ ta khlilèphû̌ pṳ̂̌꤮ tacǎ, ta kòyò pṳ̂̌tṳmṳ, ta kòyò htě a hî̌bǎ yo̤sǎ titètè̌꤮ bǎbǎ ta kòyò pṳ̂̌tṳ̂prṳ̂ ta ta̤sò̌le̤sò̌lò̤ awi̤akè̌ htǒonu pě. 7 A yi̤kǒ po̤shû̌ dě a hî̌, “Ǐsha bè̌dubè̌na̤ Cǒmara dě htû̌sò̌ǐ a sîrîdû̌sîrîhtû, ma̤tè̤hî̌dě akhîakha hèto̤hǒ dě a glè cèrò kòyòhǎkhû̌phû̌ hǒ. Sabahtò̌ mò̌ Cǒmara htě a bǒlò̤ mǒkhû̌ ta hǎkhû̌, shidû̌shite̤we̤ ta shipo̤htǎkhû̌ htǒotoǒ tapwa̤nu.”

8 Tanaphû̌ ginǐ̤pwa̤ tapwa̤ gûhî̌kû̌ nû̌ûkò ta, “A lòte̤jakè hǒ, wî̤dû̌ Babulo lòte̤jakè hǒ, a noohtobò kò ta shisî̌yo̤ mî̌ sǐshiphěyî̌ a ta̤sò̌yṳ phû̌mò̤shî̌hto htǒotoǒ nuhǒ.” ^c

9 Dě tanaphû̌ supwa̤ tapwa̤ gûhî̌ po̤shû̌ kû̌ tanaphû̌ awǐnu sò̌gini̤ akò ta, “Kòyò htě a subusabahtò̌ ta̤mi̤ta̤mò̤ htǒo ta apwa̤yo̤pwa̤gî htǒotapwa̤nu toǒ dě a phî̌shǔ ta̤ma̤dò htě kò ma̤dòǐ bǎ asî dě a me̤htò̌lo̤nu toǒ bǎbǎ, dèmè̤tò̤mî̌ kò ma̤dòǐ bǎ asî dě a cǔdelo̤nu toǒ bǎbǎ, 10 Asî sana̤nu a okû̌ lǒkho Cǒmara a ta̤sò̌dû̌ ashisî̌yo̤ pě. A ta̤sò̌dû̌ aba htǒotabanu, kò yṳnṳbe nû̌ûta shisî̌cò. ^d Bò kòyò htě a ma̤ta̤ pwǐhè̌o toǒnu, a bǎ khòbǎ mè̤mè̤̌ ta̤jîta̤jû dě, mî̌ htě kò shû̌gè nû̌ûta ya̤sû̌bò akû htǒonu pě. A khòjîkhòjû dě tanaphû̌ cahtǐ toǒ ta sophû̌nu tado a lo̤mo̤ pě. ^e 11 Mî̌ htě a gègûjî gègûjû asî htǒonu, a khǔhtò̌ tûjûpwa̤ talakhǎ pě. Kòyò htě a sabahtò̌ ta̤mi̤ta̤mò̤ htǒo, ta apwa̤yo̤pwa̤gî htǒotoǒ, htodě ûpè bǎbǎ a phî̌shǔ ta̤mi̤ta̤mò̤ a ta̤ma̤dòǐ htě aǒ ta ami̤ htǒotoǒnu, lṳmṳsha bǎbǎ, lṳmṳkhǐ bǎbǎ, ta̤jîta̤jû yǎkhè̌hèpe bǎ asîya dǐkhò̌ tò̤.” ^f 12 Hǐnudě Cǒmara akòyò cahtǐ htě a gana̤de ta a ǒhtûpwa̤ gû pwǐ Cǒmara a ta̤mǎlò̤ toǒ dě acǒatè̤ ta Ye̤shǔ toǒnu, tobǎ khò bò̌ta̤.

13 Htodě he gana̤de ta̤po̤htò̌ mǒkhû̌ dě a hî̌, “Khwè̌mǎkè htǒonu, tèhtò̌ khònò̤tǒ̤hènu, kòyò htě a si dě Cǒmara a ta̤phî̌ta̤ma̤ akû toǒnu, a glè nî̤bǎ ta̤howi̤.” Běcǎ sǎcahtǐ hî̌, “A mè̤mè̤̌. Ma̤tè̤hî̌dě asî glè ǒkǔkè lǒkho dě a ta̤phî̌ta̤ma̤ toǒ akû ta a ta̤jîta̤jû toǒ akû hǒ. Htohǒtò̤ asî ta̤phî̌ta̤ma̤ htě abwǐasîrî ǒ toǒnu, a gûkû̌ asîkò pě.”

Hǎkhû̌ a ta̤kǎbǔ akhîakha

14 Hǐnuhtodě děanǒkònu he kè̌shǐ poǒlṳbû tebě, dě poǒlṳ tebě aklanu, alò̤ta kòyò hǎnòò̌ tapwa̤ dě a glûnṳ khû̌glûhta tama ta a pṳ̂měǐ gaja htòwǒ tabǎ dě a cǔdekû. ^g 15 Htodě tanaphû̌ ahǔwa̤ tapwa̤ ǒbǎ ta̤lṳhtò̌ho akû dě a hǎhtò̌. Dě a yi̤kǒhtò̌ kòyò hǎnòò̌ dě poǒlṳklanu tapwa̤ ta, “Noǎ na gajanu dě kǎmò̌ bǔnu, ma̤tè̤hî̌dě to kǎ bǔ akhîakha to̤hèhǒ. Dě hǎkhû̌ htǒo, bǔmibò hǒ.” ^h 16 Htǒotaplǎdě kòyò hǎnòò̌ bǎ poǒlṳklanu tapwa̤ wo̤lò̤ agaja hǎkhû̌ dě a kǎkè bǔ hǎkhû̌ toǒ.

17 Hǐnuhtodě he kè̌shǐ tanaphû̌ ahǔwa̤tapwa̤ ǒ mǒkhû̌ ta̤lṳhtò̌hokû dě a hǎhtò̌ ta a pṳ̂měǐdǒ gaja htòwǒ tabǎbǎ. 18 Htodě tanaphû̌ ahǔwa̤ tapwa̤ dě kò ǐlò̤ nû̌û ta̤ma̤ htě a bǎ pǒǐ mî̌ htǒotapwa̤nu, a ǒ dě ta̤lṳwa̤ gûla̤nu dě ahǎhtò̌. Dě a yi̤kǒhtò̌ tanaphû̌ htě agaja htòwǒ ǒnu tapwa̤ dě a hî̌ nû̌û, “Wo̤lò̤ na gaja htòwǒ htǒonu, dě kǎgeplǒkè mò̌ hǎkhû̌ sobîsǎ htě asǎ htǒonu toǒ, ami bòhǒ.” 19 Hǐnu akhû̌akhî, tanaphû̌nu tapwa̤ wo̤lò̤ agaja hǎkhû̌ dě a kǎkè a sobîsǎhtǒo htodě a wînṳkè nû̌dě kò la̤wî̤hǎhtò̌ htǒshi adû̌atònò htě alò̤ta Cǒmara a ta̤sò̌dû̌ htǒonu akû. 20 Sobîsǎ htǒotoǒnu, kò wî̤ asî dě la̤wî̤hǎhtò̌ sobîshi agûla̤ htě a ǒ dě wî̤khlonu. La̤wî̤hǎhtò̌ sobîshi agûla̤ htǒonu, sǐtoǒ shǐhǎhtò̌ cû̌yî̤ ta̤ya̤ shilǐ̤sǒ ta lǐ̤mè̤, dě ayo̤nu aǒ yè̌tṳ. ⁱ